క్యాల్షియం మాత్రలు సరిపోతాయా..!

వయసు పెరిగే కొద్దీ ఎముకల్లో బలం తగ్గిపోతుంది. వాటిని దృఢపరచాలన్న ఉద్దేశంతో చాలామంది పెద్దలు క్యాల్షియం, విటమిన్‌-డి సప్లిమెంట్లను తీసుకుంటూ ఉంటారు. అయితే వృద్ధులు కిందపడ్డప్పుడు ఎముకలు విరిగే అవకాశాలను తగ్గించే విషయంలో ఇవి అంత గొప్పగా ఏమీ పనిచేయడం లేదని తాజా ఆరోగ్య సమీక్ష ఒకటి తేల్చి చెప్పింది.

వయసు పెరిగే కొద్దీ ఎముకల్లో బలం తగ్గిపోతుంది. వాటిని దృఢపరచాలన్న ఉద్దేశంతో చాలామంది పెద్దలు క్యాల్షియం, విటమిన్‌-డి సప్లిమెంట్లను తీసుకుంటూ ఉంటారు. అయితే వృద్ధులు కిందపడ్డప్పుడు ఎముకలు విరిగే అవకాశాలను తగ్గించే విషయంలో ఇవి అంత గొప్పగా ఏమీ పనిచేయడం లేదని తాజా ఆరోగ్య సమీక్ష ఒకటి తేల్చి చెప్పింది. 1.53 లక్షల మంది పెద్దల మీద జరిపిన ఓ సర్వేను ఇందుకోసం తీసుకున్నారు. అందులోని వ్యక్తులు ఎముకల దెబ్బల బారిన పడిన చాలా సందర్భాలను సమీక్షించారు. బ్రిటిష్‌ మెడికల్‌ జర్నల్‌ (బీఎంజే)లో ప్రచురితమైన ఈ అధ్యయనం ఎముకల ఆరోగ్యం మీద కొత్త కోణాన్ని ఆవిష్కరించింది. ఈ వ్యక్తుల్లో కొందరు రెండు రకాల మాత్రలూ వేసుకుంటే, కొందరు ఏదో ఒక రకం మాత్రమే వేసుకున్నారు.

అయితే పడినప్పుడు ఎముకలు విరిగే లేదా పగుళ్లు వచ్చే విషయంలో, ముఖ్యంగా తుంటి ఎముకలకు సంబంధించిన దెబ్బల విషయంలో ఈ మాత్రలు పెద్ద ప్రభావవంతంగా పనిచేసినట్టు ఆధారాలేమీ లభించలేదట. సాధారణంగా వయసు పెరిగే కొద్దీ శరీరం సమతుల్యాన్ని కోల్పోతుంది. అందుకే పెద్దలు తూలుతుంటారు. కాబట్టి మాత్రల కన్నా, బ్యాలన్సింగ్‌తో పాటు ఎముకలను దృఢపరిచే ఇతర వ్యాయామాలు కూడా గాయాలనుంచి కాపాడే విషయంలో పరిశీలించాల్సి ఉందని ఈ అధ్యయనం చెబుతున్నది. అలాగే సమతులాహార ప్రాధాన్యాన్నీ ప్రస్తావించింది. అయితే ఆస్టియోపోరోసిస్‌ (ఎముకలు గుల్లబారే వ్యాధి)లాంటి వాటితో పాటు ఇతర ఎముకల జబ్బులు ఉన్నవారికి వీటి అవసరం వేరుగా ఉండి ఉండవచ్చునని వెల్లడించారు.