కూలీ ప‌ని చేసుకునే న‌న్ను ప‌ల్లె పాట పాపుల‌ర్ చేసింది !!

Folk Singer Thati Renuka | అక్షరంపైనే ధ్యాస. అంతలోనే తీవ్ర విషాదం. చూస్తుండగానే చదువుకు దూరమైంది. అదృష్టవశాత్తు పాటకు దగ్గరైంది. ఆ ధ్యాసేదో పాటపైనే పెట్టాలని నిర్ణయించుకుంది. అవకాశాల అన్వేషణ మొదలు పెట్టింది. ఆశలు ఆవిరి కావస్తున్న వేళ ఒక చక్కని అవకాశం దొరికింది. అమ్మను చూస్తూ నేర్చుకున్న అలనాటి అచ్చమైన జానపదాలను ట్రెండింగ్‌లోకి తీసుకొస్తున్న తాటి రేణుక పాటల ముచ్చట..

మా ఇల్లొక పాటల పూదోట. మా అమ్మ సక్కదనాల పాటలు పాడుతుండె. సందమామను సూపిచ్చి గోరుముద్దలు తినిపించుడు మాకు ఎర్కలేదు. కానీ సందమామ కంటే సక్కదనమైన పాటేదో పాడుకుంటా బువ్వ తినిపిస్తుండె. ‘ఒడియాన రామ.. ఒలసందమామ!’ అనుకుంటా మాకు బుద్ధులు నేర్పిస్తుండె. పొద్దుందాక పనిజేసి ఇంటికొచ్చిన మా నాయినకు అమ్మ పాట ఒక పెద్ద రిలాక్సేషన్‌.

పాటతో బాధ తగ్గింది

మా కుటుంబంలో పిడుగసొంటి వార్త.. మా నాయిన మరణం. నాకు చదువంటే ఇష్టం. నాయిన చనిపోవడం వల్ల భారమంతా అమ్మమీద పడ్డది. కూలీనాలీ చేసి పెద్ద చేసింది. ఐతే పొద్దుందాక తమ్ముడు, చెల్లెల్ని చూసుకోనీకె ఎవరూ లేరు. నేనే దిక్కు ఇగ. పెద్ద చదువులు చదువుకోవాలన్న నా కల, నిజంగానే కలగా మారిపోయింది. ఎటూ గాకుండా మధ్యలోనే చదువు ఆపేసిన. నాయిన లేడనే షాక్‌ నుంచి కోలుకోక ముందే చదువుకూ దూరమైన. ఆ బాధలోంచి బయటపడేందుకు పాటను ఎంచుకున్నా. అమ్మ ఇంటికొచ్చే సరికి పనులన్నీ చేసిపెట్టేదాన్ని. తమ్ముడు, చెల్లె ఏడవకుండా మంచి పాటొకటి పాడేదాన్ని. మెల్లమెల్లగా నా పాట గడప దాటింది. అవకాశం దొరికినప్పుడల్లా బయట కూడా పాడేదాన్ని. అట్లా నేను మంచిగ పాడుతననీ వాడకట్లో, ఊర్లో చాలా మటుకు తెలిసిపోయింది. చదువుకు దూరమైన బాధ పాట ద్వారా కొంత తగ్గింది. పాటలంటే ఏ సినిమా పాటలో కాదు.. స్వచ్ఛమైన జానపదాలు.

పొలంలో నేర్చుకున్న

మాది జనగామ జిల్లా తరిగొప్పుల. పెద్దగైనంక తరిగొప్పులతో పాటు సుట్టుపక్కల ఊర్లల్ల అమ్మతో కలిసి పొలం పనికి పోయేదాన్ని. పాటమీదున్న నా ఆసక్తికి ఒక వేదిక దొరికినట్టయింది. అమ్మ, పెద్దమ్మ, ఇంకా చానామంది మంచి మంచి పల్లె పాటలు పాడుతుంటే విని నేర్చుకున్న. నాట్లేసేటప్పుడు అలసట రాకుండా నాతో పాటలు పాడిస్తుండె. నా వయసున్న ఇద్దరు ముగ్గురు అమ్మాయిలు కూడా మాతో ఉంటుండె. నేను, వాళ్లు కలిసి ‘సీరామా సింతల్ల పండే పండింది.. సోజ్జాలో’, ‘పోశవ్వా పుట్టినాది కొండల్లో మావురాల పుట్టినాది’ తదితర పాటలు పాడేవాళ్లం. ‘సుందరమ్మ బిడ్డె తల్లి కడుపుల ఉండంగనే పాటలు నేర్సుకున్నట్టుంది’ అనేవాళ్లు. నాకు సంబురంగా అనిపించేది.

మొదటి విజయం

యూట్యూబ్‌ వాళ్ల ఫోన్‌ నంబర్లు దొరకవట్టి ఫోన్లు చేసిన. నా దగ్గరున్న పాటలను వినిపించిన. ‘అవకాశం కావాలె’ అని అడిగిన. బాగున్నయి అన్నరుగానీ అవకాశం ఇయ్యలేదు. కొందరైతే ఆ పాటలను వేరేవాళ్లతో పాడించి యూట్యూబ్‌లో పెట్టిండ్రు. అడిగితే ‘నువ్వు కొత్త కదా? ఎట్ల పాడుతవో ఏమో’ అని చేతులు దులిపేసుకుండ్రు. సరే ఎవరి నియ్యత్‌ వాళ్లది అనుకున్న. నా అదృష్టం కావచ్చు. ‘బతుకమ్మ చానెల్‌’ శంకరన్న స్పందించిండు. పాడటమే కాదు, నటించే అవకాశం కూడా ఇచ్చిండు. ‘ముత్యాల పందిరి కిందా నా ముగ్గురన్నాలు.. సీరె సారెలువోసీ నిను సాగనంపంగా’ అంటూ సాగే ఆ పాట పాడుతున్నంత సేపూ నేను ఏడుస్తూనే ఉన్నా. అదొక అప్పగింతల పాట. ‘ఒడియాన రామ ఒలసందమామ ఒక్కత్తకోడండ్లు ఏడుగురారండ్లే ఒలసందమామ’.. చిన్నప్పుడు మా అమ్మ దగ్గర నేర్చుకున్న సీమంతం పాట. అన్నదమ్ములు ఆడిబిడ్డెకు ఒడిబియ్యం పోసే తంతు.. పుట్టింటి ప్రేమలు ఈ పాటలో కండ్లకు అద్దినట్లే కనిపిస్తయి. ఈ పాటనూ జనం ఆదరించిండ్రు. దాని తర్వాత ఒక్కో అవకాశం పెరుగుతూ వచ్చింది. ఇప్పుడు నా గొంతు అందరికీ తెలిసిపోయింది. నాతో చిన్నప్పుడు నాట్లేస్తూ కలిసి పాడిన దోస్తులు ఫోన్‌చేసి ‘ఈ పాట మనం పాడుకున్నది కదానే? బాగనే గుర్తువెట్టుకున్నవ్‌’ అని మెచ్చుకున్నరు. అప్పటిదాంక కూలీ పనిచేసే రేణుకగానే తెలిసిన ఊరోళ్లు, సుట్టుపక్కలోళ్లు ‘నువ్వు గింత మంచిగ పాడతవని మాకు తెల్వకపాయె’ అని అంటుంటే సంతోషం అనిపిస్తది. ఆణిముత్యాల సొంటి పాటలు మరిన్ని పాడి ఎదగాలె అనుకుంటున్న.

ఎవర్ని అడగాలె?

పెండ్లయినంక అత్తగారింట్లో నోరు ఊకునేది కాదు. ఏదో ఒక పదం అందుకొని పాటలను కైగట్టేదాన్ని. ‘నీ పాటల గురించి బయట మెచ్చుకుంటాండ్రు. ఇంకా పట్టు సంపాదిస్తే ఎన్నడో ఒకనాడు మనగ్గూడా అవకాశం వస్తది’ అంటుండె మా ఆయన సత్యం. పొద్దుందాక పొలం పనిచేసి, పొద్దుమూకంగా ఇంటికొచ్చి ఫోన్లో పల్లె పాటలు వినేదాన్ని. అలసట తీర్చుకునేదాన్ని. చాలా పాటలు నేను చిన్నప్పుడు నేర్చుకున్నవే. అటూ ఇటూ కొంత మార్చినట్టు అనిపించేది. నా పాట కూడా ఇట్లా పదిమందికి తెలిస్తే ఎంత బాగుంటదో అనుకునేదాన్ని. ఊర్లో బతుకమ్మ, బోనాలు, పెండ్లిల్ల్లప్పుడు నాతో పాడిస్తుండేవాళ్లు. అట్లా ఒకసారి పోశమ్మ కాడ పాడుతుంటే ఒక సారు చూసిండు. ఆయనెవరో నాకు తెల్వదు. ఎమ్మెల్యే వినయ్‌భాస్కర్‌ సార్‌ దగ్గర ఉండేదని అన్నరు. ‘ఇంత మంచి గొంతు ఉట్టిగ ఊర్లల్ల పాడితే ఏమొస్తది. యూట్యూబ్‌లో పాడితే లోకమంతటికీ తెలుస్తది కదా’ అన్నడు. యూట్యూబ్‌లో ఎట్ల పాడాల్నో, ఎవరిని అడగాల్నో తెలవక పెద్దగా పట్టించుకోలేదు.

… దాయి శ్రీశైలం

Read More :

“Folk Singer Kalavathi | వందలయేండ్ల గోండుల కళను బతికిస్తున్న కళావతి”