వేసవి వేడి.. పొట్టకు చేటు!

ఎండలు మండిపోతున్నాయి. భానుడి భగభగలు, వేసవి వేడి.. మనుషుల్ని ఉక్కిరిబిక్కిరి చేస్తున్నాయి. ముఖ్యంగా.. పెరుగుతున్న ఉష్ణోగ్రతలు పొట్టకు చేటు చేస్తున్నాయి. డీహైడ్రేషన్‌తోపాటు ఆహారపు అలవాట్లు కూడా.. అనేక ఆరోగ్య సమస్యలను తెచ్చిపెడుతున్నాయి.

ఎండలు మండిపోతున్నాయి. భానుడి భగభగలు, వేసవి వేడి.. మనుషుల్ని ఉక్కిరిబిక్కిరి చేస్తున్నాయి. ముఖ్యంగా.. పెరుగుతున్న ఉష్ణోగ్రతలు పొట్టకు చేటు చేస్తున్నాయి. డీహైడ్రేషన్‌తోపాటు ఆహారపు అలవాట్లు కూడా.. అనేక ఆరోగ్య సమస్యలను తెచ్చిపెడుతున్నాయి. వాంతులు, విరేచనాలతోపాటు మరిన్ని వ్యాధులూ చుట్టుముడుతున్నాయి. వీటిని తట్టుకోవాలంటే.. ఆహారం విషయంలో జాగ్రత్తలు పాటించాల్సిందే!

• వేసవిలో అధిక మసాలాలు, కారంగా ఉండే ఆహారం.. పొట్ట ఆరోగ్యంపై ప్రతికూల ప్రభావం చూపుతుంది. జంక్‌ ఫుడ్‌, ఫాస్ట్‌ఫుడ్స్‌ లాంటివి అజీర్ణం, గ్యాస్‌ సమస్యలను పెంచుతాయి. కాబట్టి, వేసవిలో పొట్ట ఆరోగ్యంగా ఉండాలంటే.. సులభంగా జీర్ణమయ్యే ఆహారాన్నే ఎంచుకోవాలి. గంజి, సలాడ్స్‌, సూప్‌.. ఈకాలంలో ఎక్కువగా తీసుకోవాలి. ఇవి జీర్ణక్రియను మెరుగుపరుస్తాయి.
• వానకాలంలోనే కాదు.. వేసవిలోనూ బ్యాక్టీరియా, వైరస్‌లు వేగంగా వ్యాప్తి చెందుతాయి. ముఖ్యంగా నీళ్లు, ఆహారం ద్వారా పొట్ట ఇన్ఫెక్షన్లకు కారణం అవుతాయి. ఫలితంగా కడుపు నొప్పి, వాంతులు, విరేచనాలు ఇబ్బంది పెడతాయి. కాబట్టి, వేసవిలో ఆహార పరిశుభ్రత పాటించడం
  చాలా ముఖ్యం.
• వేసవిలో ఆహారం త్వరగా పాడయ్యే అవకాశం ఉంటుంది. కాబట్టి, పొట్ట ఆరోగ్యంగా ఉండాలంటే.. బయటి ఆహారానికి దూరంగా ఉండటమే మంచిది. ఇక వేసవిలో నమోదయ్యే అధిక ఉష్ణోగ్రతలు.. జీర్ణవ్యవస్థపై ప్రతికూల ప్రభావం చూపుతాయి. దాంతో ఆహారం సరిగ్గా జీర్ణమవ్వదు. ఈ సమస్యకు.. ఇంటి వంటతోనే చెక్‌ పెట్టొచ్చు.
• వేసవిలో వేధించే మరో సమస్య.. డీహైడ్రేషన్‌. అధిక చెమట వల్ల శరీరం నీటిని కోల్పోతుంది. ఫలితంగా కడుపు తిమ్మిర్లు, మలబద్ధకం, ఇతర సమస్యలు వస్తాయి. వేసవిలో శరీరం సరిగ్గా పనిచేయాలంటే.. ఎక్కువ నీరు అందించాలి. కాబట్టి ప్రతిరోజూ కనీసం 8-10 గ్లాసుల నీరు తాగాలి.
• వేసవి వేడి, ఉక్కపోత.. మానసికంగానూ ఒత్తిడి పెంచుతాయి. దీంతో శరీరంతోపాటు జీర్ణక్రియపైనా ప్రతికూల ప్రభావం పడుతుంది. యోగా, ధ్యానం, తేలికపాటి వ్యాయామం చేయడం వల్ల.. ఒత్తిడిని తగ్గించుకోవచ్చు. జీర్ణక్రియను మెరుగుపర్చుకోవచ్చు.