SBI | దేశంలో దిగజారిపోతున్న కుటుంబాల ఆర్థిక పరిస్థితులు.. రెండేండ్లలోనే రెట్టింపైన రుణం, సగానికిపైగా పడిపోయిన పొదుపు

ఒకవైపు దేశ ఆర్థిక వ్యవస్థ ప్రపంచంలోకెల్లా వేగంగా వృద్ధిచెందుతున్నదంటూ ప్రధాని, ఆర్థికమంత్రి, ప్రధాన ఆర్థిక సలహాదారు.. ఒక్కరేమిటి.. కేంద్ర ప్రభుత్వ పెద్దలందరూ ఊదరగొడుతుంటే మరోవైపు తాజా అధికారిక గణాంకాల్ని విశ్లేషిస్తూ దేశీ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా విభాగమైన ఎస్బీఐ రీసెర్చ్‌ నిర్ఘాంతపోయే నివేదికను విడుదల చేసింది.

• దేశీయ కుటుంబాల ఆర్థిక పరిస్థితి ఇదీ
• రెండేండ్లలోనే చిన్నాభిన్నం
• ఎస్బీఐ రిసెర్చ్‌ రిపోర్ట్‌

SBI | న్యూఢిల్లీ, సెప్టెంబర్‌ 21: ఒకవైపు దేశ ఆర్థిక వ్యవస్థ ప్రపంచంలోకెల్లా వేగంగా వృద్ధిచెందుతున్నదంటూ ప్రధాని, ఆర్థికమంత్రి, ప్రధాన ఆర్థిక సలహాదారు.. ఒక్కరేమిటి.. కేంద్ర ప్రభుత్వ పెద్దలందరూ ఊదరగొడుతుంటే మరోవైపు తాజా అధికారిక గణాంకాల్ని విశ్లేషిస్తూ దేశీ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా విభాగమైన ఎస్బీఐ రీసెర్చ్‌ నిర్ఘాంతపోయే నివేదికను విడుదల చేసింది. దేశంలో కుటుంబాల ఆర్థిక పరిస్థితులు దిగజారిపోయాయన్నది ఈ రిపోర్ట్‌ సారాంశం. కేవలం రెండేండ్లలోనే కుటుంబాల రుణం రెట్టింపు అయ్యిందని, పొదుపు మాత్రం సగానికిపైగా పడిపోయిందని ఎస్బీఐ రిసెర్చ్‌ వెల్లడించింది.

ఐదు దశాబ్దాల కనిష్ఠం

రిజర్వ్‌బ్యాంక్‌ సైతం ఈ వారంలో ఒక బులిటిన్‌ విడుదల చేస్తూ 2022లో జీడీపీలో 7.2 శాతం ఉన్న కుటుంబాల నికర ఆర్థిక పొదుపు 2023 ఆర్థిక సంవత్సరంలో ఐదు దశాబ్దాల కనిష్ఠస్థాయి 5.1 శాతానికి తగ్గినట్టు తెలిపింది. ఏడాదికాలంగా కుటుంబాల ఆర్థిక రుణాలు మాత్రం జీడీపీలో 3.8 శాతం నుంచి 5.8 శాతానికి చేరాయి.

ప్రభుత్వ ఖర్చులకు ప్రజల పొదుపు ఆధారం

ప్రభుత్వ సాధారణ ఖర్చులకు, ఇతర నాన్‌-ఫైనాన్షియల్‌ కార్పొరేషన్ల వ్యయాలకు ప్రధానంగా ప్రజల పొదుపే ఆధారం. పొస్టాఫీసుల్లో జరిగే చిన్న మొత్తాల పొదుపును పూర్తిగా కేంద్ర ప్రభుత్వమే వాడుకుంటుంది. డిపాజిట్లలో వచ్చే నిధుల్లో కొంత శాతాన్ని బ్యాంక్‌లు ప్రభుత్వ బాండ్లను కొనుగోలు చేయడానికే ఉపయోగిస్తాయి. ఆ బాండ్ల జారీ ద్వారా ప్రభుత్వం నిధుల్ని సమీకరించుకుంటుంది. నాబార్డ్‌ తదితర వ్యవసాయ సంబంధిత, పీఎఫ్‌సీ తదితర వ్యవసాయేతర సంస్థలు, ఎన్జీవోలు బాండ్ల జారీ ద్వారా పొదుపు నిధుల్నే పొందుతాయి.

• గత రెండేండ్లలో కుటుంబాలు వాటి ఆర్థిక పొదుపును భౌతిక పొదుపు (ఇండ్లు తదితర భౌతిక ఆస్తులు)లోకి మళ్లించి ఉండవచ్చని ఘోష్‌ అభిప్రాయం వ్యక్తం చేశారు.
• రియల్‌ ఎస్టేట్‌ రంగం పుంజుకోవడం, ఆస్తుల ధరలు పెరగడంతో భౌతిక ఆస్తుల్లోకి పొదుపు మళ్లి ఉంటుందని ఎస్బీఐ అధికారి తెలిపారు.
• 2020-21 ఆర్థిక సంవత్సం నుంచి 2022-23 ఆర్థిక సంవత్సరానికి కుటుంబాల అప్పులు రెట్టింపునకుపైగా పెరిగి రూ.15.6 లక్షల కోట్లకు చేరాయి
• దేశీయ కుటుంబాలు ప్రధానంగా బ్యాంక్‌ల నుంచి భారీగా రుణాలు తీసుకున్నాయి. ఈ మధ్యకాలంలో పెరిగిన రూ.8.2 లక్షల కోట్ల అప్పుల్లో బ్యాంక్‌ల నుంచే తీసుకున్నవి రూ.7.1 లక్షల కోట్లు ఉన్నాయి.
• బ్యాంక్‌ల నుంచి తీసుకున్న అప్పుల్లో ఎక్కువగా గృహ, రిటైల్‌ రుణాలున్నాయి.
• ఈ రెండేండ్లలో గృహ పొదుపు సగానికిపైగా (55 శాతం) తగ్గి జీడీపీలో 5.1 శాతానికి పడిపోయింది. 2021 ఆర్థిక సంవత్సరంలో ఇది జీడీపీలో 11.5 శాతం ఉంది. కొవిడ్‌ పాండమిక్‌ ముందస్తు ఏడాది 2020 ఆర్థిక సంవత్సరంలో సైతం ఇది 7.6 శాతం.
• కొవిడ్‌ పాండమిక్‌ నుంచి స్థూల పొదుపుకంటే అప్పులే అధికంగా పెరిగాయి. ఈ మధ్యకాలంలో స్థూల ఆర్థిక పొదుపు రూ.6.7 లక్షల కోట్లు పెరగ్గా, ఆర్థిక రుణాలు రూ.8.2 లక్షల కోట్లు పెరిగినట్టు ఎస్బీఐ గ్రూప్‌ చీఫ్‌ ఎకానమిక్‌ అడ్వయిజర్‌ సౌమ్య కాంతి ఘోష్‌ తెలిపారు.
• కుటుంబాల అప్పులకు సంబంధించి.. బ్యాంక్‌ల నుంచి తీసుకున్న రూ.7.1 లక్షల కోట్లలో 55 శాతం గృహ, వాహన కొనుగోళ్లు, విద్యా రుణాలున్నాయి.
• కుటుంబాల ఆస్తులకు సంబంధించి.. ఇన్సూరెన్స్‌, ప్రావిడెంట్‌ ఫండ్‌, పెన్షన్‌ ఫండ్స్‌లో రూ.4.1 లక్షల కోట్లు పెట్టుబడి చేశారు.
• కుటుంబాల నికర ఆర్థిక పొదుపు తగ్గిన తరుణంలోనే స్థూల భౌతిక ఆస్తుల్లో పొదుపు పెరిగినట్టు ఎస్బీఐ రీసెర్చ్‌ పేర్కొంది.
• అయితే 2012 ఆర్థిక సంవత్సరంలో గృహ పొదుపులో మూడింట రెండు వంతులుకుపైగా భౌతిక ఆస్తుల్లో ఉండగా, అది 2021లో 48 శాతానికి పడిపోయింది. 2023లో తిరిగి ఇది 70 శాతానికి చేరింది.