తెలంగాణకు ‘గర్భ’శోకం.. సాగరగర్భంలో ఆంధ్రా సర్జ్పూల్.. శరవేగంగా పనులు
నాగార్జునసాగర్ ప్రాజెక్టు కుడివైపున రైట్బ్యాంక్ పరిధిలో ఏపీ ప్రభుత్వం ‘పల్నాడు వాటర్గ్రిడ్' పనులను యథేచ్ఛగా, యుద్ధప్రాతిపదికన కొనసాగిస్తున్నది. నిత్యం వందలాది మంది కార్మికులతో, భారీ యంత్రాలతో నిర్మాణ పనులు చేపడుతున్నది.
- యుద్ధ ప్రాతిపదికన పల్నాడు వాటర్ గ్రిడ్ పనులు
- అనుపు రోడ్డులో సాగర్ మాత గుడి పక్కనే నిర్మాణం
- సగం పూర్తయిన ‘అమరజీవి జలధార’ ఇన్టేక్వెల్
- 510 అడుగులపైనే నీటిని తరలిస్తామని పైకి ప్రకటన
- 450 అడుగుల లోతు నుంచీ నీళ్లు లాగేసేలా డిజైన్
- 2028 నాటికి పనులు పూర్తి చేసేలా ఏపీ అడుగులు
- రేవంత్ సర్కార్ దిగిపోయేలోగా ప్రారంభించే ప్లాన్
నదీగర్భం నుంచే నీళ్లు ఎత్తుకుపోయే కుట్ర! మన సాగును ఎండబెట్టి, సాగర్కు గండికొట్టే పన్నాగం! తెలంగాణకు జల‘గర్భ’శోకం! సకల కుతంత్రాల తర్వాత కూడా కృష్ణాలో మిగిలిన తడిని కూడా భారీ పైపులతో పీల్చేసి, చుక్కనీటినీ మనకు దక్కనీయకుండా చేసే చర్యకు బాబు తెరలేపాడు. మోదీ దానికి తలూపాడు! ఫలితం.. ‘అమరజీవి జలధార’ అనబడే తాగునీటి పథకం ముసుగులో తెలంగాణ జలహక్కులకు ఆంధ్రా సర్కార్ రాస్తున్న మరణశాసనం.
నాగార్జునసాగర్లో ఇటీవలి కాలంలో నీటిమట్టం 500 అడుగులకు మించి దిగలేదు. అసలు ప్రాజెక్టు చరిత్రలోనే ఎంతటి కరువు వచ్చిన సంవత్సరంలోనైనా 495 అడుగులకు మించి కిందికి పోలేదు. కానీ ఇప్పుడు 492 నుంచీ నీళ్లు తీసుకునేలా పనులు కొనసాగిస్తున్నది చంద్రబాబు సర్కార్. కనీవినీ ఎరుగనంత కరువొచ్చినా, కృష్ణాలో వరద రాకపోయినా, సాగర్ నీటిమట్టం పడిపోయినా 450 నుంచైనా నీళ్లు గుంజేసుకునేలా నిర్మాణం చేపడుతున్నట్టు సమాచారం.
గుట్టుగా పనులు.. కట్టుదిట్టంగా భద్రత..
కట్టుదిట్టమైన భద్రత మధ్య ఏపీ పల్నాడు వాటర్ గ్రిడ్ పనులను కొనసాగిస్తున్నది. దరిదాపుల్లోకి వెళ్లినీయకుండా బలగాలను మోహరించింది. ఎవరినీ రానివ్వొద్దని సైట్ ఇంజినీర్లకూ పైనుంచి ఆదేశాలున్నాయి. ఇలాంటి స్థితిలో ‘నమస్తే తెలంగాణ’ అతికష్టమ్మీద అక్కడికి చేరుకున్నది. నల్లగొండ బ్యూరో రిపోర్టర్ మర్రి మహేందర్రెడ్డి బృందం.. శరవేగంగా జరుగుతున్న పనుల వివరాలను ఫొటోలతో సహా సేకరించింది.
నాగార్జునసాగర్కు గండిపెట్టే పనులను ఏపీ యుద్ధ ప్రాతిపదికన కొనసాగిస్తున్నది. వందలాది మంది కార్మికులతో నిరంతరాయంగా పనులు చేపడుతున్నది. 2028 డిసెంబర్ నాటికి పూర్తిచేయాలనేది ఏపీ ప్రభుత్వ ప్లాన్గా తెలుస్తున్నది. తమ ప్రాజెక్టుకు రేవంత్రెడ్డి ప్రభుత్వం పరోక్షంగా సంపూర్ణ సహకారం అందిస్తున్నదని, ఆ తర్వాత మళ్లీ ఇదే ప్రభుత్వం వస్తుందో? లేదో? అనే ఆలోచనతో రేయింబవళ్లు శరవేగంగా పనులు చేపడుతున్నారు. సాగర్లో నీటిమట్టం 510 అడుగుల నుంచి నీటిని తరలించేలా ప్రాజెక్టు నిర్మిస్తున్నామని ఏపీ చెప్తున్నా.. 492 అడుగుల నుంచి కూడా తోడుకొనే అవకాశం ఉన్నదని సాగునీటిరంగ నిపుణులు పేర్కొంటున్నారు. కానీ.. 450 అడుగుల నీటిమట్టం నుంచి కూడా నీళ్లు తరలించేలా ఏర్పాట్లు చేస్తున్నారంటూ తాజాగా ఆరోపణలు వెల్లువెత్తుతున్నాయి. అంటే నదీ గర్భం నుంచి నీళ్లను తోడుకెళ్లి ఇటు తెలంగాణ ప్రజలకు, అటు కృష్ణమ్మకు ‘గర్భ’శోకం కలిగించేందుకు ఏపీ కంకణం కట్టుకున్నదన్నమాట. అయినా రేవంత్రెడ్డి ప్రభుత్వం నిమ్మకు నీరెత్తినట్టు వ్యవహరిస్తుండటం పలు అనుమానాలకు తావిస్తున్నది.
(మర్రి మహేందర్రెడ్డి)
నల్లగొండ ప్రతినిధి, నవంబర్ 20 (నమస్తే తెలంగాణ) : నాగార్జునసాగర్ ప్రాజెక్టు కుడివైపున రైట్బ్యాంక్ పరిధిలో ఏపీ ప్రభుత్వం ‘పల్నాడు వాటర్గ్రిడ్’ పనులను యథేచ్ఛగా, యుద్ధప్రాతిపదికన కొనసాగిస్తున్నది. నిత్యం వందలాది మంది కార్మికులతో, భారీ యంత్రాలతో నిర్మాణ పనులు చేపడుతున్నది. రైట్బ్యాంక్ నుంచి అనుపు వెళ్లే ప్రధాన రహదారి వెంట, సాగర్మాత ఆలయం దాటిన కొద్దిదూరంలోనే ఈ ప్రాజెక్టును నిర్మిస్తున్నది. సాగర్ రిజర్వాయర్ డెడ్స్టోరేజీకి చాలా దిగువన 492 అడుగుల నుంచి కూడా నీటిని తరలించేలా ఇన్టేక్ వెల్ నిర్మాణం జరుగుతున్నది. అది ఇప్పటికే సగానికి పైగా పూర్తయినట్టు చెప్తున్నారు. ఇన్టేక్ వెల్ నుంచి 300 మీటర్ల దూరంలోపే విశాలమైన స్థలంలో వాటర్ ట్రీట్మెంట్ ప్లాంట్ల కోసం రెండు భారీ సంపులను నిర్మిస్తున్నారు. ఇవి కూడా దాదాపు 25 శాతం పనులు పూర్తయినట్టు తెలుస్తున్నది. నీటిశుద్ధికి అవసరమైన ఇతర నిర్మాణాలను సైతం అక్కడే చేపట్టారు. మొత్తంగా ప్రాజెక్టు సివిల్ పనుల్లో 20 శాతం పనులు పూర్తయినట్టు స్థానికులు చెప్తున్నారు. ఇంత యథేచ్ఛగా పనులు కొనసాగుతున్నా, తెలంగాణ ప్రభుత్వం అటువైపు కన్నెత్తి చూడకపోవడం పలు అనుమానాలకు తావిస్తున్నది. ప్రాజెక్టు నిర్మాణ స్థలాన్ని శుక్రవారం ‘నమస్తే తెలంగాణ’ ప్రతినిధి సందర్శించగా విస్మయం కలిగించే వాస్తవాలు వెలుగు చూశాయి.

అమరజీవి జలధార ప్రాజెక్టు
ఏపీలోని కూటమి ప్రభుత్వం గుంటూరు, పల్నాడు జిల్లాలకు తాగునీటి సరఫరా పేరుతో నాగార్జునసాగర్ రిజర్వాయర్ ఒడ్డున చేపట్టిన ఈ భారీ ప్రాజెక్టును ప్రస్తుతానికి పల్నాడు వాటర్గ్రిడ్ అని పిలుస్తున్నా, అసలు పేరు ‘అమరజీవి జలధార’గా నిర్ణయించినట్టు సమాచారం. కేంద్రప్రభుత్వ జల్జీవన్ మిషన్ కింద రూ.1200 కోట్లతో దీని నిర్మాణం చేపడుతున్నట్టు ఏపీ తెలిపింది. దీనిద్వారా పల్నాడు ప్రాంత గ్రామాల్లో 200కు పైగా ఓవర్హెడ్ ట్యాంకుల నిర్మాణం చేపట్టి తాగునీటిని అందించనున్నట్టు వెల్లడించింది. ఏపీ ప్రభుత్వ గ్రామీణ నీటి సరఫరా విభాగం పర్యవేక్షణలో సాగర్ రిజర్వాయర్ నుంచి ఏడాది పొడవునా నీటిని తరలించేలా ఈ ప్రాజెక్టును డిజైన్ చేసిం ది. సాగర్ డ్యామ్ నుంచి రైట్బ్యాంక్కు వైపు దా దాపు కిలోమీటర్ దూరంలోనే అనుపు రోడ్డుకు అనుకుని మూడెకరాలకు పైగా విస్తీర్ణంలో గ్రిడ్ నిర్మాణ పనులు కొనసాగుతున్నాయి.
నదీగర్భం వరకు తోడుకునేలా నిర్మాణం
వాటర్గ్రిడ్ నిర్మాణ పనుల కోసం ఏపీ ప్రభుత్వం నాలుగు నెలల కిందటే జీవో ఇచ్చినా, ఇదేఏడాది ఫిబ్రవరిలోనే పనులను ప్రారంభించినట్టు సమాచారం. ముందుగా రిజర్వాయర్ నుంచి నీటిని తోడుకునేలా ఇన్టేక్ వెల్ నిర్మాణ పనులు మొదలుపెట్టారు. ఆగస్టులో సాగర్లో నీరు డెడ్స్టోరేజీకి దిగువకు వెళ్లిన సమయంలో శరవేగంగా పనులు కొనసాగించినట్టు విశ్వసనీయంగా తెలిసింది. శ్రీశైలం నుంచి నీళ్లొచ్చి నిండినా పనులకు ఆటంకం కలుగకుండా గ్రౌండ్ నుంచి కాంక్రీట్ పనులు త్వరితగతిన పూర్తిచేశారు. గురువారం సాగర్లో 534 అడుగుల నీటిమట్టం ఉన్నా పనులకు ఎలాంటి అంతరాయం కలుగడం లేదంటే పరిస్థితి అర్థం చేసుకోవచ్చు. ఇన్టేక్ వెల్ కాంక్రీట్ గోడల పనులు ఇప్పటికే పూర్తవడం గమనార్హం. లోపలి భాగంలో మైనర్ పనులు కొనసాగుతున్నాయి. సాగర్ రిజర్వాయర్ నుంచి వివిధ దశల్లో నీటిని తోడుకొనేలా ఇన్టేక్ వెల్ను డిజైన్ చేశారు. ప్రాథమిక సమాచారం ప్రకారం 570 అడుగుల వద్ద, డెడ్స్టోరీజీ 510 అడుగుల వద్ద, దిగువన 492 అడుగుల వద్ద నుంచి కూడా నీటిని తరలించేలా నిర్మాణం చేపట్టారు. కానీ 450 అడుగుల వద్ద నుంచి కూడా నీటిని తోడుకునే అవకాశం ఉన్నట్టు ఆరోపణలు ఉన్నాయి. రిజర్వాయర్ అంచునే దీనిని నిర్మిస్తుండటంతో సాగర్ నిండితే ఇన్టేక్ వెల్ మునిగిపోతుంది.
నీటిశుద్ధికి భారీ సంపులు
ఇన్టేక్ వెల్ పక్కనే పంపుహౌస్ నిర్మాణం కోసం స్థలాన్ని చదును చేశారు. అక్కడి నుంచి భారీ పైపుల ద్వారా 300 మీటర్ల దూరంలో ఉన్న భారీ సంపుల్లోకి నీటిని తరలించనున్నారు. నీటి శుద్ధికోసం రెండు సంపులను నిర్మిస్తున్నారు. అనుపు రోడ్డుకు ఆనుకొనే ఈ నిర్మాణాలు చేపట్టారు. శుక్రవారం కూడా సంపుల వద్ద కాంక్రీట్ పనులు ముమ్మరంగా జరిగాయి. గ్రౌండ్ నుంచి మీటర్కు పైగా ఎత్తు వరకు కాంక్రీట్ నిర్మాణం పూర్తయింది. వీటి పక్కనే నీటి శుద్ధికి అవసరమైన ఇతర నిర్మాణాలు సైతం కొనసాగుతున్నాయి. శుక్రవారం మధ్యాహ్నం ప్రాజెక్టు ప్రాంతంలో పలు వెట్మిక్స్ ట్యాంకర్లు కాంక్రీట్ను నింపుతుండగా, కార్మికులు ఇతర పనుల్లో నిమగ్నమై కనిపించారు. వీటి పక్కనే మరికొన్ని నిర్మాణాల కోసం సెంట్రింగ్ పనులు కొనసాగుతున్నాయి. దానిపక్కనే ఖాళీ స్థలాన్ని హిటాచీలు, జేబీఎస్లతో చదును చేస్తున్నారు. ఇలా ఏకకాలంలో వివిధ స్ట్రక్చర్ల నిర్మాణ పనులు జరుగుతున్నాయి. ఇదే ప్రాజెక్టు సైట్లో ఇప్పటికే భారీ పైపులు సైతం సిద్ధంగా ఉంచారు. ఇన్టేక్ వెల్ నుంచి నీటిని భారీ సంపులకు తరలించేందుకు ఈ భారీ పైపులను వినియోగించనున్నట్టు తెలిసింది. ఇన్టేక్ వెల్ వద్ద త్వరలోనే పంపుహౌస్ నిర్మాణ పనులు ప్రారంభించి అక్కడి నుంచి ఇక్కడికి నీటిని తరలించి శుద్ధి చేసేందుకు ఈ పైప్లైన్ పనులు కూడా మొదలు పెట్టనున్నట్టు తెలిసింది. మొత్తంగా ప్రాజెక్టు పనుల్లో ఇప్పటికే 20 శాతం మేర పూర్తయినట్టు తెలిసింది.

రెండేండ్లలో పూర్తయ్యేలా ప్లాన్
అమరజీవి జలధార పథకం పనులను రెండు దశల్లో పూర్తి చేయనున్నారు. మొదటి దశను 2027 నాటికి పూర్తిచేసేలా ప్లాన్ చేశారు. పల్నాడు, గుంటూరు జిల్లాల పరిధిలోని 11 మండలాల్లోని 363 గ్రామాల్లో నివసిస్తున్న 10 లక్షల మందికి తాగునీరు అందించాలని లక్ష్యంగా పెట్టుకొన్నట్టు సమాచారం. 2028 డిసెంబర్లోగా రెండో దశ కూడా పూర్తి చేయనున్నట్టు తెలిసింది. ప్రస్తుత కాంగ్రెస్ ప్రభుత్వంతో తమకు ఎలాంటి ఇబ్బందులు కలుగడం లేదని, 2028 డిసెంబర్లో బీఆర్ఎస్ అధికారంలోకి వస్తే కచ్చితంగా అడ్డుకుంటుందని భావిస్తున్నట్టు తెలిసింది. పైకి మంచినీళ్ల ముసుగులో తరలిస్తున్నారని, వాటితో
చెరువులు నింపుతారనే ఆరోపణలు వెల్లువెత్తుతున్నాయి.
ప్రాజెక్టు వద్ద నిఘా
ఇన్టేక్ వెల్ వద్ద ఏపీ సర్కార్ ప్రత్యేక నిఘాను ఏర్పాటుచేసింది. పనులపై తెలంగాణ నుంచి అభ్యంతరాలు వస్తుండటంతో ఏపీ ప్రభుత్వంతోపాటు నిర్మాణ సంస్థ అప్రమత్తమైనట్టు క్షేత్రస్థాయి పరిస్థితులు స్పష్టంచేస్తున్నాయి. గత నాలుగైదు రోజులుగా అక్కడికి ఎవరెవరు వస్తున్నారు? ఎందుకోసం వస్తున్నారు? ఎక్కడి నుంచి వస్తున్నారు? వంటి వివరాలన్నీ ఆరా తీస్తూ ఎప్పటికప్పుడు సమాచారం సేకరిస్తున్నారు. వచ్చిన వారి వాహనాలకు తెలంగాణ రిజిస్ట్రేషన్ ఉంటే ప్రత్యేకంగా పరిశీలిస్తున్నారు. ఫొటోలు, వీడియోలు తీయొద్దని స్పష్టం చేస్తున్నారు. అడిగితే తమకు పైఅధికారులు సీరియస్గా చెప్పారని అడ్డుకొంటున్నారు.
నేటికీ జాడలేని నోటీసులు
ఏపీ నిర్మిస్తున్న పల్నాడు వాటర్గ్రిడ్ విషయంలో సాగర్ సర్కిల్లోని ఎస్ఈ, ఈఈలను బాధ్యులను చేస్తూ ఇప్పటికే షోకాజు నోటీసులు ఇస్తున్నట్టు ఇరిగేషన్ సెక్రటరీ బుధవారమే ప్రకటించారు. కానీ శుక్రవారం సాయంత్రం వరకు కూడా ఆ నోటీసులు వారికి చేరలేదు. సంబంధిత అధికారులు సైతం శుక్రవారం కార్యాలయానికి రాలేదని సిబ్బంది తెలిపారు. నోటీసుల జారీలోనే ఇంత జాప్యం జరిగితే.. ఇక ప్రభుత్వ స్పందనకు ఎన్నాళ్లు పడుతుందోనన్న సందేహాలు నెలకొన్నాయి.
కన్నెత్తి చూడని తెలంగాణ సర్కార్
సాగర్ నుంచి నీటిని తరలించే పనులను ఈ ఏడాది ఫిబ్రవరి నుంచి ఏపీ సర్కార్ బహిరంగంగా కొనసాగిస్తున్నా.. తెలంగాణ ప్రభుత్వం అటువైపు కూడా కన్నెత్తి చూడటమే లేదు. అడ్డుకొనే ప్రయత్నం కూడా చేయడం లేదు. ఇదే ఇప్పుడు తీవ్ర వివాదంగా మారింది. సాగర్ సర్కిల్లో సీఈతోపాటు ఎస్ఈలు, ఈఈలు, క్షేత్రస్థాయిలోని ఏఈల వరకు చాలామంది అధికారులు విధుల్లో ఉన్నారు.
అయినా దీని గురించి పట్టించుకోకపోవడంపై అనుమానాలు తలెత్తుతున్నాయి. సాగర్ సర్కిల్లో కీలకమైన ఎస్ఈ ఒకరు ఆంధ్ర ప్రాంతానికి చెందిన వ్యక్తి కావడం, దీన్ని ఉద్దేశపూర్వకంగా తేలికగా తీసుకోవడంతో ఇంతదాకా వచ్చిందనేది ఇప్పటికే స్పష్టమైంది. డీఈ, ఏఈలు ఏపీ సర్కార్ పనులను పరిశీలించి వచ్చి విషయాన్ని సంబంధిత ఎస్ఈకి తెలిపినా ఆయన తాగునీటి ప్రాజెక్టే కదా అని తేలికగా కొట్టిపారేసినట్టు తెలిసింది. ఇదే సమయంలో ఇంటెలిజెన్స్ విభాగం వైఫల్యం కూడా కొట్టొచ్చినట్టు కనిపిస్తున్నది. కనీసం ఈ విభాగం కూడా అటువైపు దృష్టి సారించకపోవడం ఏందన్నది చర్చనీయాంశంగా మారింది. ఇందులో సైతం ఓ ఆంధ్ర అధికారే పనిచేస్తున్నట్టు సమాచారం. ఇలా ప్రభుత్వ పెద్దలకు గానీ, ఇరిగేషన్ ఉన్నతాధికారులకు గానీ ఈ విషయం తెలియకపోవడంతో ఏపీ సర్కార్ గత ఐదారు నెలలుగా యథేచ్ఛగా పనులు నిర్వహిస్తున్నది. ఇరిగేషన్ మంత్రి ఉత్తమ్కుమార్రెడ్డికి కూడా ఈ విషయం తెలియకపోవడం విస్మయాన్ని కలిగిస్తున్నది.
Read Today's Latest Telangana News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

