zirconium | న‌గ‌లంటే బంగార‌మే.. ఈ లోహంతో త‌యారుచేసిన ఆభ‌ర‌ణాలే ఇప్పుడు ట్రెండింగ్‌

January 7, 2022 / 04:35 AM IST

Zirconium | కళ్లు జిగేల్‌మనిపించే నగలు వేసుకుని నలుగురిలో మెరిసిపోవాలని ప్రతి ఒక్కరూ ఆశపడతారు. అందుకు తగినట్టు వజ్రాలు, రాళ్లు, రత్నాలు పొదిగిన నగలు కొనాలంటే మాత్రం అందరికీ సాధ్యపడదు. అలాంటి వారికోసమే రకరకాల లోహాలతో చేసిన కొత్తకొత్త నగలు పుట్టుకొస్తున్నాయి. జిగేల్‌ మెరుపులతో ఆధునిక మగువల మనసు దోచుకుంటున్న జిర్కోనియం నగల ధగధగలేంటో చూద్దాం..

ఆభరణాలంటే బంగారంతో చేసినవి అనేది పాతమాట. ఇప్పుడు రకరకాల లోహాలతో చేసిన నగలు బంగారాన్ని మించిన మెరుపుతో ఫ్యాషన్‌ ప్రపంచాన్ని ఏలుతున్నాయి. అసలైన ఆభరణాలకు ఏమాత్రం తీసిపోని ఈ నగల నిగనిగలకు దాసోహమంటున్నారు ఈ తరం అతివలు. సంప్రదాయంతోపాటు నాగరికతను మేళవించిన జిర్కోనియం ఆభరణాలు ధరించేందుకు మోజుపడుతున్నారు. మిగతా లోహాలతో పోలిస్తే దీనికి దృఢత్వం ఎక్కువ. అందుకే దీన్ని కృత్రిమ దంతాలు, కృత్రిమ ఎముకల తయారీలో వాడుతారు. దీని మెరుపు, దృఢత్వం కారణంగా ప్రస్తుతం నగల తయారీలోనూ భాగమవుతున్నది.

అన్నిరంగుల్లోనూ..

జిర్కోనియం, టైటానియం ఖనిజాలను సోదర ధాతువులుగా పరిగణిస్తారు. వీటి మిశ్రమంతో తయారుచేసిన నగలు దృఢంగా ఉంటాయి. నిజానికి ముడి జిర్కోనియం ఏ రంగునూ కలిగి ఉండదు. కానీ దీన్ని వివిధ లోహాలతో వివిధ ప్రక్రియల్లో రసాయనిక చర్య జరపడం వల్ల నలుపు, తెలుపు, నీలం, ఊదా.. ఇలా రకరకాల వర్ణాల్లోకి మారుతుంది. ఫలితంగా తక్కువ ధరలోనే వినూత్నమైన నగలు అందుబాటులోకి వస్తున్నాయి. జాతిరత్నాలకు తీసిపోని రాళ్లను పొదిగిన రంగురంగుల నగలు ఇప్పుడు ఫ్యాషన్‌ ప్రపంచంలో ట్రెండ్‌ సృష్టిస్తున్నాయి. ఎక్కువగా వీటికి రోజ్‌గోల్డ్‌, వజ్రాలు జతచేసి పెండ్లి, నిశ్చితార్థం ఉంగరాలను తయారు చేస్తున్నారు.

నలుపు జతగా..

ఆడవాళ్ల ఆభరణాల్లో నలుపురంగుది ప్రత్యేకస్థానం. దిష్టి తగలకుండా ఒంటిమీద ఏదో ఒక నలుపు ఆభరణాన్ని ధరిస్తారు. అయిదోతనానికి గుర్తుగా మంగళసూత్రంలోనూ నల్లపూసలు జతచేస్తారు. అందుకే జిర్కోనియంతోనూ నలుపు రంగు ఆభరణాలు తయారుచేస్తున్నారు. ఉంగరాలు, గాజులు, బ్రేస్‌లెట్లు, వాచ్‌బెల్టులు, సన్నటి గొలుసులు.. ఇలా ఒకటేమిటి ఆపాదమస్తకం అలంకరించుకునే అన్ని ఆభరణాలూ సిద్ధం చేస్తున్నారు.

వెండికి బదులు..

ఆభరణాల తయారీలో వెండికి బదులుగా జిర్కోనియాన్ని ఎక్కువగా వాడతారు. మెరుపు కారణంగా ఎంత చిన్న నగ అలంకరించుకున్నా అందరిలోనూ ఆకట్టుకునేలా తళుక్కుమంటారు. తేలికగా ఉండటం వల్ల ఎన్ని నగలు వేసుకున్నా, ఎంత పెద్ద ఆభరణమైనా ఇబ్బంది ఉండదు. సంప్రదాయ దుస్తులపై ధరించేందుకు వీలుగా పెద్దపెద్ద చోకర్లు, హారాలతోపాటు వెస్ట్రన్‌వేర్‌పై నప్పేలా సన్నటి, చిన్నచిన్న నగలూ అందుబాటులో ఉన్నాయి. పైనుంచి కిందివరకు ఒకే థీమ్‌తో అలంకరించుకునేలా కాంబో ఆఫర్లు కూడా ఆకట్టుకుంటున్నాయి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి