న్యూఢిల్లీ: కేంద్ర ప్రభుత్వ రంగ బ్యాంక్.. స్టేట్ బ్యాంక్ ఆఫ్ ఇండియా (ఎస్బీఐ)తోపాటు ప్రైవేట్ బ్యాంకర్ ఐసీఐసీఐ బ్యాంక్ ( ICICI Bank ) తన సర్వీస్ చార్జీలను ఆగస్టు నుంచి సవరించాలని నిర్ణయించుకున్నది. దేశీయ సేవింగ్స్ ఖాతాదారుల నగదు లావాదేవీలు, ఏటీఎం ఇంటర్ చేంజ్, చెక్బుక్ చార్జీలు సవరిస్తున్నట్లు తన వెబ్సైట్లో నోటీసు జారీ చేసింది. ఆదివారం నుంచి అమలులోకి రానున్న సవరించిన చెక్బుక్ చార్జీలు, ఏటీఎం క్యాష్ విత్ డ్రాయల్స్ చార్జీలు తెలుసుకుందాం..
ఐసీఐసీఐ రెగ్యులర్ సేవింగ్స్ ఖాతాదారులు దేశంలోని ఆరు మెట్రో నగరాల పరిధిలో నెలకు తొలి మూడు లావాదేవీలు మాత్రమే ఉచితం. ఇతర ప్రాంతాల్లో తొలి ఐదు లావాదేవీలు ఉచితం.
పరిధి దాటితే ఆర్థిక లావాదేవీలపై రూ.20, ఆర్థికేతర లావాదేవీలపై రూ.8.50 చొప్పున చార్జీ వసూలు చేస్తుంది.
ఐసీఐసీఐ బ్యాంక్ సేవింగ్స్ ఖాతాదారులు నెలలో నాలుగు క్యాష్ లావాదేవీలు ఉచితం. దాన్ని మించి జరిపే లావాదేవీలపై రూ.150 చార్జీ విధిస్తుంది.
వచ్చే నెల నుంచి ఐసీఐసీఐ బ్యాంక్ ఖాతాదారులు తమ సొంత శాఖలో నెలలో రూ.లక్ష వరకు ఉచితంగా డ్రా చేసుకోవచ్చు. ఆ పరిమితం దాటితే ప్రతి రూ.1000పై రూ.5 చొప్పున సర్వీస్ చార్జీ విధించనున్నట్లు తెలిపింది. కనీస చార్జీ రూ.150 ఉంటుంది.
ఇతర బ్రాంచీల్లో ప్రతిరోజూ రూ.25 వేల వరకు ఉచితం. రూ.25 వేలు దాటితే ప్రతి రూ.1000పై రూ.5 సర్వీస్ చార్జీ వసూలు చేస్తారు. కనీస చార్జీ రూ.150గా ఉంటుంది.
థర్డ్ పార్టీ లావాదేవీల్లోనూ ప్రతి రోజూ రూ.25 వేల వరకు ఉచితం. దాన్ని మించిన లావాదేవీలపై ఒక్కో థర్డ్ పార్టీ లావాదేవీకి రూ.150 చార్జీ విధిస్తారు.
ఐసీఐసీఐ బ్యాంకు సేవింగ్స్ ఖాతాదారులు ప్రతిఏటా ఉచితంగా 25 పేయబుల్ చెక్ లీవ్స్ ఉచితంగా పొందొచ్చు. అంతకు మించితే ప్రతి 10 లీవ్స్ అదనపు చెక్బుక్పై రూ.20 వసూలు చేస్తుంది.
సీనియర్ సిటిజన్లు, యంగ్ స్టార్, స్మార్ట్ స్టార్ ఖాతాదారులకు ప్రతి రోజూ రూ.25 వేల వరకు థర్డ్ పార్టీ లావాదేవీలు యధాతథంగా చేసుకోవచ్చు. వీటిపై సర్వీస్ చార్జీలు ఉండవు.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి
బంగారానికి ఫుల్ గిరాకీ.. ఎంతంటే?!
సక్సెస్ఫుల్గా ఐటీ ఈ-ఫైలింగ్ పోర్టల్.. 25.82 లక్షల ఐటీఆర్స్ దాఖలు