ఆసరా పెన్షన్ కోసం వృద్ధుల అవస్థలు.. తప్పుగా నమోదైన గ్రామం పేరుతో ప్రయాణ భారం

ప్రభుత్వం అందిస్తున్న ఆసరా పెన్షన్ కోసం వృద్ధులు, దివ్యాంగులు అవస్థలు పడుతున్నారు.

స్టేషన్‌ ఘన్‌పూర్‌, అక్టోబర్‌ 27: ప్రభుత్వం అందిస్తున్న ఆసరా పెన్షన్ కోసం వృద్ధులు, దివ్యాంగులు అవస్థలు పడుతున్నారు. జనగామ జిల్లా స్టేషన్ ఘనపూర్ మండలం రంగరాయిగూడెం గ్రామానికి చెందిన 11 మంది వృద్ధులు, దివ్యాంగుల పేర్లు ఇదే మండలంలో తాడికొండ గ్రామంలో నమోదు కాగా ప్రతినెల పెన్షన్ కోసం వారు ఆటోలో వెళ్లి పెన్షన్ తీసుకుంటూ తీవ్ర ఇబ్బందులు ఎదుర్కొంటున్నామని వారు ఆవేదన వ్యక్తం చేస్తున్నారు. వయసు మీద పడి మోకాళ్ల నొప్పులతో నడవలేక పాకుతూ పింఛన్‌ డబ్బుల కోసం ప్రతి నెలా 23 కిలోమీటర్లు వెళ్లాల్సి వస్తుందని వారు ఆవేదన వ్యక్తం చేస్తున్నారు.

రంగారాయిగూడెం గ్రామానికి చెందిన మంద వెంకట నర్సయ్య, మంద సమ్మక్క, ఈరగొని ఉప్పలయ్య, బోట్ల ఎల్లమ్మ సహా మొత్తం 11 మంది పింఛన్‌దారులు ప్రతినెల పెన్షన్ కోసం 200 రూపాయల ఖర్చు చేస్తూ ఆటోలో పోయి వస్తున్నట్లు వారు తెలిపారు. తమ సమస్యను సంబంధిత అధికారులకు పలుమార్లు విన్నవించిన పరిష్కారం కాలేదని, ఇప్పటికైనా జిల్లా కలెక్టర్ స్పందించి తమ సమస్యను పరిష్కరించాలని వేడుకుంటున్నారు.