బీవోబీ గృహ రుణాలు చౌక

ప్రభుత్వ రంగ బ్యాంకింగ్‌ సంస్థ బ్యాంక్‌ ఆఫ్‌ బరోడా (బీవోబీ).. గృహ రుణాలపై శుక్రవారం వడ్డీరేట్లను తగ్గించింది. 25 బేసిస్‌ పాయింట్లు (పావు శాతం) తగ్గిస్తూ నిర్ణయం తీసుకున్నది. దీంతో హోమ్‌ లోన్లపై బ్యాంక్‌ వడ్డీరేటు 8.25 శాతానికి దిగింది. అంతేగాక ఈ పరిమితకాల ఆఫర్‌ కింద ప్రాసెసింగ్‌ ఫీజును కూడా రద్దు చేస్తున్నట్టు బ్యాంక్‌ ఈ సందర్భంగా ప్రకటించింది

• పావు శాతం తగ్గించిన బ్యాంక్‌

ముంబై, నవంబర్‌ 11: ప్రభుత్వ రంగ బ్యాంకింగ్‌ సంస్థ బ్యాంక్‌ ఆఫ్‌ బరోడా (బీవోబీ).. గృహ రుణాలపై శుక్రవారం వడ్డీరేట్లను తగ్గించింది. 25 బేసిస్‌ పాయింట్లు (పావు శాతం) తగ్గిస్తూ నిర్ణయం తీసుకున్నది. దీంతో హోమ్‌ లోన్లపై బ్యాంక్‌ వడ్డీరేటు 8.25 శాతానికి దిగింది. అంతేగాక ఈ పరిమితకాల ఆఫర్‌ కింద ప్రాసెసింగ్‌ ఫీజును కూడా రద్దు చేస్తున్నట్టు బ్యాంక్‌ ఈ సందర్భంగా ప్రకటించింది. ఇదిలావుంటే హోమ్‌ లోన్‌ మార్కెట్‌లో ప్రధాన సంస్థలైన ఎస్బీఐ, హెచ్‌డీఎఫ్‌సీ కంటే కూడా బీవోబీ వడ్డీరేటు ఇప్పుడు తక్కువగా ఉండటం గమనార్హం.

ఈ రెండు సంస్థల్లో గృహ రుణాలపై కనిష్ఠ వడ్డీరేటు 8.4 శాతంగా ఉన్నది. కాగా, సవరించిన వడ్డీరేటు రాబోయే సోమవారం నుంచి అమల్లోకి వస్తుందని బీవోబీ తెలియజేసింది. అలాగే ఈ స్పెషల్‌ రేటు డిసెంబర్‌ ఆఖరుదాకానే అందుబాటులో ఉంటుందని బీవోబీ మార్ట్‌గేజ్‌, రిటైల్‌ ఆస్తుల విభాగం జనరల్‌ మేనేజర్‌ హెచ్‌టీ సోలంకి స్పష్టం చేశారు. ఇతర బ్యాంకులు లేదా ఆర్థిక సంస్థల నుంచి గృహ రుణాలను తమ బ్యాంకుకు మార్చుకునే కస్టమర్లకూ ఈ తక్కువ వడ్డీరేటు ఉంటుందని చెప్పారు. అయితే క్రెడిట్‌ స్కోర్‌ బాగుంటేనే వర్తిస్తుందన్నారు.