snatch bun | స్నాచ్ బ‌న్ కొప్పు వేసుకోవడం అంత క‌ష్ట‌మా?

December 25, 2021 / 04:35 AM IST

Snatch bun hair style | కేశాలంకరణలో కొప్పు ఎవరికైనా నప్పుతుంది. ఓ ఐదు దశాబ్దాలు వెనక్కి వెళ్తే ఒప్పుల కొప్పుతో ఆనాటి భామలు వయ్యారాలు పోయేవారు. పూర్తిగా కనుమరుగు కాకపోయినా కొప్పుల ట్రెండ్‌ కొంత మసకబారిందనే చెప్పవచ్చు. మళ్లీ ఈ మధ్య కాలంలో ‘స్నాచ్‌ బన్‌’ కొప్పులు ఇంతుల నెత్తిన సొంపులతో ఒప్పారుతున్నాయి. సెలబ్రిటీ పార్టీల్లో ఇద్దరు, ముగ్గురు తప్పనిసరిగా ఈ స్నాచ్‌ బన్‌లతో కనిపిస్తున్నారు. పండుగ పూట కొప్పు కొత్త అందాన్ని తీసుకొస్తుంది. అయితే ఇది అందంగా నప్పాలంటే కొంచెం కష్టపడాల్సిందే!

వాలుజడను మూడుసార్లు తిప్పి ముడివేసుకుంటే సరిపోదు. కొప్పు కుదురుగా ఉండాలంటే ఓర్పు చాలా అవసరం. ఇటీవల కొందరు బాలీవుడ్‌ సెలబ్రిటీలు ఈ స్నాచ్‌ బన్‌తో ఎదుర్కొన్న ఇబ్బందుల గురించి సామాజిక మాధ్యమాల్లో పంచుకున్నారు. హెయిర్‌ స్టయిలిస్ట్‌ నమ్రతా సోనీ ఈ విషయంపై పెట్టిన పోస్ట్‌ వైరల్‌ అయింది. ‘ఈ స్నాచ్‌ బన్‌ చాలా బిగుతుగా ఉండాలి. దాంతో జుట్టు లాగుతున్నప్పుడు కొంచెం నొప్పిగా ఉంటుంది. అలాగే కొప్పు దృఢంగా ఉండాలంటే రకరకాల స్ప్రే, జెల్స్‌ వాడాల్సి ఉంటుంది. కొప్పు వేసిన కొద్దిసేపటి వరకు, విప్పిన తర్వాత ఐదు నిమిషాల వరకు కొందరిలో తలనొప్పి ఉంటుంది. ఇవన్నీ పక్కనబెడితే, స్నాచ్‌ బన్‌కి ఉన్న ఆకర్షణ అంతాయింతా కాద’ని అందులో చెప్పుకొచ్చింది. రాణి ముఖర్జీ, దిశా పటానీ, సోనమ్‌కపూర్‌ వంటి సెలబ్రిటీలకు నమ్రత హెయిర్‌ స్టయిలిస్ట్‌గా పని చేస్తున్నది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి