పెద్దపల్లి, మార్చి 29 (నమస్తే తెలంగాణ) : అది ఖని పారిశ్రామిక ప్రాంతం.. ఎక్కడికెళ్లినా రణగొణ ధ్వనులు, యంత్రాల సప్పుళ్లు వినిపిస్తుంటాయి.. ఫైవింక్లయిన్కాలనీ 33 డివిజన్ మంథెనవారి వీధిలోని ఓ చోట పిచ్చుకల కిచకిచలు వీనులవిందు కలిగిస్తుంటాయి. పక్షి ప్రేమికుడైన మంథెన శ్రీనివాస్ ఇల్లు ఆహ్లాదకర వాతావరణానికి నిలయంగా మారింది. పిచ్చుకలంటే ప్రాణంగా భావించే శ్రీనివాస్, కొన్నేళ్ల నుంచి పక్షులను సంరక్షిస్తున్నాడు. తన ఇంటి ఆవరణలో ఆరు బర్డ్ ఫీడర్లు ఏర్పాటు చేసి నిత్యం ఆహారం, తాగునీరు అందిస్తున్నాడు. నిత్యం 120 నుంచి 160 వరకు పక్షులు వస్తుండగా, రెండు రోజులకోసారి నాలుగు కిలోల ఆహారం (కొర్రలు, వడ్లు) వాటిలో నింపుతున్నాడు. ఇందుకోసం ప్రతి నెలా 1200 వరకు ఖర్చు చేస్తున్నాడు. ఊర పిచ్చుకలు, బుర్కపిట్టలు, ఉడ్పిక్కర్ లాంటి పక్షులు ఇంటి ఆవరణలో సందడి చేస్తున్నాయి. కిచకిచలతో ఆ ప్రాంతవాసుల మదిని దోస్తున్నాయి.
నాకు పక్షులంటే మస్తు ఇష్టం..
నాకు చిన్నప్పటి నుంచి పక్షులంటే ఎంతో ఇష్టం. పావురాలను, కుందేళ్లను పెంచేవాడిని. పిచ్చుకలు ఆవాసం లేక, ఆహారం దొరక్క ఇబ్బందులు పడుతుండడాన్ని గమనించిన. వాటి కోసం మా ఇంటి ఆవరణలో చెట్లకు బర్డ్ ఫీడర్లు ఏర్పాటు చేసిన. వీటిలో నిత్యం ఆహారం, నీళ్లను అందుబాటులో ఉంచుతున్న. మస్తు పిట్టలు వస్తున్నయి. కిచకిచలు విన్నప్పుడల్లా మస్తు సంతోషమైతది.
-మంథెన శ్రీనివాస్, ఫైవింక్లయిన్కాలనీ