Heart Attack | హృద్రోగులకు గడ్డుకాలంగా శీతకాలం.. వ్యాయామం త‌ప్ప‌నిస‌రి

Heart Attack | చలితో గుండె లయ తప్పుతున్నది. శీతకాలం హృద్రోగులకు గడ్డుకాలంగామారుతున్నది. మొత్తంగా శరీర వ్యవస్థపై చలి ప్రతికూల ప్రభావం చూపుతున్నది. ఆ దెబ్బకు ఆరోగ్యవంతులు సైతం గుండె పోటుకు గురి అవుతున్నారు. బయటి

Heart Attack | చలితో గుండె లయ తప్పుతున్నది. శీతకాలం హృద్రోగులకు గడ్డుకాలంగామారుతున్నది. మొత్తంగా శరీర వ్యవస్థపై చలి ప్రతికూల ప్రభావం చూపుతున్నది. ఆ దెబ్బకు ఆరోగ్యవంతులు సైతం గుండె పోటుకు గురి అవుతున్నారు. బయటి ఉష్ణోగ్రతలు తగ్గిపోయినప్పుడు రక్తనాళాల్లో పలు మార్పులు చోటు చేసుకోవడం వల్ల గుండెపోటు సమస్యలు ఉత్పన్నం అవుతున్నాయని నిపుణులు హెచ్చరిస్తున్నారు.

చలి కాలానికి గుండెకు విడదీయరాని సంబంధం ఉంది. చలి అంటేనే వాతావరణంలో ఉష్ణోగ్రతలు తగ్గిపోవడం. బయట ఉష్ణోగ్రతలు పడిపోయినప్పుడు మనిషి శరీరంలోని రక్తనాళాలు కుంచించుకుపోతాయి. దీనివల్ల అంతర్గతంగా ఒత్తిడి పెరుగుతుంది. ఫలితంగా ‘సింపథటిక్‌ నర్వస్‌ సిస్టమ్‌’ వేగవంతం అవుతుంది. దాంతో హృదయ స్పందన పెరుగుతుంది. అంటే, గుండె ఎక్కువసార్లు కొట్టుకుంటుంది. రక్తనాళాలపై ఒత్తిడి అధికమై బీపీ పెరుగుతుంది. ఇవన్నీ కలిసి గుండెపై ప్రభావం చూపుతాయి.

చలి ప్రభావాలు..

చలి గుండెను అనేక రకాలుగా బలహీనపరుస్తుంది. హృదయ స్పందనపై వ్యతిరేక ప్రభావం చూపుతుంది. ఇప్పటికే హృద్రోగ సమస్యలతో బాధపడుతున్నవారు మరింత జాగ్రత్తగా ఉండాల్సిన సమయం ఇది. 14 నుంచి 20 శాతం మేర రక్తం గడ్డకట్టే గుణం పెరుగుతుంది. దీనివల్ల గుండెకు రక్త సరఫరా మందగించి గుండెపోటు రావచ్చు.

శ్రమ తగ్గిపోవడం

సాధారణంగా చలికాలంలో ఉన్నచోటే ఉంటారు. ఉదయం త్వరగా లేవలేకపోతారు. ఒకటి రెండు గంటలు ఎక్కువగా నిద్రపోతారు. వ్యాయామం, నడక, జాగింగ్‌ ఆపేస్తారు. ఒకరకమైన బద్ధకం ఆవహిస్తుంది. కదలికలు తగ్గడం వల్ల కాళ్లలో రక్తం గడ్డకడుతుంది. ఇదే కారణంతో ‘పల్మనరీ ఎంబాలిజం’ పెరుగుతుంది. అంటే ఊపిరితిత్తుల్లో రక్తం గడ్డకడుతుంది. దీనివల్ల ఊపిరి ఆడదు. ఆయాసం వస్తుంది. ఈ పరిస్థితి మరింత తీవ్రమైతే గుండె సమస్యలకు దారితీస్తుంది.

వైఫల్యాలు 20శాతం

చలికాలంలో గుండె వైఫల్యం కేసులు 20 శాతం మేర ఎక్కువ నమోదు అవుతున్నట్టు గణాంకాలు చెబుతున్నాయి. గుండె పనితీరు మందగిస్తే మనిషిలో ఆయాసం వస్తుంది. భారం పెరగడం వల్ల శరీరానికి తగినంత రక్తాన్ని గుండె సరఫరా చేయలేకపోతుంది. ఫలితంగా ఊపిరితిత్తులపై ఒత్తిడి పెరుగుతుంది. చలికాలంలో ఇన్‌ఫ్లూయెంజా, విష జ్వరాలు ఎక్కువ. ఈ ఇన్‌ఫెక్షన్ల వల్ల కూడా గుండెపోటు, గుండె వైఫల్యాలు అధికం అవుతాయి.

లయ తప్పితే..

ఒక క్రమపద్ధతిలో కొట్టుకోవాల్సిన గుండె, చలికాలంలో లయ తప్పుతుంది. దీన్నే ‘ఎట్రియల్‌ ఫైబ్రిలేషన్‌’ అంటారు. దీని వల్ల పక్షవాతం వచ్చే ఆస్కారం అధికం. గుండె తన సహజశైలిని పక్కనపెట్టి కొన్నిసార్లు వేగంగా, కొన్నిసార్లు మెల్లగా కొట్టుకోవడాన్ని వైద్య పరిభాషలో ‘వెంట్రిక్యులర్‌ ఎరిథ్‌మియా’ అంటారు. ఇలాంటప్పుడే ‘కార్డియాక్‌ డెత్‌’ సంభవిస్తుంది. అంటే, రోగి ఉన్నట్టుండి మరణిస్తాడు.

జాగ్రత్తలు – చికిత్సలు

• సాధారణంగా చలి వాతావరణంలో వాయు కాలుష్యం అధికంగా ఉంటుంది. కాబట్టి, సాధ్యమైనంత మేర చలికి దూరంగా ఉండాలి.
• చలికాలంలో వచ్చే గుండె జబ్బులపై అవగాహన పెంచుకోవాలి.
• ఛాతీలో నొప్పి అనిపించినా, శ్వాస తీసుకోవడంలో సమస్య ఎదురైనా వెంటనే వైద్యులను సంప్రదించాలి.
• ఇప్పటికే గుండె జబ్బులు ఉన్నవారు మరింత జాగ్రత్తగా ఉండాలి.
• మరీ చలిగా అనిపిస్తే బయటికెళ్లి చేసే.. వ్యాయామం, నడక వాయిదా వేసుకోవడమే మంచిది. ఇంట్లోనే చిన్నచిన్న కసరత్తులు చేసుకోవచ్చు.
• నిపుణుల సలహాలతో ఇన్‌ఫ్ల్లూయెంజా, న్యూమోకోకల్‌ వ్యాక్సిన్‌ తీసుకోవడం మంచిది.
• గుండెకు ఆరోగ్యాన్నిచ్చే ఆహారం తీసుకోవాలి.
• బరువు పెరగకుండా జాగ్రత్త పడాలి.
• రోజూ అరగంట అయినా వ్యాయామం చేయాలి.
• చాలా మందిలో బీపీ పెరిగినా, ఆ లక్షణాలు బయటికి కనిపించవు. అందుకే తరచూ పరీక్షించుకోవాలి.
• 25 శాతం మందికి ఛాతీ నొప్పి లేకుండానే గుండెపోటు వస్తుంది. గుండె సమస్యలపై అశ్రద్ధ చేయకుండా సంబంధిత వైద్యుణ్ని సంప్రదించాలి.
• ఒకసారి గుండెపోటు వచ్చిన వారు వ్యాయామం చేయకూడదనేది అపోహ మాత్రమే. కాకపోతే, తేలికపాటి వ్యాయామాన్ని ఎంచుకోవడం ఉత్తమం.
• ఇంటర్నెట్‌లో ప్రచారంలో ఉన్న చిట్కాలు, మిడిమిడి జ్ఞానపు వీడియోలు చూసి.. ఆ సూత్రాలు తూ.చ. తప్పక పాటించి ప్రాణాలమీదికి తెచ్చుకోకూడదు. శాస్త్రీయ అవగాహన చాలా ముఖ్యం.
• గుండెను ఆరోగ్యంగా కాపాడుకున్నంత కాలం చలి పులి మనల్ని ఏమీ చేయలేదన్న విషయాన్ని గుర్తుంచుకోవాలి.

ఎంజైనల్‌ ఎటాక్‌

శారీరక శ్రమ తగ్గిపోవడం, రోజంతా ఇంటికే పరిమితం కావడం వల్ల.. సహజంగానే తిండి మీద ధ్యాస పెరుగుతుంది. మునుపటితో పోలిస్తే ఎక్కువే తింటారు. ఫలితంగా కొలెస్ట్రాల్‌ పేరుకుపోతుంది. బరువు పెరుగుతారు. శారీరక శ్రమ లేకపోవడంతో రక్తపోటు అధికం అయిపోయి ‘ఎంజైనల్‌ ఎటాక్‌'(గుండె నొప్పి) వచ్చే అవకాశాలు ఉంటాయి. తొలిసారిగా గుండె నొప్పిని 1772లో గుర్తించారు. ఒక వ్యక్తి ఎత్తయిన గుట్టమీదికి ఎక్కుతున్నప్పుడు, చల్లగాలి చుట్టుముట్టేసింది. ఆ సమయంలో అతడి ఛాతీలో వచ్చిన నొప్పిని గుండె పోటుగా పరిగణించారు. ఇలా ఛాతీలో కలిగే నొప్పినే ‘ఎంజైనల్‌ పెయిన్‌’ అంటారు. ఇది గుండెపోటుకు హెచ్చరిక. చలికాలంలో గుండెపోటు వచ్చే అవకాశాలు అధికం. గుండెపై శక్తికి మించిన భారం పడటమే దీనికి కారణం.

డాక్టర్‌ టి.శశికాంత్‌
ఇంటర్వెన్షనల్‌ కార్డియాలజిస్ట్‌
యశోద హాస్పిటల్‌,సికింద్రాబాద్‌

-మహేశ్వర్‌రావు బండారి