నారు దశ.. జాగ్రత్తలే రక్ష..

అన్నదాతలు యాసంగి సాగులో బిజీబిజీగా గడుపుతున్నారు. నార్లు పోసుకొని, పొలాలను దున్నుకొని సిద్ధం చేస్తున్నారు. యాసంగి వ్యవసాయ పనుల్లో నిమగ్నమయ్యారు. నార్లు అలకడం, దుక్కులు దున్నడం వంటి పనుల్లో తీరికలేకుండా ఉంటున్నారు.

• యాసంగిలో వంగడాల ఎంపికే కీలకం
• చలి తీవ్రతతో నారు దెబ్బతినే ప్రమాదం
• రైతులు జాగ్రత్తలు పాటించాలి

దస్తురాబాద్‌, డిసెంబర్‌ 18 : అన్నదాతలు యాసంగి సాగులో బిజీబిజీగా గడుపుతున్నారు. నార్లు పోసుకొని, పొలాలను దున్నుకొని సిద్ధం చేస్తున్నారు. యాసంగి వ్యవసాయ పనుల్లో నిమగ్నమయ్యారు. నార్లు అలకడం, దుక్కులు దున్నడం వంటి పనుల్లో తీరికలేకుండా ఉంటున్నారు. రోజురోజుకూ పెరుగుతున్న చలి తీవత్రతో నారుమడులను రక్షించుకోవాల్సిన అవసరం ఎంతైనా ఉంది. రాత్రి ఉష్ణోగ్రతలు 12 డిగ్రీల సెల్సియస్‌ కంటే తగ్గినా, చలి తీవ్రత ఎక్కువైనా నారు పెరుగుదలపై ప్రభావం పడుతుంది. మడుల్లో నారు ఎదకపోవడం, ఆకులు పసుపు, ఎరుపు రంగుల్లోకి మారే ప్రమాదం ఉంది. కొన్నిసార్లు వరి నారు పెరుగక ఎర్రబడి ఎండిపోయే అవకాశం ఉంది. తగు జాగ్రత్తలు తీసుకుంటేనే నారు ఎదుగుతుంది. అధిక దిగుబడి సాధించవచ్చు. నారుమడి ప్రత్యేక యాజమాన్య పద్ధతులు పాటించాలని రైతులకు వ్యవసాయ అధికారులు సూచిస్తున్నారు.

స్వల్పకాలిక రకాలే మేలు..

యాసంగి సాగులో ప్రస్తుత వాతావరణ పరిస్థితులు, నీటి లభ్యతను దృష్టిలో పెట్టుకొని స్వల్ప కాలిక రకాలైన (120-130 రోజుల పంట కాలం) కూనారం సన్నాలు (కేఎన్‌ఎం-118), బతుకమ్మ (జేజీఎల్‌-18047), ఎంటీయూ-1010 (కాటర్‌దొర సన్నాలు), ఐఆర్‌-64, భద్రకాళి(డబ్ల్యూ జీఎల్‌-3962), తెల్ల హంస వంటి రకాల విత్తనాలను ఎంచుకోవాలి. వీటి సాగుతో మంచి దిగుబడులు సాధించవచ్చని వ్యవసాయ అధికారులు పేర్కొంటున్నారు.

నారుమడి యాజమాన్యం..

యాసంగిలో నారుమడికి ప్రత్యేక శ్రద్ధ అవసరం. మడిని 10-15 రోజుల వ్యవధిలో మూడు దఫాలుగా దమ్ము చేసి చదును చేసుకోవాలి. నారుమడిలో సేంద్రియ ఎరువులైన కోళ్లు, గొర్రెల మలం, వర్మీ కంపోస్టు ఎరువును రెండు గుంటల నారుమడికి 2 క్వింటాళ్లు వేసుకొని కలియదున్నుకోవాలి. సేంద్రియ ఎరువులు వాడడంతో వాతావరణంలో నారు త్వరగా ఎదుగుతుంది. రెండు గుంటల నారుమడికి రెండు కిలోల నత్రజని (ఒక కిలో విత్తనం చల్లే ముందు, మరో కిలో వి త్తనం 12-14 రోజులకు), 2 కిలోల భాస్వరాన్ని రెట్టిం పు మోతాదులో, కిలో పొటాష్‌ను వేసుకోవాలి.

రైతులు చేపట్టాల్సిన సంరక్షణ చర్యలు..

• రైతులు చలికి తట్టుకునే వరి వంగడాలను ఎంపిక చేసుకోవాలి.
• నారుమడిలో మండె కట్టిన విత్తనాలను వేయడం తప్పనిసరిగా అలవాటు చేసుకోవాలి.
• రాత్రి వేళలో నీరు నిల్వ ఉంచి, ఉదయం ఆ నీరు తీసేయాలి.
• పగటి పూట వెచ్చని నీరు పెట్టి, సాయంత్రం తీసేయాలి.
• చలి సమస్యలను అధిగమించడానికి ఒక అడుగు ఎత్తులో వెదురుబద్ధలతో, ఇనుప చువ్వలతో ఊతం ఇచ్చి పైన పలుచని పాలిథిన్‌ షీట్‌ లేదా కల్లాల పట్టాలతో నారుమడి మీద కప్పి ఉంచి మరుసటి రోజు ఉదయం తీసివేయాలి.
• రాత్రి ఉష్ణోగ్రతలు 10 డిగ్రీల కంటే తగ్గినప్పుడు చలి తీవ్రత పెరిగి నారు ఎర్రబడడం, సరిగ్గా ఎదగకపోవడం పంట కాలం పెరిగిపోవడం, పోషక లోపాలు వంటివి ఏర్పడుతాయి. జింక్‌ లోపంతో ఈ లక్షలు కనిపించే అవకాశం ఉంది. జింక్‌ లోపంతో ఆకులపై పచ్చని తుప్పు మచ్చలు ఏర్పడుతాయి. కాబట్టి నివారణకు జింక్‌ సల్ఫేట్‌ 2 గ్రాములు లీటర్‌ నీటిలో కలిపి పిచికారీ చేయాలి.
• నారు ఆరోగ్యంగా పెరగడానికి పైపాటుగా యూరియా వేస్తున్నప్పుడు ఒక కిలో యూరియాకి 2 గ్రాముల కార్బెండిజమ్‌, మాంకోజెబ్‌ మిశ్రమ మందును పిచికారీ చేయాలి.
• చలి తీవ్రత ఎక్కువగా ఉంటే స్వర్ణఫాల్‌/ఫార్మూలా-4 వంటి సూక్ష్మపోషకాల మిశ్రమాన్ని 5 రోజుల వ్యవధిలో 2 సార్లు పిచికారీ చేయాలి.
• కాండం తొలుచు పురుగు బారి నుంచి కాపాడుకోవడానికి, నారు తీయడానికి వారం రోజుల ముందు 5 సెంట్ల నారుమడికి 800 గ్రాముల కార్బోప్యూరాన్‌ 3జీ గుళికలు ఎకరాకు సరిపడే నారుమడికి ఒక కిలో చొప్పున చల్లాలి.
• చలి తీవ్రత ఎక్కువ ఉండి మంచుతో కూడిన వాతావరణం ఉంటే అగ్గి తెగులు ఆశించకుండా ముందు జాగ్రత్తగా ట్రైసైక్లోజాల్‌ 0.6 గ్రాములు లీటర్‌ నీటికి కలిపి పిచికారీ చేయాలి.
  ఈ పద్ధతులు పాటిస్తే ఆరోగ్యవంతమైన నారుతో అధిక దిగుబడులు సాధించుకోవచ్చని వ్యవసాయాధికారులు సూచిస్తున్నారు.

జాగ్రత్తలు తప్పనిసరిగా తీసుకోవాలి

వరి నారుపైన చలి ప్రభావం పడకుండా రైతులు తప్పనిసరిగా జాగ్రత్తలు తీసుకోవాలి. చలి తీవ్రత అధికంగా ఉండడంతో నారు ఎదుగుదల తక్కువగా ఉంటుంది. మంచు ప్రభావంతో నారు చనిపోయే ప్రమాదం ఉన్నది. నారుమడిపై పాలిథిన్‌ కవర్‌ను కప్పి ఉంచాలి. నారు ఎదగకపోవడంతో పాటు తెగుళ్లు, నారు చనిపోయే ప్రమాదం ఉంటుంది. ఉదయం, సాయంత్రం ఎప్పటికప్పుడు నీటిని మార్చుతూ ఉండాలి. వ్యవసాయ అధికారుల సూచనలు, సలహాలు పాటించి నారుమడులను కాపాడుకోవాలి.
– జాడి తిరుపతి, ఏఈవో, దస్తురాబాద్‌ క్లస్టర్‌