నష్టాల్లో స్టాక్‌ మార్కెట్లు

దేశీయ స్టాక్‌ మార్కెట్లు వరుసగా రెండోరోజు నష్టపోయాయి. తొలి త్రైమాసికంలో ఫలితాలు అంచనాలకు చేరుకోలేకపోవడంతో మదుపరులు బ్లూచిప్‌ సంస్థల షేర్లను భారీగా విక్రయించారు. విదేశీ సంస్థాగత పెట్టుబడిదారులు భారీగా నిధులను ఉపసంహరించుకోవడం, అంతర్జాతీయ మార్కెట్లో క్రూడాయిల్‌ ధరలు మళ్లీ భగ్గుమనడం మదుపరుల్లో సెంటిమెంట్‌ను దెబ్బతీసింది.

• 300 పాయింట్లు నష్టపోయిన సెన్సెక్స్‌

ముంబై, జూలై 24: దేశీయ స్టాక్‌ మార్కెట్లు వరుసగా రెండోరోజు నష్టపోయాయి. తొలి త్రైమాసికంలో ఫలితాలు అంచనాలకు చేరుకోలేకపోవడంతో మదుపరులు బ్లూచిప్‌ సంస్థల షేర్లను భారీగా విక్రయించారు. విదేశీ సంస్థాగత పెట్టుబడిదారులు భారీగా నిధులను ఉపసంహరించుకోవడం, అంతర్జాతీయ మార్కెట్లో క్రూడాయిల్‌ ధరలు మళ్లీ భగ్గుమనడం మదుపరుల్లో సెంటిమెంట్‌ను దెబ్బతీసింది. ఫలితంగా సెల్లింగ్‌ బటన్‌ నొక్కడంతో ప్రారంభంలో భారీగా లాభపడిన సూచీలు చివర్లో నష్టాల్లోకి జారుకున్నాయి.

ఇంట్రాడేలో 66,808 పాయింట్లను తచ్చాడిన 30 షేర్ల ఇండెక్స్‌ సూచీ సెన్సెక్స్‌ చివరకు 299.48 పాయింట్ల నష్టంతో 66,384.78 వద్ద ముగిసింది. అటు ఎన్‌ఎస్‌ఈ నిఫ్టీ 72.65 పాయింట్లు నష్టపోయి 19,672.35 వద్ద ముగిసింది. ఈ రెండు సూచీల గత సెషన్‌లో ఒక్క శాతానికి పైగా నష్టపోయిన విషయం తెలిసిందే. ఈవారంలోనే వడ్డీరేట్లకు సంబంధించి అమెరికా ఫెడరల్‌ రిజర్వు నిర్ణయం ప్రకటించనుండటంతో మదుపరులు ముందస్తు జాగ్రత్తగా అమ్మకాలకు మొగ్గుచూపారు. తొలి త్రైమాసికంలో ఐటీ, ఎఫ్‌ఎంసీజీ రంగ సంస్థల ఆర్థిక ఫలితాలు విశ్లేషకుల అంచనాలకు చేరుకోకపోవడంతో మార్కెట్లు తీవ్ర ఆటోపోటులకు గురయ్యాయని జియోజిట్‌ ఫైనాన్షియల్‌ సర్వీసుల హెడ్‌ వినోద్‌ నాయర్‌ తెలిపారు. ఫెడరల్‌ రిజర్వు సమావేశ నిర్ణయంపై మదుపరులు వేచి చూసి దోరణి అవలంభిస్తున్నారు.

• నాలుగు శాతం నష్టపోయిన ఐటీసీ షేరు టాప్‌ లూజర్‌గా నిలిచింది
• కొటక్‌ బ్యాంక్‌, టెక్‌ మహీంద్రా, రిలయన్స్‌, జేఎస్‌డబ్ల్యూ స్టీల్‌, టాటా స్టీల్‌, హెచ్‌యూఎల్‌, మారుతి, నెస్లె, ఐసీఐసీఐ బ్యాంక్‌, హెచ్‌సీఎల్‌ టెక్‌, విప్రో, బజాజ్‌ ఫైనాన్స్‌ షేర్లు నష్టపోయాయి.
• కానీ, ఇండస్‌ఇండ్‌ బ్యాంక్‌, మహీంద్రా, అల్ట్రాటెక్‌ సిమెంట్‌, ఎల్‌అండ్‌టీ, టీసీఎస్‌, టాటా మోటర్స్‌, ఇన్ఫోసిస్‌, ఎస్బీఐ, ఎన్‌టీపీసీ, ఎయిర్‌టెల్‌, సన్‌ఫార్మా, హెచ్‌డీఎఫ్‌సీ బ్యాంక్‌, యాక్సిస్‌ బ్యాంక్‌లు లాభపడ్డాయి.
• బీఎస్‌ఈ మిడ్‌క్యాప్‌, స్మాల్‌క్యాప్‌ ఇండెక్స్‌లు నష్టపోయాయి.
• రంగాలవారీగా చూస్తే ఎఫ్‌ఎంసీజీ 1.74 శాతం, మెటల్‌, ఎనర్జీ, ఆయిల్‌ అండ్‌ గ్యాస్‌ రంగాల షేర్లు తగ్గుముఖం పట్టాయి.