స్నేహ హస్తం.. రక్షణ కవచం..

ఓ వైపు శాంతిభద్రతల పరిరక్షణకు విశేష కృషిచేస్తూనే మరోవైపు ఫ్రెండ్లీ పోలీసింగ్‌తో ప్రజలకు చేరువై పోలీసు శాఖ తనదైన ముద్రవేసుకున్నది. సమైక్య సర్కారుకు భిన్నంగా కొంగొత్త విధానాలు, ఆధునిక సాంకేతికతను అందిపుచ్చుకుంటూ సమర్థవంతమైన సేవలతో స్వరాష్ట్రంలో పోలీసు వ్యవస్థ మెరుగుపడింది.

• స్వరాష్ట్రంలో మెరుగైన పోలీస్‌ వ్యవస్థ
• శాంతిభద్రతల పరిరక్షణతో వేగంగా అభివృద్ధి.. సత్ఫలితాలనిస్తున్న ఫ్రెండ్లీ పోలీస్‌ విధానం
• ఎస్సీ, ఎస్టీ కేసుల విచారణ వేగవంతం, అందిన రూ.6 కోట్ల సాయం
• 10వేల కమ్యూనిటీ, 40వేల ‘నేను సైతం’ కెమెరాలు
• సైబర్‌ నేరాల నియంత్రణలో నంబర్‌ వన్‌
• 247మందిపై పీడీ యాక్ట్‌
• ప్రజలకు అండగా వరంగల్‌ కమిషనరేట్‌ పోలీసులు
• నేడు సురక్షా దినోత్సవం

ఓ వైపు శాంతిభద్రతల పరిరక్షణకు విశేష కృషిచేస్తూనే మరోవైపు ఫ్రెండ్లీ పోలీసింగ్‌తో ప్రజలకు చేరువై పోలీసు శాఖ తనదైన ముద్రవేసుకున్నది. సమైక్య సర్కారుకు భిన్నంగా కొంగొత్త విధానాలు, ఆధునిక సాంకేతికతను అందిపుచ్చుకుంటూ సమర్థవంతమైన సేవలతో స్వరాష్ట్రంలో పోలీసు వ్యవస్థ మెరుగుపడింది. మత ఘర్షణలకు తావులేకుండా ప్రశాంతమైన జీవనం గడిపేలా భద్రతకు భరోసానిస్తున్న ఫలితంగా అభివృద్ధి వేగంగా జరుగుతున్నది. ఇటు రాష్ట్ర ప్రభుత్వ ఆకాంక్షలకు ఆనుగుణంగా పనిచేస్తూనే కేసుల పరిష్కారం, సైబర్‌ నేరాల నియంత్రణలో వరంగల్‌ కమిషనరేట్‌ మొదటి వరుసలో ఉన్నది. అంతేగాక బాధితులకు చేయూతనిస్తూ యువతకు జాబ్‌మేళాలు, ప్రజలను అప్రమత్తం చేసే అవగాహన కార్యక్రమాలతో ముందుకు సాగుతున్నది. ఈ మేరకు పోలీస్‌ శాఖ అందిస్తున్న సేవల నేపథ్యంలో తెలంగాణ అవతరణ దశాబ్ది ఉత్సవాల్లో భాగంగా నేడు సురక్షా దినోత్సవం నిర్వహించనుండగా ఉమ్మడి జిల్లా వ్యాప్తంగా ఏర్పాట్లు పూర్తయ్యాయి. 

వరంగల్‌, జూన్‌ 3(నమస్తే తెలంగాణ ప్రతినిధి) : తెలంగాణ ప్రభుత్వ ఆకాంక్షలకు అనుగుణంగా తొమ్మిదేండ్లలో పోలీసుల పనితీరు మెరుగుపడింది. తెలంగాణ రాష్ట్ర ఏర్పాటు తర్వాత బీఆర్‌ఎస్‌ ప్రభుత్వం గత ప్రభుత్వాలకు భిన్నంగా ఉన్నత ఆలోచనతో ఫ్రెండ్లీ పోలీసింగ్‌ విధానాన్ని తీసుకొచ్చింది. ప్రజలు, పోలీసులు స్నేహపూర్వక వాతావరణాన్ని కల్పించే లక్ష్యం తో పోలీస్‌స్టేషన్‌కు వచ్చే ఫిర్యాదుదారులతో మర్యాదపూర్వకంగా వ్యవహరించే విధానాన్ని అమల్లోకి తెచ్చిం ది. దీనితో ఫిర్యాదుదారులకు భరోసా కలుగుతున్నది. మహిళల కోసం ప్రతి పోలీస్‌స్టేషన్‌లో ఉమెన్‌ హెల్ప్‌డెస్క్‌లను ఏర్పాటుచేసింది. ఆన్‌లైన్‌, సోషల్‌ మీడియా, డయల్‌ 100కు వచ్చే ఫిర్యాదులపై పోలీసు శాఖ తక్షణమే స్పందిస్తూ ప్రజలతో స్నేహపూర్వకంగా ఉంటూ నేరస్థుల పట్ల కఠినంగా వ్యవహరిస్తున్నది. తెలంగాణ రాష్ట్రం ఏర్పాటు తర్వాత రాష్ట్ర ప్రభుత్వం మహిళల భద్రతకు ప్రాధాన్యత ఇచ్చింది. మహిళను వేధింపులకు గురిచేసే ఆకతాయిల భరతం పట్టేందుకు ప్రత్యేకంగా షీ టీంలను ఏర్పాటు చేసింది. అపదలో ఉన్న మహిళలకు తక్షణ సాయం చేసేందుకు వీలుగా హాక్‌ ఐ లాంటి సెల్‌ఫోన్‌ అప్లికేషన్‌ను వినియోగంలోకి తెచ్చింది. లైంగిక వేధింపులకు గురైన మహిళలు, చిన్నారులకు అసరాగా నిలిచేందుకు భరోసా కేంద్రాల ఏర్పాటుచేసింది. పోలీసు ఉద్యోగ నియమాకాల్లో మహిళలకు 33 శాతం రిజర్వేషన్‌ అమలుచేస్తున్నది. ప్రజలకు పోలీసులు అనునిత్యం దగ్గరగా ఉండడంతో పాటు శాంతిభద్రతలపై ప్రజలకు భరోసా కల్పించేందుకు, సత్వర సహాయాన్ని అందించేందు రాష్ట్ర ప్రభుత్వం ‘డయల్‌ 100’ను అమలులోకి తెచ్చింది. తద్వారా అందిన ఫిర్యాదులుపై ఐదు నిమిషాల్లోనే ఘటనా స్థలానికి చేరుకుని సమస్యను పరిష్కరిస్తున్నారు. శాంతిభద్రతలు మెరుగ్గా ఉండడంతో అభివృద్ధి

వేగంగా జరుగుతున్నది.

• అసాంఘిక కార్యకలాపాలపై వరంగల్‌ కమిషనరేట్‌ పోలీసులు ప్రత్యేక దృష్టిసారించారు. పట్టణ, గ్రామీణ ప్రాంతాల్లో గుడుంబా తయారీ, అమ్మకాలను నియంత్రించారు. యువతను మత్తుకు బానిసలుగా మార్చుతున్న గంజాయి రవాణా, విక్రయాలపై కఠినంగా వ్యవహరిస్తున్నారు. గంజాయి స్మగ్లర్లపై, అసాంఘిక కార్యకలపాలకు పాల్పడే వారిపై పీడీ యాక్టుల కింద కేసులు నమోదు చేస్తున్నది. పేకాట, మట్కాలను అదుపు చేసేందుకు వరంగల్‌ కమిషనరేట్‌ పోలీసులు ప్రత్యేక చర్యలు తీసుకుంటున్నారు.
• రాష్ట్ర ప్రభుత్వ లక్ష్యాలకు అనుగుణంగా పోలీస్‌ శాఖ ఎస్సీ, ఎస్టీ బాధితులకు అండగా నిలుస్తున్నది. ఈ కేసుల విచారణ త్వరగా పూర్తి చేస్తున్నది. వరంగల్‌ కమిషనరేట్‌లో ఇప్పటివరకు 6 కోట్ల రూపాయలను ఈ బాధితులకు చేయూతగా ప్రభుత్వం అందించింది.
• తెలంగాణ ప్రజానీకం పెద్ద ఎత్తున మోసపోయే వైట్‌కాలర్‌ నేరాలు, జాబ్‌ ఫ్రాడ్స్‌, ల్యాండ్‌ మాఫియా, చిట్‌ఫండ్‌, మల్టీలెవల్‌ మారెటింగ్‌ మోసాలు వంటి కేసులను త్వరితగతిన పరిషరించి ప్రజలకు భరోసా కల్పిస్తున్నారు. తరచూ నేరాలు చేసే 247మందిపై పీడీ యాక్టు కింద కేసులు నమోదు చేశారు.
• టెక్నాలజీతో పాటు పెరుగుతున్న సైబర్‌ నేరాల నియంత్రణకు రాష్ట్ర ప్రభుత్వం అందిస్తున్న సహకారంతో దేశంలో ఎకడా లేని విధంగా సైబర్‌ నేరాలను దర్యాప్తు చేయడం, నిందితులను పట్టుకోవడంలో వరంగల్‌ పోలీసులు ప్రథమ స్థానంలో ఉన్నారు.
• హెల్మెట్‌ వాడకం, పరిమిత వేగంతో వెళ్లేలా ప్రజలకు అవగాహన కల్పించి రోడ్డు ప్రమాదాలను తగ్గించేందుకు ప్రత్యేక కార్యక్రమాలు నిర్వహిస్తున్నారు.
• ప్రజల సహకారంతో కమిషనరేట్‌ పరిధిలో ఇప్పటివరకు దాదాపు 10వేల కమ్యూనిటీ కెమెరాలు, 40వేల ‘నేను సైతం’ కెమెరాలు అమర్చి వాటి సాయంతో ఎన్నో కీలక కేసులను సులభంగా ఛేదించారు.
• నకిలీ విత్తనాలతో రైతులు మోసపోకుండా పోలీసులు కఠినంగా వ్యవహరిస్తున్నారు. వడ్ల కొనుగోలు కేంద్రాల్లో రైతులు మోసపోకుండా తనిఖీలు చేసి నిరంతరం పర్యవేక్షిస్తున్నారు. రైతులను మోసం చేసే వారిపై చట్టపరమైన చర్యలు తీసుకుంటున్నారు.
• కరోనా విపత్తు సమయంలో ప్రాణాలను పణంగా పెట్టి నిరంతరం విధులు నిర్వర్తించారు. చికిత్సకు అవసరమైన మందుల కొరత రాకుండా, కరోనా బాధితులకు మెరుగైన చికిత్స అందించేందుకు వైద్య, ఆరోగ్య శాఖతో కలిసి పనిచేశారు. వలస కూలీలు ఇబ్బందులకు పడకుండా నిత్యావసర వస్తువులు అందించారు. వారు సొంతూరికి వెళ్లేందుకు సహకరించారు.
• ప్రభుత్వ, ప్రైవేట్‌ ఉద్యోగాల నియామకాల కోసం నిర్వహించే పోటీ పరీక్షల్లో అవకాశాలు దక్కించుకునేందుకు వీలుగా వరంగల్‌ కమిషనరేట్‌ ఆధ్వర్యంలో గ్రామీణ, పట్టణ యువతకు ఉచితంగా పోటీ పరీక్షల శిక్షణ తరగతులు నిర్వహించారు. నిరుద్యోగ యువత కోసం పోలీసుల అధ్వర్యంలో జాబ్‌మేళాలు నిర్వహించి వివిధ కంపెనీల్లో అవకాశాలు కల్పించారు.
• ప్రభుత్వ ఆదేశాలకు అనుగుణంగా పోలీసులు తీసుకుంటున్న చర్యలు ఎలాంటి మత ఘర్షణలు లేకుండా చేశాయి. అన్ని మతాల వారు ప్రశాంతమైన వాతావరణంలో తమ పండగలను నిర్వహించుకునేలా పోలీసులు బాధ్యతలు నిర్వహిస్తున్నారు.