ఆడబిడ్డలకు అవమానంపై ఆగ్రహజ్వాల

అసెంబ్లీ సాక్షిగా సీఎం రేవంత్‌రెడ్డి ఆడబిడ్డలపై అనుచిత వ్యాఖ్యలు చేయడంపై బీఆర్‌ఎస్‌ శ్రేణులు భగ్గుమన్నాయి. పార్టీ సీనియర్‌ మహిళా శాసనసభ్యులు సబితా ఇంద్రారెడ్డి, సునీతా లక్ష్మారెడ్డిని కించపరిచేలా మాట్లాడిన సీఎంకు వ్యతిరేకంగా ఉమ్మడి జిల్లావ్యాప్తంగా గురువారం నిరసనలు మిన్నంటాయి. బీఆర్‌ఎస్‌ అధిష్టానం పిలుపు మేరకు ముఖ్యమంత్రి దిష్టిబొమ్మలను దహనం చేశాయి.

• సీఎం, డిప్యూటీ సీఎం అనుచిత వ్యాఖ్యలపై భగ్గుమన్న బీఆర్‌ఎస్‌
• ఉమ్మడి జిల్లావ్యాప్తంగా మిన్నంటిన నిరసనలు
• రేవంత్‌ దిష్టిబొమ్మల దహనం
• హనుమకొండలో నిప్పంటుకొని మహిళా కార్యకర్తకు గాయాలు
• బేషరతుగా క్షమాపణ చెప్పాలని డిమాండ్‌

అసెంబ్లీ సాక్షిగా సీఎం రేవంత్‌రెడ్డి ఆడబిడ్డలపై అనుచిత వ్యాఖ్యలు చేయడంపై బీఆర్‌ఎస్‌ శ్రేణులు భగ్గుమన్నాయి. పార్టీ సీనియర్‌ మహిళా శాసనసభ్యులు సబితా ఇంద్రారెడ్డి, సునీతా లక్ష్మారెడ్డిని కించపరిచేలా మాట్లాడిన సీఎంకు వ్యతిరేకంగా ఉమ్మడి జిల్లావ్యాప్తంగా గురువారం నిరసనలు మిన్నంటాయి. బీఆర్‌ఎస్‌ అధిష్టానం పిలుపు మేరకు ముఖ్యమంత్రి దిష్టిబొమ్మలను దహనం చేశాయి. పలుచోట్ల దహనాన్ని పోలీసులు అడ్డుకోగా కొంత ఉద్రిక్తత చోటుచేసుకుంది. ఈ సందర్భంగా పెద్ద ఎత్తున పాల్గొన్న మహిళలు, బీఆర్‌ఎస్‌ నాయకులు, కార్యకర్తలు రేవంత్‌ వెంటనే క్షమాపణ చెప్పాలని డిమాండ్‌ చేశారు.

– నమస్తే నెట్‌వర్క్‌, ఆగస్టు 1

• హనుమకొండలోని కాళోజీ విగ్రహం వద్ద బీఆర్‌ఎస్‌ జిల్లా అధ్యక్షుడు దాస్యం వినయ్‌భాస్కర్‌ ఆధ్వర్యంలో ఆందోళన చేపట్టారు. సీఎం రేవంత్‌రెడ్డి డౌన్‌ డౌన్‌, మహిళలకు క్షమాపణ చెప్పాలని అంటూ నినాదాలు చేస్తూ రోడ్డుపై బైఠాయించారు. అనంతరం సీఎం దిష్టి బొమ్మను దహనం చేస్తుండగా పోలీసులు అడ్డుకునేందుకు యత్నించగా కొద్దిసేపు ఉద్రిక్తత చోటుచేసు కుంది. పట్టు వదలని బీఆర్‌ఎస్‌ శ్రేణులు దిష్టిబొమ్మ ను దహనం చేస్తున్న క్రమంలో అక్కడున్న మహిళా కార్యకర్తకు నిప్పంటుకొని స్వల్ప గాయాలయ్యాయి. అలాగే జిల్లాలోని పరకాల, ఎల్కతుర్తి, వేలే రు మండలాల్లో బీఆర్‌ఎస్‌ నాయకులు, కార్యకర్తలు ఆందోళన చేపట్టి సీఎం దిష్టిబొమ్మలను దహనం చేశారు. వేలేరు లో దిష్టిబొమ్మ దహనాన్ని పోలీసులు అడ్డుకున్నారు.
• జనగామ జిల్లాలోని జనగామ, పాలకుర్తి, స్టేషన్‌ఘన్‌పూర్‌ నియోజకవర్గాల్లోని పలు మండల కేంద్రాల్లో పెద్ద ఎత్తున నిరసన చేపట్టారు. జనగామ చౌరస్తాలో మహిళలు, పార్టీ శ్రేణులు ర్యాలీగా వచ్చి సీఎం దిష్టిబొమ్మ దహనానికి యత్నించగా పోలీసులు అడ్డుకున్నారు. పార్టీ నాయకుల చేతుల్లో ఉన్న బొమ్మను లాగేసుకునే ప్రయత్నంలో జరిగిన పెనుగులాట కొద్దిసేపు ఉద్రిక్తతకు దారితీసింది.
• వరంగల్‌ నగరంతోపాటు నర్సంపేట, వర్ధన్నపేట మండల కేంద్రాల్లో బీఆర్‌ఎస్‌ శ్రేణులు ఆందోళనలు చేపట్టాయి. నర్సంపేటలో సీఎం దిష్టిబొమ్మను దహనం చేయగా, వరంగల్‌ చౌరస్తాలో తూర్పు నియోజకవర్గ మాజీ ఎమ్మెల్యే నన్నపునేని నరేందర్‌ ఆధ్వర్యంలో నిరసన చేపట్టి సీఎం రేవంత్‌రెడ్డికి వ్యతిరేకంగా నినాదాలు చేశారు.
• మహబూబాబాద్‌ జిల్లాలోని తొర్రూరు బస్టాండ్‌ ఎదుట సీఎం చిత్రపటంతో కూడిన ఫ్లెక్సీని, పెద్దవంగర మండల కేంద్రంలో దిష్టిబొమ్మను బీఆర్‌ఎస్‌ శ్రేణులు దహనం చేశాయి.
• జయశంకర్‌ భూపాలపల్లి జిల్లా కేంద్రంలోని అంబేద్కర్‌ సెంటర్‌లో బీఆర్‌ఎస్‌ నాయకులు, కార్యకర్తలు సీఎం దిష్టి బొమ్మను దహనం చేశారు. వెంటనే రేవంత్‌రెడ్డి మహిళా ఎమ్మెల్యేలకు క్షమాపణ చెప్పాలని డిమాండ్‌ చేశారు.

సీఎం రేవంత్‌ రెడ్డి వెంటనే క్షమాపణ చెప్పాలి

• బీఆర్‌ఎస్‌ మహబూబాబాద్‌ జిల్లా అధ్యక్షురాలు మాలోత్‌ కవిత

మహబూబాబాద్‌, ఆగస్టు 1 (నమస్తే తెలంగాణ) : బీఆర్‌ఎస్‌ ఎమ్మెల్యేలు సబితా ఇంద్రారెడ్డి, సునీతా లక్ష్మారెడ్డికి సీఎం రేవంత్‌రెడ్డి బేషరతుగా క్షమాపణ చెప్పాలని ఆ పార్టీ జిల్లా అధ్యక్షురాలు, మహబూబాబాద్‌ మాజీ ఎంపీ మాలోత్‌ కవిత గురువారం ఒక ప్రకటనలో డిమాండ్‌ చేశారు.

నిండు శాసనసభలో సీఎం ఇష్టం వచ్చినట్లు మాట్లాడటం సరైంది కాదని, ఆడబిడ్డలంటే అంత అలుసెందుకన్నారు. అసెంబ్లీలో ఆడబిడ్డల ఆత్మగౌరవంపై ప్రశ్నిస్తే బీఆర్‌ఎస్‌ నేతలను అక్రమంగా అరెస్ట్‌ చేయించడం ఎంతవరకు సమంజసమన్నారు. ప్రజలు తగిన సమయంలో గుణపాఠం చెప్తారని కవిత పేర్కొన్నారు.