Visit:
Sarpanch Elections | భీమదేవరపల్లి, నవంబర్ 30: హనుమకొండ జిల్లా భీమదేవరపల్లి మండలంలో వీర్లగడ్డ తండా గ్రామపంచాయతీ సర్పంచ్, వార్డు సభ్యుల ఎన్నిక ఏకగ్రీవమైంది. వీర్లగడ్డ తండాలో 670 వరకు జనాభా ఉండగా, 519 మంది ఓటర్లు ఉన్నారు. ఇందులో పురుషులు 275 మంది ఉండగా, మహిళలు 244 మంది ఉన్నారు. గ్రామంలో సర్పంచ్ స్థానానికి గుగులోతు పూర్ణిమ ఒకే ఒక్క అభ్యర్థి నామినేషన్ రావడంతో ఆమె ఎన్నిక ఏకగ్రీవమైంది. గ్రామంలో ఆరు వార్డులు ఉండగా, అన్ని వార్డుల్లోనూ ఒక్కటి మాత్రమే నామినేషన్ రావడంతో వారి ఎన్నిక సైతం ఏకగ్రీవమైంది.
ఒకటో వార్డులో గుగులోతు హరిలాల్, 2వ వార్డులో గుగులోతు రమేష్, 3వ వార్డులో గుగులోతు బూలీ, 4వ వార్డులో లావుడ్య రంజిత్ కుమార్, 5వ వార్డులో లావుడ్య లలిత, 6వ వార్డులో బానోతు కిషన్ ఏకగ్రీవంగా ఎన్నికయ్యారు. అయితే వీరి ఎన్నిక అధికారులు ప్రకటించాల్సి ఉంది. తండావాసులు పోటీ లేకుండా గ్రామంలో సమావేశమై సమిష్టిగా సర్పంచ్, వార్డు సభ్యులను ఏకగ్రీవంగా ఎన్నుకున్నారు. రాజకీయాలకు అతీతంగా తండాను కలిసికట్టుగా అభివృద్ధి చేసుకుని మండలంలోనే ఆదర్శ గ్రామంగా తీర్చిదిద్దాలని ప్రగాఢంగా యోచిస్తున్నారు. గ్రామపంచాయతీ సర్పంచ్, వార్డు సభ్యులు ఏకగ్రీవంగా ఎన్నిక కావడం పట్ల తండా వాసుల సంబరాలు అంబరాన్నంటాయి
