Folk singer mounika yadav | ‘పుష్ప’లో ‘ సామీ సామీ ( Saami Saami )’ సూపర్ హిట్టు. జానపద గాయని మౌనిక యాదవ్ ఈ పాట పాడింది . మౌనికపై వాళ్ల అక్క ప్రభావం ఎక్కువ. తన పేరు పద్మావతి. ఇద్దరిదీ ఉద్యమ నేపథ్యమే. చరిత్రలో నిలిచిపోయే పాటలెన్నో పాడింది పద్మావతి. అసలు, ఆ అక్కాచెల్లెళ్లు పాటకు ఎలా దగ్గరైండ్రు? పాటను ఎలా ప్రజల్లోకి తీసుకెళ్లిండ్రు?.. ఆ ముచ్చట్లన్నీ అక్క మామిండ్ల పద్మావతి ( Folk singer Padmavati ) మాటల్లోనే..
మాది గోదావరిఖని. బాల్యం నుంచీ పాటలంటే ఇష్టం. గోదావరిఖనిలోనే పదివరకు చదివిన. ఇక్కడి పరిసరాలు, ప్రజల జీవనశైలి భిన్నంగా ఉంటయి. అది కూడా నాపై ప్రభావం చూపించింది. బడిలో జరిగే ప్రతి ప్రోగ్రామ్లో నా పాట వినిపించేది. హెడ్మాస్టర్ విజయానంద్ సార్ నా ఆసక్తిని గమనించిండ్రు. దయా నర్సింగ్ అన్న అప్పటికే పేరున్న కళాకారుడు. ఆయన దగ్గరికి పంపిండ్రు మా సార్. నాన్న మల్లయ్య రైస్మిల్లులో హమాలీ. అమ్మ శ్యామల. ఏదైనా పని దొరికితే వెళ్తుండె. నాన్న ఒక్కరోజు మిల్లుకు వెళ్లకపోయినా పూట గడవకపోయేది. అందుకే, వేదికల మీద పాడాలని ఉన్నా నాన్నతో చెప్పలేదు. దయా నర్సింగన్ననేమో ‘గొంతు బాగుంది, పాడే విధానమూ బాగుంది. వచ్చి పాడు. నలుగురిని చూస్తుంటె తెలుస్తది’ అన్నడు. అవకాశం అయితే దొరికింది గానీ నాన్న ఏమంటడో అని అడగడానికి వెనకముందు అయ్యేదాన్ని. ఒకరోజు ధైర్యంజేసి అడిగిన. తలకాయ ఊపిండు. దాని అర్థం వెళ్లమనా, వద్దనా అన్నది అర్థంకాలేదు. అమ్మతో చెప్పినట్టుండు. ‘ఏదో ప్రోగ్రామ్కి వెళ్తా అన్నవంట. నాన్న మిల్లుకు వెళ్లకపోతే కష్టం కదా పద్మా. నీకు తెలియని ముచ్చటనా?’ అని అమ్మ సున్నితంగా చెప్పింది. నాన్న మళ్లీ ఆలోచించినట్టుండు.. ‘పాటల మీద ఖాయిష్తోటి వెళ్తా అంటుంది. వెళ్లనీ. మంచిగా పాడి మంచి పేరు తెచ్చుకుంటే అదే చాలు మనకు’ అని పచ్చజెండా ఊపిండు. అప్పటి నుంచి పని వదిలేసి మాతో పాటు వస్తుండె.
అప్పుడు నేను ఏడో తరగతి. ఒకవైపు బడి, మరోవైపు ఉద్యమం. గద్దరన్న, విమలక్క లాంటి పెద్దలు గళం విప్పి పాట ద్వారా ఉద్యమ ఆవశ్యకతను వినిపిస్తున్నరు. నర్సింగ్ అన్న ‘రేపట్నుంచి మనం కూడా వాళ్లతో కలిసి పాడాలె’ అన్నప్పుడు నాకు మస్తు సంబురమైంది. తొలుత నమ్మబుద్ధి కాలేదు. చిన్న వయసులోనే తెలంగాణ గళం వినిపిస్తున్నవని గద్దరన్న, విమలక్క మెచ్చుకున్నరు. గద్దరన్న అయితే నాతో ప్రత్యేకంగా ఆడి పాడిండ్రు. నేను వెళ్తుంటే నాతోపాటు చెల్లె వచ్చేది. నన్ను చూసి పాట నేర్చుకున్నది, ఆట నేర్చుకున్నది. ఒకే స్టేజీ మీద ఒకే పాటతో.. మౌనిక, నేను ఆడి పాడుతుంటే చూసినోళ్లు ‘శభాష్’ అంటుండె.
నా పదో తరగతి పూర్తయ్యేనాటికి కుటుంబ పరిస్థితులు ఏమాత్రం బాగాలేవు. ఊళ్లో ఉండొద్దని అనుకున్నం. గోదావరిఖని నుంచి కమలాపూర్ మండలం కానిపర్తికి వచ్చేసినం. అమ్మానాన్న కష్టానికి ఫలితం ఉండాలన్న కసితో పాటకు పదును పెట్టిన. నేను పాడిన ‘వీరులారా వందనం విద్యార్థి అమరులారా వందనం’, “మీ త్యాగాల తెలంగాణ జెండా ఎత్తుకున్నమో విద్యార్థి వీరుల్లారా’ పాటలు ఉద్యమాన్ని ఉరకలెత్తించినందుకు గర్వంగా ఉంది. ఈ రెండూ ఒరిజినల్ రికార్డింగ్లో పాడింది నేనే. ఉద్యమంలో పాల్గొంటూనే జమ్మికుంట కాకతీయ కాలేజీలో డిగ్రీ చేసిన. 2019లో పెండ్లి అయ్యింది. మా ఆయన పేరు నరేశ్. అమ్మానాన్నల లెక్కనే ఆయన కూడా ఎంకరేజ్ చేస్తడు.
మొదటి నుంచీ ఉద్యమ, సామాజిక గీతాలే పాడుతుండటంతో జానపదాల వైపు కొంత ఆలస్యంగా వచ్చిన. ఉద్యమ గాయనిగా నాకు మంచి గుర్తింపు ఉంది. జానపదం పాడితే కూడా అంతే గుర్తింపు ఉండాలని ఆలస్యం చేసిన. ‘తెలంగాణ జాగృతి’ తీసిన మొదటి ‘బతుకమ్మ పాట’ ఆల్బమ్లో ‘చిత్తూ చిత్తుల బొమ్మ’ పాడే అవకాశం కల్పించిండ్రు కవితక్క. రాష్ట్రం వచ్చినంక ముఖ్యమంత్రి చేతులమీదుగా తెలంగాణ ఉద్యమ గాయని అవార్డు అందుకున్న. ఆ తర్వాత సాంస్కృతిక సారథిలో ఉద్యోగం రావడంతో యూట్యూబ్లో పాడలేదు. నేను కాంపిటీషన్స్లో పాడిన పాటలు ఇప్పటికీ యూట్యూబ్లో హల్చల్ చేస్తున్నయి. అలాంటి వాటిలో ఒకటి ‘నాయీ దొరో నా సిన్నిదొరా రాజన్నా.. సిలకల మొఖం సిన్నబాయెరో రాజన్నా.. హంసల మొఖం వాడిపోయె రాజన్నా’ పాట. ‘దాని కుడి భుజమ్మీద కడువా’ పాట కూడా ఎక్కువగా పాడేదాన్ని. చెల్లె మౌనికకు ‘పుష్ప’ సినిమాలో ‘అమ్మీ అమ్మీ అంటాంటె నీ పెళ్లాన్నైపోయినట్టుందిరా సామీ.. నా సామీ’ పాట పాడే అవకాశం రావడం గొప్ప విషయం. నాతో పాటు అడుగులేసిన చెల్లెను నాకంటే ముందే సక్సెస్ వరించడం గర్వంగా ఉంది. నేనూ జానపదానికి పదునుపెట్టి మంచి పాటలు అందించే ప్రయత్నం చేస్తా. అవకాశం వస్తే మౌనికలా సినిమాల్లోనూ పాడుతా.
మేం పాడుతున్నవన్నీ పెద్ద కార్యక్రమాలే. కానీ ఒకటో, రెండో పాటలకు అవకాశం వస్తుండె. కార్యక్రమం మొత్తం పాడే అవకాశం వస్తే బాగుండని అనుకున్న సమయంలో గద్దరన్న నిర్మల్లో పెద్ద ప్రోగ్రామ్ పెట్టిండ్రు. నాకూ, చెల్లె మౌనికకు అవకాశం కల్పించిండ్రు. కానీ మా దగ్గర ప్రయాణ ఖర్చులు కూడా లేవు. నాన్న ఎక్కడెక్కడో ప్రయత్నాలు చేసిండు. రూపాయి కూడా పుట్టలేదు. తెల్లారితే ప్రోగ్రామ్. అమ్మ ఏమనుకున్నదో ఏమో. నన్నూ, చెల్లెనూ పిలిచింది. ‘మీరేం ఫికర్ చేయకుండ్రి. నాన్న తీసుకెళ్తడు. నేనూ తోడుగా వస్తా. ధైర్యంగా ఉండుండ్రి’ అని భరోసా ఇచ్చింది. ఏం చేసిందో ఏమో నాకైతే తెల్వదు. ప్రోగ్రామ్ అయిపోయి ఇంటికొచ్చినంక తెలిసింది.. అమ్మ తన చెవి కమ్మలు కుదువబెట్టి.. ఆ డబ్బుతో మమ్మల్ని ప్రోగ్రామ్కి తీసుకెళ్లిందని. ఒకింత గర్వంగా, ఒకింత బాధగా అనిపించింది.
✍ దాయి శ్రీశైలం
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి
పుష్పలో సామీ సామీ పాట పాడే అవకాశం మౌనిక యాదవ్కు ఎలా వచ్చిందంటే..
విదేశాలకూ తెలంగాణ రుచులను అందిస్తున్న కరీంనగర్ మహిళలు
మూడేండ్ల క్రితం దాకా టీ పెట్టడం కూడా రాదు.. కానీ ఇప్పుడు మాస్టర్ చెఫ్
sheela bajaj | 78 ఏండ్ల వయసులో వ్యాపారం మొదలుపెట్టిన బామ్మ
వైకల్యం వారి ప్రతిభకు అడ్డం కాలేదు.. మోడలింగ్లో దూసుకెళ్తున్న కేరళ యువతులు
పిల్లలను ఎప్పుడు స్కూల్కు పంపించాలి.. విరించి హాస్పిటల్స్ చైర్పర్సన్ స్వీయ అనుభవం ఏంటంటే..
అతని ఎత్తు మూడు అడుగులే.. కానీ ఆత్మవిశ్వాసం ఆకాశమంత..
Ira singhal | దివ్యాంగురాలైనా ఆమె ఎంతోమందికి ఇన్స్పిరేషన్.. ఐఏఎస్ సాధించడమే కాదు..