నాడు అద్భుతం..నేడు అస్తవ్యస్తం..

యేడాది క్రితం వరకు పచ్చని పల్లె ప్రకృతి వనాలు, ఊరికో ట్రాక్టర్‌, చెత్త సెగ్రిగేషన్‌ షెడ్లు, ఎక్కడికి వెళ్లినా అద్దంలా మెరిసే రహదారులు.. ఇదీ కేసీఆర్‌ పాలనలో గ్రామాల పరిస్థితి. ప్రతినెలా పంచాయతీల నిర్వహణకు ప్రత్యేక ని ధులు కేటాయించారు. దేశవ్యాప్తంగా కేంద్ర ప్రభుత్వం అన్ని రాష్ర్టాల్లోని గ్రామ పంచాయతీలను పరిశీలించి అవార్డులు ప్రకటిస్తే.. అందులో పన్నెండు అవార్డులు మన పల్లెలకే వచ్చాయి.

• గ్రామా పంచాయతీలపై ప్రత్యేక దృష్టి సారించని కాంగ్రెస్‌ సర్కారు
• ప్రత్యేక అధికారుల పాలనకు ఏడాది పూర్తి
• పడకేసిన పారిశుధ్యం.. ఎండిపోతున్న పల్లె ప్రకృతి వనాలు..
• నిర్వహణ లేని సెగ్రిగేషన్‌ షెడ్లు, ట్రాక్టర్లు
• ఒక్కో అధికారికి రెండు, మూడు గ్రామాల బాధ్యతలు
• ఉమ్మడి జిల్లాలో ఏ గ్రామంలో చూసినా ఇదే దుస్థితి

మంచిర్యాల, ఫిబ్రవరి 20(నమస్తే తెలంగాణ ప్రతినిధి) : యేడాది క్రితం వరకు పచ్చని పల్లె ప్రకృతి వనాలు, ఊరికో ట్రాక్టర్‌, చెత్త సెగ్రిగేషన్‌ షెడ్లు, ఎక్కడికి వెళ్లినా అద్దంలా మెరిసే రహదారులు.. ఇదీ కేసీఆర్‌ పాలనలో గ్రామాల పరిస్థితి. ప్రతినెలా పంచాయతీల నిర్వహణకు ప్రత్యేక ని ధులు కేటాయించారు. దేశవ్యాప్తంగా కేంద్ర ప్రభుత్వం అన్ని రాష్ర్టాల్లోని గ్రామ పంచాయతీలను పరిశీలించి అవార్డులు ప్రకటిస్తే.. అందులో పన్నెండు అవార్డులు మన పల్లెలకే వచ్చాయి.

గ్రామాలంటే తెలంగాణలో ఉన్నట్లు ఉండాలంటూ.. అద్భుతమైన పల్లె పాలనకు కేసీఆర్‌ సర్కారు నిదర్శనం అంటూ యావత్‌ దేశం కీర్తించింది. ఇవన్నీ చేస్తూనే ఏడాదికోసారి పల్లె ప్రగతి కార్యక్రమంతో ప్రాణమంతా పల్లెలపైనే పెట్టి కేసీఆర్‌ సర్కారు పని చేసింది. కానీ.. కాంగ్రెస్‌ అధికారంలోకి వచ్చిన ఏడాదిలోనే పరిస్థితి తారుమారైంది. గ్రామ పంచాయతీలకు వచ్చే నెలవారి నిధులు ఆగిపోయాయి.

15వ ఆర్థిక సంఘం నిధుల మంజూరు నిలిచింది. దీంతో పాలన కూనారిల్లింది. నిధులు లేక, నిర్వహణ పట్టించుకునే నాథుడు లేక పల్లె ప్రకృతి వనాలన్నీ ఎండిపోయాయి. పచ్చదనంతో కళకళలాడిన ప్రకృతి వనాల్లో ఇప్పుడు మొండి మొక్కలు కనిపిస్తున్నాయి. నిర్వహణ లేక సెగ్రిగేషన్‌ షెడ్లు పాడైపోతున్నాయి. కిస్తీలు కట్టలేక గ్రామ పంచాయతీల్లోని ట్రాక్టర్లు మూలకు పడుతున్నాయి. ఉమ్మడి ఆదిలాబాద్‌ జిల్లాలో ఏ పల్లె చూసినా దాదాపు ఇదే దుస్థితి కనిపిస్తున్నది.

పర్యవేక్షణ లోపం.. కార్యదర్శిపైనే భారం..

పంచాయతీ పాలక వర్గాల గడువు ముగిసి ఏడాది దాటింది. కులగణన మరోసారి చేస్తామని ప్రభుత్వం ప్రకటించడంతో ఎన్నికలు వాయిదా పడనున్నాయి. ఇప్పటికే ఏడాది కాలంలో పంచాయతీల్లో ప్రత్యేక అధికారుల పాలన నడుస్తున్నది. కాకపోతే ఒక్కో అధికారికి మూడు, నాలుగు గ్రామాలు అప్పగించడంతో పనిభారం ఎక్కువైంది. మండలాధికారులకు బాధ్యతలు ఇవ్వడంతో పర్యవేక్షణ లోపించింది. మరోవైపు మండల పరిషత్‌లకు జిల్లా అధికారులను ఇన్‌చార్జిలుగా నియమించారు.

దీంతో గ్రామ, మండల స్థాయిలో ఇబ్బందులు తప్పడం లేదు. సమావేశాలు, సంతకాలకే పరిమితమవ్వాల్సిన దుస్థితి నెలకున్నది. దీనికి తోడు నిధుల లేమి, పర్యవేక్షణలోపం, పాలన వ్యవహారాలు చూసేవారు కరవై జనాలు అవస్థలు పడుతున్నారు. నిధులు రాకపోవడం, ప్రత్యేక అధికారులు పట్టించుకోకపోవడంతో పంచాయతీల నిర్వహణ భారం కార్యదర్శులపైనే పడుతున్నది.

పారిశుధ్య నిర్వహణ, తాగునీటి సరఫరా, ట్రాక్టర్లు, ట్యాంకర్ల మెయింటెనెన్స్‌, తాగునీటి పథకాలకు మరమ్మతు, పైపులైన్‌ లీకేజీలు, వీధి దీపాలకు మరమ్మతులు అన్ని పనులకు కార్యదర్శి బేజుల్లో నుంచి సొంత డబ్బులు వెచ్చించాల్సి వస్తున్నది. నిధుల కొరతతో పారిశుధ్య కార్మికులకు వేతనాలు ఇవ్వడం కష్టంగా మారింది. ట్రాక్టర్‌, ట్యాంకర్‌, పల్లె ప్రకృతి వనాలు వీటన్నింటని సొంత డబ్బులతో చూసుకోలేకపోతున్నామని పంచాయతీ కార్యదర్శులే వాపోతున్నారు. ఎన్నికల విషయం దేవుడెరుగు ముందు పంచాయతీలకు నిధులు ఇవ్వాలంటూ వేడుకుంటున్నారు.

గ్రామాలను వేధిస్తున్న సమస్యలు..

• నిధులు లేక పల్లె ప్రకృతి వనాలు, బృహత్‌ ప్రకృతి వనాల నిర్వహణ కుంటుపడింది. పల్లె ప్రకృతి వనాల్లో ఏర్పాటు చేసిన బోర్డులు తప్ప మొక్కలు కనిపించడం లేదు.
• క్రీడా ప్రాంగణాల నిర్వహణ సరిగా లేదు. పలుచోట్ల క్రీడాప్రాంగాణాలను దున్ని సాగు చేస్తున్నారు. క్రీడా ప్రాంగణాల్లో అమర్చిన పరికరాలు తుప్పుపట్టి పాడైపోతున్నా పట్టించుకునే నాథుడు లేడు.
• కేంద్ర, రాష్ట్ర ప్రభుత్వాల నుంచి నిధులు రాకపోవడంతో గత ప్రభుత్వం ఇచ్చిన ట్రాక్టర్లు, ట్యాంకర్లకు కిస్తీలు కట్టలేకపోతున్నారు.
• పారిశుధ్య నిర్వహణ గగనంగా మారింది. గతంలో పల్లెలకు పంపిణీ చేసిన చెత్త డబ్బాలు పాడైపోగా కొత్తవి కొనలేని దుస్థితి. చెత్త సేకరించేందుకు ట్రాక్టర్లకు డీజిల్‌ పోయించే పరిస్థితి లేదు. దీంతో రోడ్లపై ఎక్కడిచెత్త అక్కడే కనిపిస్తున్నది.
• తడిచెత్త, పొడిచెత్తను వేరుచేసే సిగ్రిగేషన్‌ షెడ్ల నిర్వహణ లేదు. దీంతో అవి అసాంఘిక కార్యక్రమాలకు అడ్డాలుగా మారుతున్నాయి.
• పాడైపోయిన వీధి దీపాల స్థానంలో కొత్తవి బిగించలేని పరిస్థితి.