ఆరు రోజుల ర్యాలీకి బ్రేక్‌

దేశీయ స్టాక్‌ మార్కెట్ల వరుస ర్యాలీకి బ్రేక్‌పడింది. మదుపరులు ప్రాఫిట్‌ బుకింగ్‌కు మొగ్గుచూపడం, అంతర్జాతీయ స్టాక్‌ మార్కెట్లు మిశ్రమంగా ట్రేడవడం కూడా పతనానికి ఆజ్యంపోశాయి. గ్లోబల్‌ మార్కెట్ల నుంచి వచ్చిన ప్రతికూల సంకేతాలతో చివరి గంటలో మదుపరులు అమ్మకాలకు మొగ్గుచూపారు.

• 400 పాయింట్లు నష్టపోయిన సెన్సెక్స్‌
• రికార్డు స్థాయి నుంచి నిఫ్టీ వెనక్కి

ముంబై, ఫిబ్రవరి 21: దేశీయ స్టాక్‌ మార్కెట్ల వరుస ర్యాలీకి బ్రేక్‌పడింది. మదుపరులు ప్రాఫిట్‌ బుకింగ్‌కు మొగ్గుచూపడం, అంతర్జాతీయ స్టాక్‌ మార్కెట్లు మిశ్రమంగా ట్రేడవడం కూడా పతనానికి ఆజ్యంపోశాయి. గ్లోబల్‌ మార్కెట్ల నుంచి వచ్చిన ప్రతికూల సంకేతాలతో చివరి గంటలో మదుపరులు అమ్మకాలకు మొగ్గుచూపారు. ఫలితంగా వరుసగా ఆరు రోజులుగా పెరుగుతూ వచ్చిన సూచీలు నష్టాల్లోకి జారుకున్నాయి.

లాభాల్లో ప్రారంభమైన సూచీలు సమయం గడుస్తున్న కొద్ది నష్టాల్లోకి జారుకున్నాయి. ఒక దశలో 73 వేల పైన కదలాడిన 30 షేర్ల ఇండెక్స్‌ సూచీ సెన్సెక్స్‌ ఇంట్రాడేలో 72,450 పాయింట్లకు జారిపోయింది. చివరకు 434.31 పాయింట్లు నష్టపోయి 72,623.09 వద్ద ముగిసింది. రికార్డు స్థాయిలో దూసుకుపోయిన నిఫ్టీ వెనక్కి తగ్గింది. ఇంట్రాడేలో మరో చారిత్రక గరిష్ఠ స్థాయిని తాకిన నిఫ్టీ చివరకు 141.90 పాయింట్లు నష్టపోయి 22,055 పాయింట్ల వద్ద ముగిసింది.

• ఎన్‌టీపీసీ 2.76 శాతం, పవర్‌గ్రిడ్‌ 2.71 శాతం పతనమయ్యాయి.
• వీటితోపాటు విప్రో, ఎల్‌అండ్‌టీ, టెక్‌ మహీంద్రా, ఇన్ఫోసిస్‌, హెచ్‌సీఎల్‌ టెక్నాలజీ, బజాజ్‌ ఫైనాన్స్‌, హెచ్‌డీఎఫ్‌సీ బ్యాంక్‌, బజాజ్‌ ఫిన్‌, టీసీఎస్‌ షేర్లు ఒక్క శాతం వరకు నష్టపోయాయి.
• కొటక్‌ బ్యాంక్‌, టైటాన్‌, ఐటీసీ, టాటా మోటర్స్‌, ఏషియన్‌ పెయింట్స్‌, యాక్సిస్‌ బ్యాంక్‌, భారతీ ఎయిర్‌టెల్‌, అల్ట్రాటెక్‌ సిమెంట్‌, రిలయన్స్‌ షేర్లు మదుపరులను ఆకట్టుకోలేకపోయాయి.
• కానీ, టాటా స్టీల్‌, ఎస్బీఐ, జేఎస్‌డబ్ల్యూ స్టీల్‌, ఇండస్‌ఇండ్‌ బ్యాంక్‌, మహీంద్రా, నెస్లె, సన్‌ఫార్మా, మారుతి, హెచ్‌యూఎల్‌, ఐసీఐసీఐ బ్యాంక్‌ల షేర్లు లాభాల్లో ముగిశాయి.
• 30 షేర్ల ఇండెక్స్‌లో 20 సూచీలు నష్టపోగా, పది సూచీలు లాభాల్లో ముగిశాయి.
• బీఎస్‌ఈ మిడ్‌క్యాప్‌ ఇండెక్స్‌ 1.27 శాతం పతనమవగా, స్మాల్‌క్యాప్‌ కూడా పతనం చెందాయి.
• రంగాలవారీగా చూస్తే యుటిలిటీ రంగ షేర్లు 2.10 శాతం తగ్గగా, ఆయిల్‌ అండ్‌ గ్యాస్‌ 1.78 శాతం, పవర్‌ 1.66 శాతం చొప్పున పతనం చెందాయి. టెక్‌, సర్వీసులు, క్యాపిటల్‌ గూడ్స్‌ రంగ షేర్లు కూడా దిగువకు పడిపోయాయి.

సూచీలు దిద్దుబాటులో ఉన్నాయి. గత కొన్ని రోజులుగా ఆకాశమే హద్దుగా దూసుకుపోయిన సూచీలు ప్రస్తుతం వెనక్కితగ్గుతున్నాయి. అమెరికా ఫెడరల్‌ రిజర్వు మినిట్స్‌ కోసం గ్లోబల్‌ మార్కెట్లు వేచి చూస్తున్నాయి. జనవరి నెలలో అమెరికా ద్రవ్యోల్బణం గరిష్ఠ స్థాయికి చేరుకోవడంతో త్వరలో ఫెడ్‌ వడ్డీరేట్లను తగ్గించే అవకాశాలున్నాయని పెట్టుబడిదారులు భావిస్తున్నారు.
– వినోద్‌ నాయర్‌, జియోజిట్‌ ఫైనాన్షియల్‌ సర్వీసెస్‌ రీసర్చ్‌ హెడ్‌