రోగులు ఫుల్‌.. సేవలు నిల్‌

ఏడు నెలల నుంచి ఖాళీ అయిన వైద్యుల పోస్టుల భర్తీపై ప్రస్తుత కాం గ్రెస్‌ సర్కారు దృష్టి సారించకపోవడం పేదలకు శాపంగా మారుతున్నది. నిర్మల్‌ జిల్లావ్యాప్తంగా ప్రస్తుతం సీజనల్‌ వ్యాధులు విజృంభిస్తుండడంతో ప్రభుత్వ ఆసుపత్రులన్నీ రోగులతో కిటకిటలాడుతున్నాయి.

• సర్కారు దవాఖానల్లో వైద్యుల కొరత
• పేదలకు అందని వైద్య సేవలు
• జిల్లా ఆసుపత్రిలో 95 పోస్టులు ఖాళీ
• ప్రసూతి దవాఖానలో గైనకాలజిస్టుల కొరత
• పట్టించుకోని కాంగ్రెస్‌ ప్రభుత్వం

నిర్మల్‌, ఆగస్టు 13(నమస్తే తెలంగాణ) : ఏడు నెలల నుంచి ఖాళీ అయిన వైద్యుల పోస్టుల భర్తీపై ప్రస్తుత కాం గ్రెస్‌ సర్కారు దృష్టి సారించకపోవడం పేదలకు శాపంగా మారుతున్నది. నిర్మల్‌ జిల్లావ్యాప్తంగా ప్రస్తుతం సీజనల్‌ వ్యాధులు విజృంభిస్తుండడంతో ప్రభుత్వ ఆసుపత్రులన్నీ రోగులతో కిటకిటలాడుతున్నాయి. జిల్లా కేంద్రంలోని ప్రధాన ఆసుపత్రితోపాటు ప్రసూతి ఆసుపత్రి, భైంసా, ఖానాపూర్‌ పట్టణాల్లోని ఏరియా ఆసుపత్రులకు ప్రతిరోజు వందల సంఖ్యలో బాధితులు వైద్య చికిత్సల కోసం బారులు దీరుతున్నారు. ముఖ్యంగా డెంగీ, టైఫాయిడ్‌, విష జ్వరాలతో అనేక మంది బాధపడుతున్నారు. అయితే వైద్యుల కొరత కారణంగా ఆయా ఆసుపత్రుల్లో రోగులకు పూర్తి స్థాయిలో చికిత్సలు అందడం లేదు.

• భైంసా ఏరియా ఆసుపత్రిలో మొత్తం 29 మంది వైద్యులకు ప్రస్తుతం 20 మంది మాత్రమే చికిత్స అందిస్తున్నట్లు తెలిసింది. మిగతా వారిలో కొందరు డిప్యూటేషన్‌పై ఇతర ప్రాంతాలకు వెళ్లగా, మరి కొందరు వైద్యులు సెలవులో ఉన్నట్లు చెబుతున్నారు. అయితే ఇక్కడి ఆసుపత్రికి రోజు భైంసా పట్టణంతోపాటు చుట్టు పక్కల గ్రామాల నుంచి వైద్య పరీక్షల కోసం 600 నుంచి 700 మంది రోగులు వస్తుంటారు. రోగుల సంఖ్యకు అనుగుణంగా వైద్యులు అందుబాటులో లేకపోవడంతో బాదితులకు పూర్తి స్థాయిలో వైద్య సేవలు అందడం లేదంటున్నారు.
• జిల్లా కేంద్రమైన నిర్మల్‌లో ప్రభుత్వ మెడికల్‌ కళాశాల ప్రధాన ఆసుపత్రితోపాటు ప్రసూతి ఆసుపత్రిలో రోగులకు వైద్య సేవలు అందుతున్నాయి. ఆయా ఆసుపత్రుల్లో గత కేసీఆర్‌ ప్రభుత్వ హ యాంలోనే రోగులకు అవసరమైన అన్ని రకాల సదుపాయాలను కల్పించారు. అత్యాధునిక సదుపాయాలు అందుబాటులోకి రావడంతో పదేళ్లలో అ న్ని వర్గాల ప్రజలకు ఇక్కడి ప్రభుత్వ ఆసుపత్రుల్లో కార్పొరేటు స్థాయి వైద్యం ఉచితంగా అందింది.ఇక్కడి ప్రధాన ఆసుపత్రిలో ఏర్పాటు చేసిన టీ-డయాగ్నోస్టిక్‌ హబ్‌, డయాలసిస్‌ సెంటర్‌, పాలియేటివ్‌ కేర్‌ సెంటర్‌లతోపాటు వెంటిలేటర్‌ సదుపాయంతో కూడిన ఐసీయూ, సీటీ స్కాన్‌ సదుపాయాలు రోగులకు అందుతున్నప్పటికీ, డాక్టర్ల కొర త వేధిస్తున్నదని చెబుతున్నారు. ప్రభుత్వ ప్రసూతి ఆసుపత్రికి చికిత్సల కోసం ప్రతిరోజు 300-400 మంది మహిళలు వివిధ ఆరోగ్య సమస్యలతో వస్తుంటారు. ఇక్కడ ఉండాల్సిన 12 మంది స్త్రీ వైద్య నిపుణులకు కేవలం నలుగురు డాక్టర్లు మాత్ర మే అందుబాటులో ఉన్నారు. దీంతో ఇక్కడ అరకొర వైద్యం మాత్రమే అందుతున్నట్లు విమర్శలు ఉన్నాయి. అలాగే జిల్లా ప్రధాన ఆసుపత్రికి సైతం ప్రతిరోజు 1200-1300 మంది రోగులు చికిత్సల కోసం వస్తుంటారు. మెడికల్‌ కళాశాలకు అనుబంధంగా ఉన్న ఇక్కడి ఆసుపత్రిలో మొత్తం165 మం ది డాక్టర్లకు కేవలం 70 మంది మాత్రమే ఉన్నారు. ఏకంగా ఇక్కడి ఆసుపత్రిలో 95 డాక్టర్‌ పోస్టులు ఖాళీగా ఉన్నాయి. దీంతో రోజు ఇక్కడికి పెద్ద సం ఖ్యలో వచ్చే రోగులకు తూతూ మంత్రంగానే వైద్య సేవలు అందుతున్నట్లు ఫిర్యాదులు ఉన్నాయి.
• ఖానాపూర్‌ పట్టణంలోని ఏరియా ఆసుపత్రిలో అడుగడుగునా సమస్యలే దర్శనమిస్తున్నాయి. ఇక్కడి ఆసుపత్రిలో పారిశుధ్య నిర్వహణ అస్తవ్యస్తంగా ఉందంటున్నారు. రోగులకు సరిపడా బెడ్లు కూడా అందుబాటులో లేకపోవడంతో ఒకే బెడ్‌పై ఇద్దరు రోగులను ఉంచి చికిత్సలు అందిస్తున్నారు. ఎక్స్‌ రే, సీబీపీ పరికరాలు పని చేయకపోవడంతో రోగులు ప్రైవేటులో డబ్బులు ఖర్చు చేసి పరీక్షలు చేయించుకుంటున్నారని సమాచారం. టీబీ, హెచ్‌ఐవీ పరీక్షల కోసం శాంపిళ్లను సేకరించి నిర్మల్‌లోని టీ-హబ్‌కు పంపడం వల్ల ఫలితాలు ఆలస్యమై చికిత్సలు అందడంలో జాప్యం జరుగుతున్నదని రోగులు వాపోతున్నారు. ప్రతిరోజు వందలాది మంది బాధితులు సీజనల్‌ వ్యాధులతో బాధపడుతూ చికిత్సల కోసం ఇక్కడి ఆసుపత్రికి వస్తుండగా, సరైన సదుపాయాలు లేని కారణంగా పూర్తి స్థాయిలో వైద్యం అందడం లేదంటున్నారు. ఇటీవలే ఇక్కడి ఆసుపత్రిలో కాలం చెల్లిన స్లైన్‌ బాటిల్‌ను రోగికి ఎక్కించిన ఘటన సంచలనంగా మారిన సంగతి తెలిసిందే.