మనకు నిరాశే.. రాష్ట్ర బడ్జెట్‌లో ఉమ్మడి జిల్లాకు అన్యాయం

రాష్ట్ర బడ్జెట్‌లో ఉమ్మడి జిల్లాకు అన్యాయమే జరిగింది. అభివృద్ధి కోసం ప్రత్యేకంగా ఎలాంటి నిధులను కేటాయించకపోవడం నిరాశే మిగిల్చింది. వరంగల్‌, హనుమకొండ, మహబూబాబాద్‌, జనగామ, జయశంకర్‌ భూపాలపల్లి, ములుగు జిల్లాలకు ప్రత్యేకంగా నిధులు మంజూరు చేయలేదు.

• భట్టి పద్దులో ఉమ్మడి జిల్లా ఊసేలేదు..
• వరంగల్‌ అండర్‌ గ్రౌండ్‌ డ్రైనేజీ పేరు లేదు
• సూపర్‌ స్పెషాలిటీ హాస్పిటల్‌ ప్రస్తావన రాలే
• ఎయిర్‌పోర్టు అభివృద్ధికి కేంద్రం నిధులేనట
• దేవాదులకూ అరకొర నిధులే

రాష్ట్ర బడ్జెట్‌లో ఉమ్మడి జిల్లాకు అన్యాయమే జరిగింది. అభివృద్ధి కోసం ప్రత్యేకంగా ఎలాంటి నిధులను కేటాయించకపోవడం నిరాశే మిగిల్చింది. వరంగల్‌, హనుమకొండ, మహబూబాబాద్‌, జనగామ, జయశంకర్‌ భూపాలపల్లి, ములుగు జిల్లాలకు ప్రత్యేకంగా నిధులు మంజూరు చేయలేదు. కేసీఆర్‌ ప్రభుత్వం మొదలుపెట్టిన అభివృద్ధి పనులను పూర్తి చేసేందుకు అవసరమైన నిధుల కేటాయింపు ప్రస్తావన ఎక్కడా లేదు. సాగునీటి ప్రాజెక్టుల విషయంలో అరకొర నిధులు విదిల్చి కాంగ్రెస్‌ సర్కారు మరోసారి నిర్లక్ష్యంగా వ్యవహరించింది. అసెంబ్లీ ఎన్నికలప్పుడు హామీ ఇచ్చిన వాటికీ భట్టి పద్దులో చోటుదక్కకపోవడంపై అన్ని వర్గాలు పెదవి విరుస్తున్నాయి.

– వరంగల్‌, మార్చి 19 (నమస్తే తెలంగాణ ప్రతినిధి)

• గ్రేటర్‌ వరంగల్‌ పరిధిలో అండర్‌ గ్రౌండ్‌ డ్రైనేజీ కోసం బడ్జెట్‌లో ఎలాంటి పద్దు కేటాయించలేదు. యూజీడీ కోసం రూ.4,170 కోట్లు కేటాయిస్తూ రాష్ట్ర ప్రభుత్వం గతేడాది నవంబర్‌ 17న ఉత్తర్వులు జారీ చేసినప్పటికీ బడ్జెట్‌లో మాత్రం ప్రస్తావించలేదు. దీంతో నిర్మాణ పనులు మొదలవుతాయా లేదా అనే సందేహం నెలకొంది. వరంగల్‌లో అండర్‌ గ్రౌండ్‌ డ్రైనేజీ నిర్మిస్తామని కాంగ్రెస్‌ పార్టీ ఏడాదిన్నర క్రితం అసెంబ్లీ ఎన్నిక్ల సమయంలో హామీ ఇచ్చింది. ఏడాదిన్నర గడుస్తున్నా రాష్ట్ర ప్రభుత్వం అవసరమైన నిధులపై స్పష్టత ఇవ్వడం లేదు. ఓ జీవో ఇచ్చి చేతులు దులుపుకొన్నది. అంతేగాక స్మార్ట్‌సిటీ, అమృత్‌ పథకాల కింద రాష్ట్ర ప్రభుత్వ వాటాగా రూ.500 కోట్ల వరకు పెండింగ్‌లో ఉన్నట్లు అధికారులు చెబుతున్నారు.
• రాష్ట్ర ప్రభుత్వం రూ.178 కోట్లను కేటాయించినట్లు బడ్జెట్‌లో పేర్కొన్నది. నగర అభివృద్ధి కోసం కేసీఆర్‌ ప్రభుత్వం 2016-17లో రూ.250 కోట్లను ప్రత్యేకంగా కేటాయించింది. కాంగ్రెస్‌ ప్రభుత్వం ప్రత్యేకంగా ఎలాంటి నిధులు బడ్జెట్‌లో లేవు.
• మాముమూరు ఎయిర్‌పోర్టు అభివృద్ధి కోసం కేంద్ర ప్రభుత్వం ఇటీవల అను మతులు మంజూరు చేసింది. మామునూరు ఎయిర్‌పోర్టుకు మొదటి నుంచి 696 ఎకరాల భూమి ఉన్నది. కాగా మరో 253 ఎకరాలు అవసరమవుతుం దని కేంద్ర-రాష్ట్ర ప్రభుత్వాల సంయుక్త కమిటీ సూచించింది. అదనపు భూసే కరణ పూర్తి చేయాలని రాష్ట్ర ప్రభుత్వానికి కేంద్రం సూచించింది. ఈ భూసేక రణ కోసం రాష్ట్ర ప్రభుత్వం 2024 నవంబర్‌ 17న రూ.205 కోట్లు కేటా యిస్తూ ఉత్తర్వులు జారీ చేసింది. ఈ నిధులను ఇప్పటికే మంజూరు చేశామని బడ్జెట్‌ ప్రసంగంలో ప్రభుత్వం పేర్కొన్నది. కానీ నిధుల విడుదల గురించి ప్రస్తావించలేదు.
• పేదలకు కార్పొరేట్‌ వైద్యం అందించే లక్ష్యంతో కేసీఆర్‌ ప్రభుత్వం రూ.1100 కోట్లతో వరంగల్‌ నగరంలో తలపెట్టిన సూపర్‌ స్పెషాలిటీ హాస్పి టల్‌ పూర్తి చేయడంపై రాష్ట్ర ప్రభుత్వం బడ్జెట్‌లో ఎలాంటి ప్రకటన చేయలేదు. చివరి దశలో ఉన్న ఈ హాస్పిటల్‌ను అందుబాటులోకి తెచ్చే విషయాన్ని ఎక్కడా ప్రస్తావించలేదు.
• కీలకమైన సాగునీటి ప్రాజెక్టులకు నిధుల కేటాయింపులోనూ రాష్ట్ర ప్రభుత్వం పెద్దగా ఆసక్తి చూపలేదు. చీఫ్‌ ఇంజినీర్‌వారీగా సాగునీటి శాఖ నిధులను కేటా యించింది. వరంగల్‌ చీఫ్‌ ఇంజినీర్‌ పరిధిలోని ప్రాజెక్టులకు రూ.307 కోట్లు, కంతనపల్లి చీఫ్‌ ఇంజినీర్‌ పరిధిలోని ప్రాజెక్టుల కోసం రూ.25.94 కోట్లు, ములుగు చీఫ్‌ ఇంజినీర్‌ పరిధిలోని ప్రాజెక్టులకు రూ.100 కోట్లను బడ్జెట్‌లో కేటాయించారు. ప్రాజెక్టుల వారీగా ఎంతనేది త్వరలోనే ప్రకటిస్తారని సాగు నీటి శాఖ అధికారులు చెప్పారు. దేవాదుల ప్రాజెక్టు పనుల కోసం రూ.308 కోట్లను బడ్జెట్‌లో కేటాయించారు. ఈ ప్రాజెక్టు పూర్తయ్యేందుకు ఇప్పటికి 30,268 ఎకరాలు సేకరించారు. మరో 2,956 ఎకరాలను సేకరించాల్సి ఉన్నది. రాష్ట్ర ప్రభుత్వం ప్రస్తుతం బడ్జెట్‌లో పెట్టిన నిధులు భూసేకరణ, పెండింగ్‌ పనులను పూర్తి చేసేందుకు సరిపోవని సాగునీటి శాఖ అధికారులు వివరించారు.

మ్యానిఫెస్టోకు, ప్రతిపాదనలకు పొంతన లేదు

హనుమకొండ : రాష్ట్ర బడ్జెట్‌లో విద్య, వైద్యం, వ్యవసాయం, గృహనిర్మాణ రంగాలు, ఎస్సీ, ఎస్టీ, బీసీ, మైనార్టీ సంక్షేమానికి నిధుల కేటాయింపు పెంచాలి. లేకపోతే ఆందోళనలు, ఉద్యమాలు తప్పవు. ఎన్నికల ముందు కాంగ్రెస్‌ మ్యానిఫెస్టోకు, ప్రస్తుత ప్రతిపాదనలకు ఎలాంటి పొంతన లేదు. హైదరాబాద్‌ తరువాత రెండవ రాజధానిగా పేరొంటున్న వరంగల్‌, హనుమకొండ నగరాల అభివృద్ధికి ఎలాంటి నిధులు కేటాయించలేదు. నాలుగు రోజుల క్రితం స్టేషన్‌ ఘనపూర్‌లో జరిగిన సభలో సీఎం వరంగల్‌ నగరాభివృద్ధికి చిత్తశుద్ధితో ఉన్నామని చెప్పినా, బడ్జెట్‌ కేటాయింపుల్లో అది ప్రతిబింబించలేదు. నగరంలో అండర్‌ డ్రైనేజీ, మామునూరు ఎయిర్‌పోర్ట్‌ అభివృద్ధి నిధులపై స్పష్టత లేదు. వరంగల్‌-హైదరాబాద్‌ ఇండస్ట్రియల్‌ కారిడార్‌ను కూడా రాష్ట్ర ప్రభుత్వం విస్మరించింది. ఇండ్లు లేని కుటుంబాలు 30 లక్షలుంటే కేవలం 4.50 లక్షల మందికి మాత్రమే ఇవ్వడానికి ప్రతిపాదించారు. ఈ ఏడాది కూడా ఆరు గ్యారెంటీల అమలు జరిగే అవకాశం లేదు. కేవలం ప్రచారం కోసమే ఈ బడ్జెట్‌ ఉంది.

– జీ ప్రభాకర్‌రెడ్డి, సీపీఎం హనుమకొండ జిల్లా కార్యదర్శి

మ్యానిఫెస్టోకు దూరంగా బడ్జెట్‌

జనగామ చౌరస్తా : కాంగ్రెస్‌ తన మ్యానిఫెస్టోలో ఇచ్చిన హామీలకు ఆమడ దూరంలో ప్రస్తుత బడ్జెట్‌ కేటాయింపులున్నాయి. విద్యాశాఖకు 15 శాతం నిధులు కేటాయిస్తామని చెప్పి గతేడాది కన్నా 0.20 శాతం తగ్గించింది. గతేడాది విద్యారంగానికి రూ. 21,292 కోట్లు (7.77 శాతం) కేటాయించగా ప్రస్తుతం రూ. 23,108 కోట్లు (7.57 శాతం) మాత్రమే కేటాయించింది. గత బడ్జెట్‌ రూ. 2,74,058 కోట్లు, ప్రస్తుతం రూ. 3,04,965 కోట్లతో సరిపోల్చితే అంకెల్లో రూ. 1,816 కోట్లు పెరిగినట్లుగా ఉన్నప్పటికీ శాతాల్లో మాత్రం గతేడాది కన్నా తగ్గింది. 26,067 ప్రభుత్వ పాఠశాలలను ప్రభుత్వం గాలికొదిలేసి, రెసిడెన్షియల్‌, యంగ్‌ ఇండియా రెసిడెన్షియల్‌ స్కూల్స్‌పై మాత్రమే మాట్లాడుతున్నది. గురుకులాల్లో చదివేది 5.5 లక్షల మంది విద్యార్థులే. ప్రభుత్వ, జిల్లా, మండల పరిషత్‌ పాఠశాలల్లో చదివే వారి సంఖ్య 16 లక్షలు. ఇందులో అత్యధికంగా బడుగు, బలహీన వర్గాల పిల్లలున్నారు. వీరికి నాణ్యమైన విద్య అందించేందుకు ఈ కేటాయింపులు సరిపోవు.

-పీ చంద్రశేఖర్‌రావు, టీపీటీఎఫ్‌ జనగామ జిల్లా అధ్యక్షుడు

ప్రభుత్వ ఉద్యోగులకు నిరాశాజనకం

మహబూబాబాద్‌ (నమస్తే తెలంగాణ) : రాష్ట్ర ప్రభుత్వం ప్రవేశపెట్టిన రూ. 3,04,965 కోట్ల మొత్తం బడ్జెట్‌లో రూ. 23,108 కోట్లు విద్యాశాఖకు కేటాయించింది. అయితే ఈ శాఖకు మరిన్ని నిధులు కేటాయిస్తే మరింత అభివృద్ధి చెందుతుంది. అలాగే ప్రభుత్వ ఉద్యోగులకు బడ్జెట్‌ నిరాశాజనకంగా ఉంది. ఐదు పెండింగ్‌ డీఏలు, పీఆర్సీ ఊసే లేకపోవడం బాధాకరం. కాంగ్రెస్‌ ప్రభుత్వం ఉద్యోగులకు మొండిచేయి చూపింది. ఇప్పటికైనా పునరాలోచించి పెండింగ్‌లో ఉన్న డీఏలు, పీఆర్సీ విడుదల చేయడంతో పాటు ఫీజు రీయింబర్స్‌మెంట్‌ సమస్యను పరిష్కరించాలి.

– పులి దేవేందర్‌ ముదిరాజ్‌, టీపీఆర్‌టీయూ రాష్ట్ర ఆర్థిక కార్యదర్శి

భట్టి బడ్జెట్‌ బడా మోసం

పరకాల : మల్లు భట్టి విక్రమార్క ప్రవేశపెట్టిన బడ్జెట్‌ బడా మోసంగా కన్పిస్తున్నది. అసలు బడ్జెట్‌లో ఆదాయ, వ్యయాలకు పొంతన లేదు. సీఎం రేవంత్‌రెడ్డి మాటలలాగే భట్టి బడ్జెట్‌ ప్రసంగం కూడా అబద్ధాలతో నిండింది. కాంగ్రెస్‌ అధికారంలోకి వచ్చేందుకు ఇచ్చిన హామీలను అమలు చేసే చిత్తశుద్ధి ప్రభుత్వానికి, మంత్రులకు ఉన్నట్లు కనిపించడం లేదు. బడ్జెట్‌లో ఒక్క హామీకి పూర్తి స్థాయిలో నిధులు కేటాయించలేదు. అసలు కొన్ని పథకాల అమలు ప్రస్తావనే తీసుకురాకపోవడం వారి పనితీరుకు అద్దంపడుతున్నది. అధికారంలోకి వచ్చిన వంద రోజుల్లో ఆరు గ్యారెంటీలు అందిస్తామన్న కాంగ్రెస్‌ పెద్దలు తమ పూర్తి కాలంలో కూడా వాటిని అమలు చేసే పరిస్థితి లేదు. మొత్తంగా కాంగ్రెస్‌ రెండో బడ్జెట్‌ కూడా వారి పాలన లాగానే అస్తవ్యస్తంగా ఉంది. వరంగల్‌ ఉమ్మడి జిల్లాకు తలమానికమైన కాకతీయ మెగా టెక్స్‌టైల్‌ పార్కు అభివృద్ధి కోసం బడ్జెట్‌లో ఎలాంటి నిధులు కేటాయించలేదు.

– చల్లా ధర్మారెడ్డి, మాజీ ఎమ్మెల్యే, పరకాల

ఇది ప్రజా, రైతు వ్యతిరేక బడ్జెట్‌

నర్సంపేట : కాంగ్రెస్‌ ప్రభుత్వం బుధవారం ప్రవేశపెట్టింది ప్రజా, రైతు వ్యతిరేక బడ్జెట్‌. మొత్తంగా రైతులకు మొండిచేయి చూపింది. ఈ బడ్జెట్‌తో 6 గ్యారెంటీలు అమలు చేయడం అసాధ్యమనేది స్పష్టమవుతున్నది. బీఆర్‌ఎస్‌ అధినేత కేసీఆర్‌ హయాంలో 2020-21లోనే రూ. 25,305 కోట్లు, 2021-22లో రూ. 26,822 కోట్లు వ్యవసాయానికి కేటాయించారు. ఈసారి కాంగ్రెస్‌ ప్రభుత్వం వ్యవసాయానికి రూ. 24,439 కోట్లే కేటాయించింది. దీంతో రైతు భరోసా అమలు చేయడం కష్టం. ఈ బడ్జెట్‌ వ్యవసాయానికి పూర్తి వ్యతిరేకం. మహిళలకు ఇస్తామన్న రూ. 2500ల పథకానికి నిధులు కేటాయించకపోవడం దారుణం. ఈ ఏడాది మహిళా, చేయూత పథకం ఎగవేస్తారు. నిరుద్యోగ భృతి ఊసేలేదు. తులం బంగారం ముచ్చట తీయనేలేదు. కాంగ్రెస్‌ తామిచ్చిన ఆరు గ్యారెంటీలకు ఎగనామం పెట్టేదే ఈ బడ్జెట్‌.

– పెద్ది సుదర్శన్‌రెడ్డి, మాజీ ఎమ్మెల్యే, నర్సంపేట