రెండోరోజూ అదే జోరు

పడిలేచిన కెరటంలా దూసుకుపోతున్నాయి దేశీయ స్టాక్‌ మార్కెట్లు. వరుసగా రెండోరోజు గురువారం కూడా సూచీలు భారీగా లాభపడ్డాయి. ఎన్‌డీఏ కూటమి సులువుగా అధికారం చేపట్టే అవకాశాలుండటంతో మదుపరులు ఎగబడి కొనుగోళ్లు జరిపారు.

• సెన్సెక్స్‌ 693, నిఫ్టీ 289 పాయింట్ల లాభం

ముంబై, జూన్‌ 6: పడిలేచిన కెరటంలా దూసుకుపోతున్నాయి దేశీయ స్టాక్‌ మార్కెట్లు. వరుసగా రెండోరోజు గురువారం కూడా సూచీలు భారీగా లాభపడ్డాయి. ఎన్‌డీఏ కూటమి సులువుగా అధికారం చేపట్టే అవకాశాలుండటంతో మదుపరులు ఎగబడి కొనుగోళ్లు జరిపారు. ఫలితంగా 30 షేర్ల ఇండెక్స్‌ సూచీ తిరిగి 75 వేల మార్క్‌ను అధిగమించింది. మార్కెట్‌ ముగిసే సమయానికి సెన్సెక్స్‌ 692.27 పాయింట్లు ఎగబాకి 75,074.51 వద్ద ముగిశాయి. ఇంట్రాడేలో 915 పాయింట్ల వరకు లాభపడిన సూచీ చివర్లో ఈ లాభాలను నిలుపుకోలేకపోయింది. మరో సూచీ నిఫ్టీ 201.05 పాయింట్లు అందుకొని 22,821.40 వద్ద నిలిచింది. నిలకడైన ప్రభుత్వం అధికారంలోకి రాబోతుండటంతో మార్కెట్లలో పాజిటివ్‌ దోరణి కనిపించిందని జియోజిట్‌ ఫైనాన్షియల్‌ సర్వీసెస్‌ హెడ్‌ వినోద్‌ నాయర్‌ తెలిపారు.

• రంగాలవారీగా చూస్తే రియల్టీ 4.85 శాతం, ఇండస్ట్రీయల్స్‌ 3.69 శాతం, పవర్‌ 2.87 శాతం, ఐటీ 2.86 శాతం, యుటిలిటీ 2.52 శాతం, ఎనర్జీ 2.34 శాతం చొప్పున పెరిగాయి.
• టెక్‌ మహీంద్రా, హెచ్‌సీఎల్‌ టెక్నాలజీ, ఎస్బీఐ, ఎన్‌టీపీసీ, ఇన్ఫోసిస్‌, లార్సెన్‌ అండ్‌ టుబ్రో, టీసీఎస్‌, విప్రో షేర్లు లాభపడ్డాయి.
• హెచ్‌యూఎల్‌, ఏషియన్‌ పెయింట్స్‌, మహీంద్రా అండ్‌ మహీంద్రా, ఇండస్‌ఇండ్‌ బ్యాంక్‌, సన్‌ఫార్మా షేర్లు నష్టపోయాయి.
• గత రెండు సెషన్లలో సెన్సెక్స్‌ 2,995.46 పాయింట్లు లేదా 4.15 శాతం, నిఫ్టీ 4 శాతం లాభపడింది.

21 లక్షల కోట్లు పెరిగిన సంపద

స్టాక్‌ మార్కెట్లు వరుస లాభాల్లో దూసుకుపోతుండటంతో లక్షల కోట్ల మదుపరుల సంపద పెరిగింది. వరుసగా రెండు రోజుల్లో రూ.21 లక్షల కోట్ల మేర పెరిగింది. దీంతో బీఎస్‌ఈలో లిైస్టెన కంపెనీల మార్కెట్‌ విలువ రూ.21,05,298.11 కోట్లు పెరిగి రూ.4,15,89,003.38 కోట్లకు (4.98 ట్రిలియన్‌ డాలర్లు) చేరుకున్నది.