తన కోపమే తన గుండెకు శత్రువు

తరచుగా కోపం తెచ్చుకునేవారికి గుండెపోటు వచ్చే అవకాశం ఎక్కువగా ఉంటుందట. మితిమీరిన కోపం, తీవ్రమైన ఆవేశం.. గుండె ఆరోగ్యంపై తీవ్రమైన ప్రభావాన్ని చూపుతుందట.

తరచుగా కోపం తెచ్చుకునేవారికి గుండెపోటు వచ్చే అవకాశం ఎక్కువగా ఉంటుందట. మితిమీరిన కోపం, తీవ్రమైన ఆవేశం.. గుండె ఆరోగ్యంపై తీవ్రమైన ప్రభావాన్ని చూపుతుందట. కోపంలో గట్టిగా అరవడం వల్ల.. ఆ తర్వాతి రెండు గంటల్లో హార్ట్‌ స్ట్రోక్‌ వచ్చే ప్రమాదం దాదాపు 5 రెట్లు ఎక్కువగా ఉంటుందట. యూరోపియన్‌ హార్ట్‌ జర్నల్‌లో ప్రచురితమైన తాజా అధ్యయనం ఈ విషయాన్ని బయటపెట్టింది. ఎలాంటి హృదయ సంబంధ సమస్యలు లేకపోయినా.. తరచుగా కోపం వచ్చేవారిని గుండెపోటు ఇట్టే పలకరిస్తుందట.

ఇందుకు గల కారణాలను పరిశోధకులు వివరిస్తున్నారు. కోపంలో ఉన్నప్పుడు శరీరం ‘ఫైట్‌ ఆర్‌ ఫ్లయిట్‌’ మోడ్‌లోకి వెళ్తుంది. దీనివల్ల అకస్మాత్తుగా రక్తపోటు పెరుగుతుంది. ఇది గుండె ధమనులపై ఒత్తిడిని పెంచి, గుండెపోటుకు దారితీస్తుంది. అంతేకాకుండా కోపం వచ్చినప్పుడు శరీరంలో అడ్రినలిన్‌, కార్టిసాల్‌ వంటి ఒత్తిడి హార్మోన్లు ఎక్కువగా విడుదలవుతాయి. ఇవి గుండె కొట్టుకునే వేగాన్ని పెంచుతాయి.

రక్తనాళాలు కుంచించుకుపోయేలా చేస్తాయి. ధమనుల్లో ఇప్పటికే కొవ్వు పేరుకుపోయి ఉంటే.. హార్ట్‌ ఎటాక్‌ వచ్చే అవకాశం ఎక్కువగా ఉంటుంది. ఎప్పుడూ కోపంతో రగిలిపోయేవారి శరీరంలో ఇన్‌ఫ్లమేషన్‌ పెరుగుతుంది. ఇది హృదయ సంబంధిత వ్యాధులకు కారణం అవుతుంది. ఈ సమస్య నుంచి బయట పడాలంటే.. కోపాన్ని అదుపులో పెట్టుకోవడం చాలాముఖ్యం. నిత్యం యోగా చేయడం వల్ల భావోద్వేగాలపై నియంత్రణ పెరుగుతుంది. వ్యాయామం, కొన్నిరకాల బ్రీతింగ్‌ ఎక్సర్‌సైజ్‌లతో ఒత్తిడిని తగ్గించుకోవచ్చు. గుండెను దృఢంగా మార్చుకోవచ్చు. కోపం వచ్చిన దీర్ఘంగా శ్వాస తీసుకొని వదిలేస్తే.. మెదడుతోపాటు గుండె కూడా శాంతిస్తుంది.