KU campus | కేయూ క్యాంపస్‌ నెట్‌వర్కింగ్‌ పనులు బీఎస్ఎన్‌ఎల్‌కు అప్పగింత

కాకతీయ విశ్వవిద్యాలయ క్యాంపస్‌ నెట్‌ వర్కింగ్‌ వ్యవస్థను ఆధునికీకరించి, మరింత సమర్థవంతంగా మార్చేందుకు కేయూ బీఎస్ఎన్‌ఎల్‌కు వర్క్​‍ఆర్డర్‌ను జారీ చేసినట్లు రిజిస్ట్రార్‌ ప్రొఫెసర్‌ వల్లూరి రామచంద్రం తెలిపారు.

హనుమకొండ చౌరస్తా, డిసెంబర్‌ 3 : కాకతీయ విశ్వవిద్యాలయ క్యాంపస్‌ నెట్‌ వర్కింగ్‌ వ్యవస్థను ఆధునికీకరించి, మరింత సమర్థవంతంగా మార్చేందుకు కేయూ బీఎస్ఎన్‌ఎల్‌కు వర్క్​‍ఆర్డర్‌ను జారీ చేసినట్లు రిజిస్ట్రార్‌ ప్రొఫెసర్‌ వల్లూరి రామచంద్రం తెలిపారు. ఈ సందర్భంగా బీఎస్ఎన్‌ఎల్‌ నుంచి జనరల్‌ మేనేజర్‌ అరవింద్‌కుమార్‌, డిప్యూటీ జనరల్‌ మేనేజర్‌ వి.కిషన్‌, అసిస్టెంట్‌ జనరల్‌ మేనేజర్‌ సురేష్‌, రజనికర్‌రెడ్డి, డివిజనల్‌ ఇంజనీర్‌లతో పాటు విశ్వవిద్యాలయ తరఫున రూసా నోడల్‌ అధికారి ఆర్‌.మల్లికార్జునరెడ్డి, అభివృద్ధి అధికారి ఎన్‌.వాసుదేవరెడ్డి, కంప్యూటర్‌ సైన్స్​‍ విభాగాధిపతి బి.రమ, క్యాంపస్ నెట్‌వర్కింగ్‌ సంచాలకులు డి.రమేష్‌ పాల్గొన్నారు.

వారి సమక్షంలో వర్క్​‍ఆర్డర్‌కు సంబంధించిన విధులు, విధానాలపై సమీక్షా సమావేశం నిర్వహించారు. ఈ సమావేశానికి వైస్ ఛాన్సలర్‌ ప్రొఫెసర్‌ కర్నాటి ప్రతాప్‌రెడ్డి, రిజిస్ట్రార్‌ ప్రొఫెసర్‌ వల్లూరి రామచంద్రం హాజరయ్యారు. రూసా నిధులతో విశ్వవిద్యాలయ కే-హబ్‌లో స్టార్ట్‍ అప్స్​‍,అంకుర సంస్థలను ప్రోత్సహించడం, మౌలిక వసతులను అభివృద్ధి చేయడం, క్యాంపస్లో ఇంటర్నెట్‌ సదుపాయాలను మరింత మెరుగుపరచడం, రూసా అనుమతి పొందిన, సాంక్షన్‌ అయిన ప్రాజెక్టులకు, అలాగే ఇంజనీరింగ్‌ కళాశాలలో కొనసాగుతున్న రీసెర్చ్‌ ప్రాజెక్టులకు అవసరమైన నెట్‌వర్క్​‍మద్దతును విస్తరించడం లక్ష్యంగా ఈ వర్క్​‍ఆర్డర్‌ జారీ చేసినట్లు తెలిపారు. క్యాంపస్ నెట్‌వర్కింగ్‌ వ్యవస్థను అభివృద్ధి చేసి, సామర్థ్యాన్ని పెంపొందించడానికి బీఎస్ఎన్‌ఎల్‌ సహకారంతో రూ.1.29 కోటి వెచ్చించనున్నట్లు రిజిస్ట్రార్‌ తెలిపారు.