ఎల్ఐసీ ఐపీవోపై మదుపరుల చూపు
భారతీయ క్యాపిటల్ మార్కెట్ చరిత్రలోనే అతిపెద్ద పబ్లిక్ ఇష్యూకు రంగం సిద్ధమైంది. ప్రభుత్వ రంగ బీమా దిగ్గజం లైఫ్ ఇన్సూరెన్స్ కార్పోరేషన్ ఆఫ్ ఇండియా (ఎల్ఐసీ) స్టాక్ మార్కెట్లలోకి ప్రవేశిస్తున్నది. కేంద్ర ప్రభుత్వం 5 శాతం వాటాను విక్రయించడంలో భాగంగా ఎల్ఐసీ ఇనీషియల్ పబ్లిక్ ఆఫర్ (ఐపీవో)కు అనుమతి కోరుతూ మార్కెట్ రెగ్యులేటర్ సెబీకి ముసాయిదా ప్రాస్పెక్టస్ను సమర్పించింది. ప్రాథమిక అంచనాల ప్రకారం ఈ ఐపీవో ద్వారా రూ.65,000 కోట్లను ప్రభుత్వం సమీకరించనున్నది. షేర్ ధరల శ్రేణిని రూ.2,000-2,100గా నిర్ణయిస్తారని అంచనా. అంతేకాదు వచ్చే ఐదేండ్లలో ఎల్ఐసీలో ప్రభుత్వం వాటా 75 శాతానికి తగ్గించుకోవాలనుకుంటున్నది. దీంతో మున్ముందు ఎల్ఐసీ షేర్లు భారీగానే అమ్మకానికి రానున్నాయి. మొదటి 5 శాతం వాటాకే దేశీయ మార్కెట్లో మూడో అతిపెద్ద కంపెనీగా అవతరించనున్నది. నిఫ్టీ, సెన్సెక్స్లలో చేరిపోయే అర్హతలు లిస్టయినే వెంటనే వచ్చేస్తాయి.
66 శాతం వాటా
ఇన్సూరెన్స్ రంగాన్ని ప్రైవేటీకరించి 20 ఏైండ్లెనా.. ఎల్ఐసీ మార్కెట్ వాటా ఇప్పటికీ 66 శాతంగానే ఉన్నది. వ్యక్తిగత పాలసీల మార్కెట్లో ఎల్ఐసీ వాటా 75 శాతం. ఎల్ఐసీకి 1.3 లక్షల మంది ఏజెంట్లున్నారు. ఇది మొత్తం ప్రైవేట్ ఇన్సూరెన్స్ కంపెనీల ఏజెంట్లకన్నా ఏడు రెట్లు ఎక్కువ. దీని ఎంబెడెడ్ వాల్యూ రూ.5.4 లక్షల కోట్లు. ఎల్ఐసీ నిర్వహణలో ఉన్న ఆస్తుల విలువ ప్రస్తుతం రూ.10,14,000 కోట్లు. గత సెప్టెంబర్ నాటికి క్లెయిమ్ చేయని నిధుల విలువ రూ.21,539 కోట్లు. పాలసీ గడువు ముగిసిన తర్వాత కూడా క్లెయిమ్ మొత్తాలివి అని ప్రాస్పెక్టస్లో పేర్కొన్నది. స్టాక్ మార్కెట్లో ఎల్ఐసీ ప్రభావం చాలా ఎక్కువ. దేశీయ సంస్థాగత ఇన్వెస్టర్ల (డీఐఐ)లో అన్నింటికన్నా పెద్దది. మొత్తం రూ.10 లక్షల కోట్ల మేర వివిధ కంపెనీల షేర్లలో ఎల్ఐసీ మదుపు చేసింది. ఇది మొత్తం డీఐఐలు చేసిన దాంట్లో 30 శాతంతో సమానం. అలాగే మొత్తం మ్యూచువల్ ఫండ్లు నిర్వహిస్తున్న నిధుల్లో దాదాపు సగం. ఇంకా చెప్పాలంటే దేశీయ మార్కెట్ క్యాపిటలైజేషన్లో 4 శాతం ఎల్ఐసీ గుప్పిట్లోనే ఉన్నది. గత 42 త్రైమాసికాల్లో 24 త్రైమాసికాలు ఎల్ఐసీ ఈక్విటీ పెట్టుబడులు అత్యధిక రాబడులను ఇచ్చాయి. ప్రభుత్వ బాండ్ల లో 30 శాతం ఎల్ఐసీ కొనుగోలు చేసింది. ఎస్బీఐ రిటైల్ డిపాజిట్ల కన్నా ఎల్ఐసీకి ప్రీమియంల ద్వారా వస్తున్న మొత్తమే ఎక్కువ. నిజానికి ప్రతి భారతీయ కుటుంబం పొదుపు చేస్తున్న వంద రూపాయల్లో పది రూపాయలు ఎల్ఐసీ వద్దనే ఉన్నాయి.
డిస్కౌంట్ ఆఫర్
ఎల్ఐసీ పాలసీదారులకు ఐపీవోలో 10 శాతం వాటాను కేటాయించారు. దీంతోపాటే వారికి ఇష్యూ ధరలో 5-10 శాతం డిస్కౌంట్ను కూడా ఆఫర్ చేస్తున్నది. పాలసీదారులు తమ పాన్ నంబర్ను పాలసీతో లింక్ చేసుకోవాలి. డిమ్యాట్ అకౌంట్ తప్పనిసరి. ఇచ్చే షేర్లకు ఎలాంటి లాక్ ఇన్ పీరియడ్ ఉండదు. అలాగని ఇన్సూరెన్స్ ప్రీమియంలకు వచ్చే పన్ను ఆదా ప్రయోజనాలుండవు. ఒకవేళ పాలసీ ఉమ్మడిగా తీసుకున్నట్టయితే ఎవరో ఒకరే అర్హులు. యాన్యునిటీ చెల్లింపులు మొదలైన పాలసీదారులూ దరఖాస్తుకు అర్హులే. గరిష్ఠంగా 2 లక్షల వరకు మదుపు చేయవచ్చు. వచ్చిన దరఖాస్తులనుబట్టి షేర్ల కేటాయింపులుంటాయి.
ఇంతకీ కొనచ్చా?
షేర్ మార్కెట్ అంటేనే రిస్క్తో కూడుకున్న వ్యవహారం. పాలసీదారుని జీవితానికి ఎల్ఐసీ బీమా ఓ భద్రతను ఇస్తుంది. అలాగని ఎల్ఐసీ షేరు కచ్చితమైన రాబడి ఇస్తుందన్న గ్యారంటీ లేదు. రూ.2,100లకు ఆఫర్ చేస్తున్న షేర్లు లిస్టింగ్లోనే భారీ రాబడులు వస్తాయన్న అంచనాలు మార్కెటింగ్లో భాగంగా వస్తున్నవే. ఇంత పెద్ద ఇష్యూ సబ్స్ర్కైబ్ కావడం చాలా పెద్ద టాస్క్. పాలసీదారులకు రిటైల్ ఇన్వెస్టర్లకు కలిపి ఇష్యూలో దాదాపు 30 శాతం కేటాయించారు. సాధారణంగా ఇంత పెద్ద ఇష్యూలు లిస్టింగ్ తర్వాత రాబడులను ఇవ్వడం అరుదు. కాబట్టి లిస్టింగ్ లాభాల కోసమే అయితే ఐప్లె చేస్తే ఆ తర్వాత నిరాశే. కానీ 10 శాతం లాభాలు పాలసీదారులకు ఎల్ఐసీ చెల్లిస్తుంది. 2025 ఆర్థిక సంవత్సరం నుంచి ఎల్ఐసీ షేర్ హోల్డర్లకు కూడా 10 శాతం లాభాలను పంచి ఇవ్వనున్నది. ఇది దీర్ఘకాల షేర్హోల్డర్లకు కలిసొచ్చే అంశమే. కాబట్టి లిస్టింగ్ రాబడులను కాకుండా, దీర్ఘకాల రాబడుల కోసమే అయితే ఎల్ఐసీ పబ్లిక్ ఇష్యూ కోసం దరఖాస్తు
చేయడమే లాభదాయకం.
ఎల్ఐసీ ప్రీమియంకు ఈపీఎఫ్వో మనీ
ఎల్ఐసీ పాలసీదారులు ప్రీమియం చెల్లించేందుకు ఇక నుంచి ఈపీఎఫ్వో సొమ్ము ఉపయోగించవచ్చు. అయితే ఎల్ఐసీ పాలసీ రెండేండ్ల ప్రీమియంకు సమానంగా ఈపీఎఫ్ బ్యాలన్స్ ఉండాలి. ఉద్యోగం కోల్పోయి లేదా ఇతర కారణాలతో ఆర్థిక ఇబ్బందుల్లో ఉన్న పీఎఫ్ సబ్స్ర్కైబర్లు ఈ సదుపాయాన్ని ఉపయోగించుకోవచ్చు. ఎల్ఐసీ పాలసీ రద్దు కాకుండా ఉండేందుకే ఈ సదుపాయాన్ని వినియోగించుకోవాల్సి ఉంటుంది. ఇందుకోసం ఫామ్ 14ను ఈపీఎఫ్ఓ కార్యాలయంలో సమర్పించాలి. దాదాపు 6నెలల గడువు వరకు ప్రీమియం చెల్లింపులపై ఎల్ఐసీ ఎలాంటి జరిమానా విధించదు. ఆ తర్వాత మూడేండ్ల వరకు పాలసీ రెన్యువల్కు కొంత లేట్ ఫీజు చెల్లించాలి. మూడేండ్ల తర్వాత కూడా రెన్యువల్ చేయకపోతే పాలసీ పూర్తిగా రద్దవుతుంది. ఇలా జరగకుండా పాలసీ రెన్యువల్కు ఈపీఎఫ్వో సొమ్ము వాడుకోవచ్చు.