Half and Half Jewelery | ఒకే నగ ధరించినా రెండు ఆభరణాలు వేసుకున్న అనుభూతి

March 25, 2022 / 06:10 AM IST

Half and Half Jewelery | స్వర్ణానికి ముత్యాలకు దోస్తీ పచ్చలకు కెంపులకు దోస్తీ పగడాలకు వజ్రాలకు దోస్తీ ఈ దోస్తీ కాన్సెప్ట్‌ సినిమాల్లోనే కాదు, ఆభరణాల్లోనూ సూపర్‌హిట్‌గా నిలుస్తున్నది. విభిన్న డిజైన్లకు దోస్తీ కుదిర్చిన నగలు అతివలకు వల విసురుతున్నాయి. ‘హాఫ్‌ అండ్‌ హాఫ్‌’ పేరుతో ఒకే నగ ధరించినా రెండు ఆభరణాలు వేసుకున్న అనుభూతిని కలిగిస్తున్నాయి. అంటే ఒకే జువెలరీతో రెండు సంతోషాలు సొంతం చేసుకోవచ్చన్నమాట!

పెండ్లి, పేరంటాలకు వేసుకునే బంగారు నగల్లోనూ ఈ హాఫ్‌ అండ్‌ హాఫ్‌ డిజైన్‌ జువెలరీకి ఎక్కువగా ప్రాధాన్యం ఇస్తున్నారు. వీటిని ఎంచుకోవడం వల్ల రెండురకాల లాభాలుంటాయి. నచ్చిన రెండు డిజైన్లను కలిపి ఒకే నగ చేయించుకోవచ్చు. అలాగే తక్కువ బంగారంతో నగలు కావాలనుకునేవాళ్లకు ఈ హాఫ్‌ అండ్‌ హాఫ్‌ నగలు మంచి ఎంపిక. సగం నగను భారీగా డిజైన్‌ చేయించుకున్నా, రెండో సగాన్ని సాదాసీదా గొలుసుగా చేయించుకోవచ్చు. వెరైటీగానూ ఉంటుంది, పైగా బడ్జెట్‌లో తయారవుతుంది.

వెండి-ప్లాటినమ్‌ జోష్‌..

సాదాసీదా పూసలతో జతకట్టిన ప్లాటినం, వెండి నగలు మగువల మనసులను దోచేస్తున్నాయి. సంప్రదాయ వస్త్రధారణకు, వెస్ట్రన్‌ వేర్‌కు ఇవి బాగా నప్పుతున్నాయి. అమ్మాయిలే కాకుండా అబ్బాయిలూ హాఫ్‌ అండ్‌ హాఫ్‌ డిజైన్‌తో చేసిన సన్నని, తేలికపాటి గొలుసులు వేసుకునేందుకు ఆసక్తి చూపిస్తున్నారు.

కొత్త కాంబినేషన్స్‌..

హాఫ్‌ అండ్‌ హాఫ్‌ డిజైన్లల్లో ముత్యాలను ఎక్కువగా ఉపయోగిస్తున్నారు. నగలో సగం ముత్యాలు, మరోసగం బంగారంతో నచ్చిన డిజైన్‌ చేయించుకుంటున్నారు. బంగారానికి జోడీగా ముత్యాలతోపాటు పగడాలు, కెంపులు, కుందన్లు, పచ్చలను ఎంచుకొని హారాలుగా మలుచుకుంటున్నారు. ఒక సగం ముత్యాలు, మరో సగం బంగారం గుండ్లతో తీర్చిదిద్దిన నగలు ఇప్పుడు ట్రెండ్‌గా చెబుతున్నారు. కాలేజీ పిల్లల నుంచి ఉద్యోగుల వరకు అందరూ వీటిని ఇష్టపడుతున్నారు. ముఖ్యంగా రోజువారీ నగల్లా వీటిని ధరిస్తున్నారు.