భూ దందా ఆగేనా..!

‘మేం గుంట చొప్పున భూమి అమ్ముతాం. రిజిస్ట్రేషన్‌ కూడా చేపిస్తాం. లే-అవుట్‌ అవసరం లేదు. ఫామ్‌ల్యాండ్స్‌ మీద పెట్టుబడి పెట్టండి. మీ భూమిలో ఎర్రచందనం, శ్రీగంధం చెట్లు పెట్టిస్తాం.

• ఐదు గుంటల్లోపు భూముల రిజిస్ట్రేషన్లపై నజర్‌.. పలు ఆదేశాలు
• కేవలం ఇంటి నంబర్‌తో రిజిస్ట్రేషన్‌ చేయడం ఇక కుదరదు
• ప్రభుత్వ, అసైన్డ్‌, పట్టా.. ఇలా ఏ భూముల్లో నిర్మాణమున్నా ధ్రువపత్రం తప్పనిసరి
• సబ్‌ రిజిస్ట్రార్‌లకు సందేహాలుంటే రెవెన్యూ అధికారులను సంప్రదించాల్సిందే
• తహసీల్దార్లకు, సబ్‌రిజిస్ట్రార్లకు హుకుం
• లబోదిబోమంటున్న వ్యాపారులు
• ‘రియల్‌’ మోసాలపై కలెక్టర్‌ కుమార్‌ దీపక్‌ సీరియస్‌

మంచిర్యాల, జనవరి 9 (నమస్తే తెలంగాణ ప్రతినిధి) : ‘మేం గుంట చొప్పున భూమి అమ్ముతాం. రిజిస్ట్రేషన్‌ కూడా చేపిస్తాం. లే-అవుట్‌ అవసరం లేదు. ఫామ్‌ల్యాండ్స్‌ మీద పెట్టుబడి పెట్టండి. మీ భూమిలో ఎర్రచందనం, శ్రీగంధం చెట్లు పెట్టిస్తాం. లక్షల రూపాయలతో మీరు ఇప్పుడు కొనుగోలు చేసే గుంట స్థలం.. కొన్నేళ్లకు మిమ్ములను కోటీశ్వరులను చేస్తుంది. గుంట భూమి కొంటే చాలు. గజానికి రూ.ఐదు వేల నుంచి రూ.6 వేలు మాత్రమే మీ పెట్టుబడి. మా దగ్గర భూమి కొన్నోళ్లకు ఎన్నో ఆఫర్లు ఉన్నాయి. వారం రోజుల్లో సగం డబ్బులు చెల్లిస్తే లక్కీడ్రా తీస్తాం. కారు, స్కూటీలు, బంగారం గెలుచుకోవచ్చు.’

అని తీయని మాటలతో కస్టమర్ల గొంతులు కోసే ఫామ్‌ల్యాండ్స్‌ దందా జిల్లాలో జోరుగా సాగుతున్నది. నిబంధనల ప్రకారం ఫామ్‌ల్యాండ్స్‌ గుంటల చొప్పున రిజిస్ట్రేషన్‌ చేయడానికి లేదు. కానీ అధికారులకు ఆమ్యామ్యాలు ముట్టజెప్పి నాలా కన్వర్షన్‌ చేయించుకునో, ఇంటి నంబర్లు సృష్టించో.. ఎలాగోలా రిజిస్ట్రేషన్‌ చేపించడం, కస్టమర్లను బురిడీ కొట్టించడం పరిపాటిగా మారింది. ఎకరం భూమి రూ. ఐదు నుంచి రూ. పది లక్షలకు కొనడం, ఫామ్‌ల్యాండ్స్‌ పేరిట గుంటకు రూ. ఐదు లక్షల నుంచి రూ. పది లక్షలకు అమ్మడం.. ప్రభుత్వానికి రావాల్సిన ఆదాయానికి ఎగనామం పెట్టి కోట్లు సంపాదించుకోవడం జరుగుతున్నది. ఇక కొందరు రియల్టర్లు పట్టా భూముల పక్కనున్న అసైన్డ్‌ భూములు, ప్రభుత్వ భూములను సైతం రిజిస్ట్రేషన్లు చేయిస్తున్నారు.

పట్టణ ప్రాంతాల్లో కొందరు ప్రబుద్ధులు అసైన్డ్‌, ప్రభుత్వ భూములకు ఇంటి నంబర్లు తీసుకొని దర్జాగా సబ్‌ రిజిస్ట్రార్‌ కార్యాలయాల్లో రిజిస్ట్రేషన్లు చేయించుకుంటున్నారు. దీంతో ప్రభుత్వ ఆదాయానికి గండి పడడంతో పాటు విలువైన ప్రభుత్వ భూముల, అసైన్డ్‌ భూములు కోల్పోవాల్సి వస్తుంది. ఈ నేపథ్యంలో ఈ అంశాలను కలెక్టర్‌ కుమార్‌ దీపక్‌ సీరియస్‌గా తీసుకున్నారు. ఇలాంటి భూ మోసాలకు చెక్‌ పెట్టాలనే ఉద్దేశంతో ఐదు గుంటల్లోపు భూములను రిజిస్ట్రేషన్‌ చేసేటప్పుడు అన్ని డాక్యుమెంట్స్‌ ఉంటేనే చేయాలంటూ తహసీల్దార్లకు ఈ నెల 4న ఆదేశాలు జారీ చేశారు. ఇదే తరహాలో గత నెలలో సబ్‌ రిజిస్ట్రార్‌లపై సైతం సూచనలు చేశారు.

లబోదిబోమంటున్న వ్యాపారులు..

కలెక్టర్‌ ఆదేశాలతో అక్రమార్కులతో పాటు కొందరు రియల్‌ ఎస్టేట్‌ వ్యాపారుల గుండెల్లో దడ పుడుతున్నది. గడిచిన ఏడాది కాలంగా రిజిస్ట్రేషన్లు లేక పెట్టిన పెట్టుబడి మొత్తం ఆగిపోయి నానా ఇబ్బందులు పడుతున్నారు. తాజాగా కలెక్టర్‌ ఆదేశాల నేపథ్యంలో ఇక తమ భూముల రిజిస్ట్రేషన్లు కావని భయపడుతున్నారు. ముఖ్యంగా ఫామ్‌ల్యాండ్స్‌ వ్యాపారానికి పేరుగాంచిన జైపూర్‌ మండలంలో పెట్టుబడి పెట్టిన రియల్టర్లు తలలు పట్టుకుంటున్నారు.

మండలంలో నర్వా, టేకుమట్ల, షెట్‌పల్లి, రాసూల్‌పల్లి, ఇందారం గ్రామాల్లో ఫామ్‌ల్యాండ్స్‌ వ్యాపారులకు ఈ నిర్ణయం కొత్త కష్టాలను తీసుకురానున్నది. ఇప్పుడేదో అధికారులను మేనేజ్‌ చేసుకొని అతికష్టంగా నెలకు ఒకటీ.. రెండు రిజిస్ట్రేషన్లు చేసుకుంటున్నామని.. గత నాలుగు రోజులుగా అది కూడా చేయడం లేదంటున్నారు. ఇన్నాళ్లూ సహకరించిన అధికారులు కూడా చేతులెత్తేస్తున్నారని వాపోతున్నారు. నిబంధనలకు విరుద్ధమని తెలిసినా నాలా కన్వర్షన్‌ పేరుతో ఎలాగోలా రిజిస్ట్రేషన్లు చేసిన కొందరు తహసీల్దార్లకు ఇప్పుడు ఈ వ్యవహారం మింగుడుపడడం లేదు.

అసలు కలెక్టర్‌ ఇకపై చేసే డాక్యుమెంట్ల వివరాలు అడగకుండా.. గడిచిన ఏడాదిలో చేసిన రిజిస్ట్రేషన్లపై నివేదిక తీసుకుంటే భూముల రిజిస్ట్రేషన్లలో జరుగుతున్న అక్రమాలు బయటికి వచ్చే అవకాశం ఉందని నిపుణులు అభిప్రాయపడుతున్నారు. గత రిజిస్ట్రేషన్లను పరిశీలించి నిబంధనలకు వ్యతిరేకంగా పని చేసిన అధికారులపై చర్యలు తీసుకోవాలని డిమాండ్‌ చేస్తున్నారు.

కలెక్టర్‌ ఆదేశాలు ఇలా..

• ఐదు గుంటల్లోపు రిజిస్ట్రేషన్‌ చేసేప్పుడు అన్ని డాక్యుమెంట్లు తహసీల్దార్‌ తప్పనిసరిగా సరిచూసుకోవాలి.
• చిన్న విస్తీర్ణాలు (ఐదు గుంటల లోపు)చేసిన రిజిస్ట్రేషన్లపై ప్రతి నెలా కలెక్టర్‌కు నివేదిక సమర్పించాలి.
• నాలా కన్వనర్షన్‌, హౌస్‌ సైట్స్‌, ఇప్పటికే ఉన్న నిర్మాణాలు, అనధికారిక లేవుట్‌లలో చేసే రిజిస్ట్రేషన్లు ఇల్లీగల్‌ లేఅవుట్‌లను పెరగడానికి, న్యాయపరమైన ఇబ్బందులకు దారి తీస్తున్నాయి. చిక్కులు వస్తున్నాయి. ఈ విషయంలో తహసీల్దార్లు ఎవరూ నిబంధనలు అతిక్రమించకూడదు.
• సబ్‌రిజిస్ట్రార్లు సర్వే నంబర్‌ లేకుండా ఇంటి నంబర్‌తో డాక్యుమెంట్లు రిజిస్ట్రేషన్‌ చేయడంతో ప్రభుత్వ భూములు, అసైన్డ్‌ భూములు ఆక్రమణకు గురవుతున్నాయి. అలా కాకుండా సబ్‌రిజిస్ట్రార్లు రెవెన్యూ, మున్సిపాలిటీ అధికారులతో సమన్వయం చేసుకోవాలి.
• డాక్యుమెంట్‌ రిజిస్ట్రేషన్‌ చేసేటప్పుడు అందులోని సర్వే నంబర్‌ ఆధారంగా అది రెవెన్యూ రికార్డుల్లో ప్రొహిబిటెడ్‌ లిస్ట్‌(నిషేధిత జాబితా)లో ఉందా లేదా చూసుకోవాలి. ఈ విషయంలో ఏమైనా సందేహాలుంటే సంబంధిత తహసీల్దార్లను సంప్రదించి క్లారిటీ తీసుకోవాలి.
• సబ్‌ రిజిస్ట్రార్‌ ఇలా రెఫర్‌ చేసిన డాక్యుమెంట్లను తహసీల్దార్‌ పరిశీలించి నేచర్‌ ఆఫ్‌ ల్యాండ్‌ (ఆ ప్రాపర్టీ ప్రభుత్వ భూమిలో ఉందా, అసైన్డ్‌ భూమిలో ఉందా లేక పట్టా భూమిలో ఉందా) ఎంక్వైరీ చేసి 48 గంటల్లో సబ్‌రిజిస్ట్రార్‌ రిపోర్ట్‌ ఇవ్వాలి.
• ఒకవేళ పట్టాభూమి కాకుండా అసైన్డ్‌ లేదా ప్రభుత్వ భూమిలో ఉంటే ఆ డాక్యుమెంట్‌ రిజిస్ట్రేషన్‌ చేయొద్దు.
• కేవలం హౌస్‌ నంబర్లతో రిజిస్ట్రేషన్‌ చేయడానికి వీలులేదు. ఇంటి నంబర్‌తో పాటు ప్లింత్‌ ఏరియా (ఇంటి నిర్మాణ విస్తీర్ణం)పై సంబంధిత మున్సిపాలిటీ లేదా గ్రామపంచాయతీ ధ్రువీకరణ పత్రాలు ఉంటేనే చేయాలి.
• సబ్‌ రిజిస్ట్రార్లు, తహసీల్దార్లు ఈ నిబంధనలు అతిక్రమిస్తే శాఖాపరమైన క్రమశిక్షణ చర్యలు తీసుకోవడంతో పాటు క్రిమినల్‌ కేసులు నమోదు చేస్తారు.