మార్కెట్లకు చమురు భయాలు.. ఒక్క శాతం వరకు కోల్పోయిన సెన్సెక్స్‌, నిఫ్టీ

దేశీయ స్టాక్‌ మార్కెట్ల నష్టాల పరంపర కొనసాగుతున్నది. అమెరికా-ఇరాన్‌ దేశాల మధ్య జరుగుతున్న చర్చలు విఫలంకావడంతో అంతర్జాతీయ మార్కెట్లో క్రూడాయిల్‌ ధరలు మళ్లీ భగ్గుమనడం మదుపర్లలో ఆందోళన నెలకొన్నది.

ముంబై, ఏప్రిల్‌ 13: దేశీయ స్టాక్‌ మార్కెట్ల నష్టాల పరంపర కొనసాగుతున్నది. అమెరికా-ఇరాన్‌ దేశాల మధ్య జరుగుతున్న చర్చలు విఫలంకావడంతో అంతర్జాతీయ మార్కెట్లో క్రూడాయిల్‌ ధరలు మళ్లీ భగ్గుమనడం మదుపర్లలో ఆందోళన నెలకొన్నది. ఫలితంగా అమ్మకాలకు మొగ్గుచూపడంతో సూచీలు ఒక్క శాతం వరకు నష్టపోయాయి. ఇంట్రాడేలో 1,700 పాయింట్ల వరకు నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు మార్కెట్‌ ముగిసే సమయానికి 702.68 పాయింట్లు తగ్గి 76,845.57 వద్ద స్థిరపడింది.

మరో సూచీ నిఫ్టీ కూడా 207.95 పాయింట్లు కోల్పోయి 23,842.65 వద్దకు జారుకున్నది. పశ్చిమాసియాలో నెలకొన్న ఉద్రిక్త పరిస్థితులకు చెక్‌పెట్టాలనే ఉద్దేశంతో పాకిస్థాన్‌లో అమెరికా-ఇరాన్‌ దేశాల ప్రతినిధుల మధ్య 21 గంటల పాటు జరిగిన చర్చలు విఫలం కావడంతో మళ్లీ యుద్ధమేఘాలు కమ్ముకోవడం ఈక్విటీ మార్కెట్లపై ప్రతికూల ప్రభావం చూపిందని దలాల్‌స్ట్రీట్‌ వర్గాలు వెల్లడించాయి.

• మారుతి షేరు 4.61 శాతం తగ్గి టాప్‌ లూజర్‌గా నిలిచింది.
• దీంతోపాటు బజాజ్‌ ఫైనాన్స్‌, ఇండిగో, రిలయన్స్‌, టీసీఎస్‌, హెచ్‌డీఎఫ్‌సీ బ్యాంక్‌ షేర్లు రెండు శాతానికి పైగా పతనం చెందాయి.
• అలాగే ఐటీసీ, ఎటర్నల్‌, హెచ్‌సీఎల్‌ టెక్నాలజీ, టైటాన్‌, హెచ్‌యూఎల్‌, మహీంద్రా, ఇన్ఫోసిస్‌, బజాజ్‌ ఫిన్‌సర్వ్‌, ట్రెంట్‌, అల్ట్రాటెక్‌ సిమెంట్‌, పవర్‌గ్రిడ్‌, అదానీ పోర్ట్స్‌, కొటక్‌ బ్యాంక్‌, ఎస్బీఐ, టెక్‌ మహీంద్రా, ఏషియన్‌ పెయింట్‌, బీఈఎల్‌, సన్‌ఫార్మా, ఎల్‌అండ్‌టీ, టాటా స్టీల్‌ షేర్లు నష్టపోయాయి.
• ఐసీఐసీఐ బ్యాంక్‌, ఎన్‌టీపీసీ, యాక్సిస్‌ బ్యాంక్‌, ఎయిర్‌టెల్‌ బలపడ్డాయి.
• వాహన రంగ సూచీ అత్యధికంగా 2.10 శాతం, ఎనర్జీ 1.34 శాతం, సర్వీసెస్‌ 1.31 శాతం, ఆయిల్‌ అండ్‌ గ్యాస్‌ 1.25 శాతం, కన్జ్యూమర్‌ డ్యూరబుల్‌ 1.21 శాతం, ఐటీ 1.17 శాతం క్షీణించాయి.
• కానీ టెలికాం, యుటిలిటీస్‌, పవర్‌ రంగ సూచీలు పెరిగాయి.

నేడు మార్కెట్లకు సెలవు

బాబా సాహెబ్‌ అంబేద్కర్‌ జయంతి సందర్భంగా మంగళవారం స్టాక్‌ మార్కెట్లు సెలవు పాటించనున్నాయి. దీంతో ఈ వారంలో ట్రేడింగ్‌ నాలుగు రోజులకు పరిమితం కానున్నది.