మూడోరోజూ అదే జోరు.. 740 పాయింట్లు పెరిగిన సెన్సెక్స్‌

దేశీయ స్టాక్‌ మార్కెట్లు వరుసగా మూడోరోజు లాభపడ్డాయి. రష్యా-ఉక్రెయిన్‌ దేశాల మధ్య జరుగుతున్న శాంతి చర్చలతో సమస్య త్వరలో కొలిక్కి వచ్చే అవకాశాలు ఉండటంతో దేశీయ సూచీలు భారీగా పుంజుకున్నాయి. బ్లూచిప్‌ సంస్థలైన ఆర్‌ఐఎల్‌, ఇన్ఫోసిస్‌, హెచ్‌డీఎఫ్‌సీ, ఐసీఐసీఐ బ్యాంక్‌ షేర్లకు మదుపరుల నుంచి లభించిన మద్దతుతో ఆరువారాల గరిష్ఠ స్థాయిని తాకింది.

ముంబై, మార్చి 30: దేశీయ స్టాక్‌ మార్కెట్లు వరుసగా మూడోరోజు లాభపడ్డాయి. రష్యా-ఉక్రెయిన్‌ దేశాల మధ్య జరుగుతున్న శాంతి చర్చలతో సమస్య త్వరలో కొలిక్కి వచ్చే అవకాశాలు ఉండటంతో దేశీయ సూచీలు భారీగా పుంజుకున్నాయి. బ్లూచిప్‌ సంస్థలైన ఆర్‌ఐఎల్‌, ఇన్ఫోసిస్‌, హెచ్‌డీఎఫ్‌సీ, ఐసీఐసీఐ బ్యాంక్‌ షేర్లకు మదుపరుల నుంచి లభించిన మద్దతుతో ఆరువారాల గరిష్ఠ స్థాయిని తాకింది. సెన్సెక్స్‌, నిఫ్టీలు ఒక్కశాతానికి పైగా లాభపడ్డాయి. ఒక దశలో 800 పాయింట్లకు పైగా లాభపడిన 30 షేర్ల ఇండెక్స్‌ సూచీ సెన్సెక్స్‌ చివరకు 740.34 పాయింట్లు లేదా 1.28 శాతం లాభపడి 58,683.99 వద్ద ముగిసింది. డెరివేటివ్‌ కాంట్రాక్టు గడువు ముగియనుండటంతో మదుపరులు కొనుగోళ్ళకు మొగ్గుచూపారు. దీంతో 30 షేర్ల ఇండెక్స్‌లో 21 షేర్లు లాభాల్లో ముగిశాయి. అలాగే ఎన్‌ఎస్‌ఈ నిఫ్టీ 172.95 పాయింట్లు అందుకొని 17,498.25 వద్ద నిలిచింది. ఫిబ్రవరి 10 తర్వాత సూచీలకు ఇదే గరిష్ఠ స్థాయి. గడిచిన మూడు రోజుల్లో సెన్సెక్స్‌ 1,321 పాయింట్లు(2.29 శాతం), నిఫ్టీ 345 పాయింట్లు(2 శాతం) లాభపడింది.

• మార్కెట్లో బజాజ్‌ ఫిన్‌సర్వ్‌ షేరు నాలుగు శాతం వరకు లాభపడి టాప్‌ గెయినర్‌గా నిలిచింది.
• మహీంద్రా అండ్‌ మహీంద్రా, బజాజ్‌ ఫైనాన్స్‌, పవర్‌ గ్రిడ్‌, హెచ్‌డీఎఫ్‌సీ, ఐసీఐసీఐ బ్యాంక్‌, నెస్లె, మారుతి, రిలయన్స్‌, కొటక్‌ బ్యాంక్‌, యాక్సిస్‌ బ్యాంక్‌, అల్ట్రాటెక్‌ సిమెంట్‌, ఇన్ఫోసిస్‌, హెచ్‌డీఎఫ్‌సీ బ్యాంక్‌, టీసీఎస్‌, రెడ్డీస్‌, ఎన్‌టీపీసీల షేర్లు లాభాల్లో ముగిశాయి.
• మరోవైపు, ఐటీసీ, టాటా స్టీల్‌, టెక్‌ మహీంద్రా, ఎయిర్‌టెల్‌, టైటాన్‌, విప్రో, హెచ్‌సీఎల్‌ టెక్‌, ఎస్బీఐ షేర్లు మాత్రం మదుపరులను ఆకట్టుకోలేకపోయాయి.
• బీఎస్‌ఈ స్మాల్‌క్యాప్‌, మిడ్‌క్యాప్‌ రంగ షేర్లు ఒక్క శాతం వరకు బలోపేతం అయ్యాయి.
• రంగాలవారీగా చూస్తే ఫైనాన్స్‌, రియల్టీ, బ్యాంకింగ్‌ షేర్లు కదంతొక్కాయి.