నకిలీలుంటాయ్ జాగ్రత్త..!

రోహిణి కార్తె వచ్చిందంటే రైతులు విత్తనాలు కొనుగోలు చేయడం ప్రారంభిస్తారు. ఇదే అదునుగా నాసిరకం విత్తనాలను అంటగట్టేందుకు కొందరు విత్తన విక్రయ దళారులు గ్రామాల్లోకి వెళ్లి రైతులను నమ్మిస్తూ వారికి అంటగడుతున్నారు.

• వ్యవసాయ శాఖ సూచనలు పాటించాల్సిందే..
• విత్తనాలు కొన్న వెంటనే తప్పకుండా రసీదు పొందాలి
• విత్తన కొనుగోళ్లపై అవగాహన తప్పనిసరి
• ఫేక్‌ సీడ్స్‌ విక్రయదారులను నమ్మి మోసపోవద్దు

జయశంకర్‌ భూపాలపల్లి, మే 21 (నమస్తే తెలంగాణ) : రోహిణి కార్తె వచ్చిందంటే రైతులు విత్తనాలు కొనుగోలు చేయడం ప్రారంభిస్తారు. ఇదే అదునుగా నాసిరకం విత్తనాలను అంటగట్టేందుకు కొందరు విత్తన విక్రయ దళారులు గ్రామాల్లోకి వెళ్లి రైతులను నమ్మిస్తూ వారికి అంటగడుతున్నారు. తీరా విత్తనం వేసిన తర్వాత మొలకెత్తవు. అప్పుడుగానీ అవి నాసిరకమని తెలియక మోసపోవడం రైతు వంతవుతుంది. ఇలాంటి ఇబ్బందులు రాకుండా వ్యవసాయాధికారుల సూచనలు పాటిస్తే మేలు. మరోవైపు రాష్ట్ర ప్రభుత్వం నకిలీ విత్తనాలను కట్టడి చేసేందుకు పకడ్బందీ చర్యలు తీసుకుంటోంది. ఇందుకుగాను వ్యవసాయ, పోలీస్‌ తదితర శాఖలను సమన్వయం చేస్తూ నకిలీ కట్టడికి ఎప్పటికప్పుడు అప్రమత్తం చేస్తూనే ఉంది. కఠిన నిబంధనలు కూడా తీసుకొచ్చింది. అయినప్పటికీ కొన్నిచోట్ల రైతులను దళారులు మోసం చేస్తున్న సంఘటనలు వెలుగుచూస్తున్నాయి. ఈ క్రమంలో రైతులు అప్రమత్తంగా ఉండాలని అధికారులు సూచిస్తున్నారు.

రైతులు ఈ జాగ్రత్తలు పాటించాలి

• విత్తనాలు కొనే సమయంలో డీలర్‌ వద్ద కచ్చితంగా బిల్లు అడిగి తీసుకోవాలి. బిల్లు లేనిదే విత్తనాలను తీసుకోవద్దు.
• విత్తన ప్యాకెట్లు కొనుగోలు చేసే సమయంలో విత్తన తయారీ తేదీ, గడువు తేదీ తప్పనిసరిగా చూసుకోవాలి. గడువు ముగిసిన విత్తనాలను ఎట్టి పరిస్థితిలో కొనవద్దు.
• లైసెన్స్‌ కలిగి ఉన్న డీలర్‌ వద్ద మాత్రమే విత్తనాలు కొనాలి. దళారులు, విడిగా అమ్మేవారి దగ్గర తీసుకోవద్దు.
• ఎంఆర్‌పీ కంటే ఎక్కువ ధర చెల్లించి కొనొద్దు.
• రైతులు 100 విత్తనాలను తడిసిన నేలలో గానీ, తడిసిన గుడ్డ సంచిలో గానీ మూడు, నాలుగు రోజులు ఉంచి 80శాతానికి పైగా మొలిచిందీ లేనిది చూసుకోవాలి. ఇలా విత్తనాల మొలక శాతం పరీక్షించిన తర్వాతే విత్తనాలను విత్తుకోవాలి.
• విత్తనాలు కనీసం మొలక శాతం కన్నా తక్కువ ఉంటే కొనుగోలు చేసిన డీలర్‌ వద్దకు వెళ్లి వాపస్‌ ఇవ్వడంతో పాటు సంబంధిత వ్యవసాయాధికారికి ఫిర్యాదు చేయాలి.
• రైతులు వరి విత్తనాలను తామే సొంతంగా తయారు చేసుకొని విత్తుకోవచ్చు.
• ప్రభుత్వ అనుమతి లేని పత్తి విత్తనాలను కొనడం, విత్తడం చేయవద్దు.
• చిరిగిన ప్యాకెట్లలో, గుడ్డ సంచుల్లో అమ్మే విత్తనాలను కొనవద్దు.
• విత్తనం కొన్న బిల్లు, ఖాళీ విత్తన సంచులను పంటకాలం అయిపోయే వరకు రైతులు భద్రపరుచుకోవాలి.

అప్రమత్తంగా ఉండాలి

రైతులు విత్తన కొనుగోలు సమయంలో అప్రమత్తంగా ఉండాలి. గ్రామా ల్లోకి వచ్చిన వారి వద్ద నుంచి ఎట్టి పరిస్థితుల్లో విత్తనాలు కొనుగోలు చేయొద్దు. వ్యవసాయ శాఖ సూచనలను పాటించి విత్తనాలను కొనుగోలు చేసుకోవాలి. నకిలీవి కొని మోసపోవద్దు. ఈ సీజన్‌లో పత్తి విత్తనాలు పొడి దుక్కుల్లో వేసి వృథా చేయొద్దు. వరి వేసుకునే రైతులు అన్ని రకాల వరి విత్తనాలను వెదజల్లే, డ్రమ్‌సీడర్‌ పద్ధతిని అవలంబించాలి. ముఖ్యంగా ఎంటీయూ-1001 రకం వరి ధాన్యాన్ని మిల్లర్లు కొనుగోలు చేయడం లేదు. ఈ రకం విత్తనాన్ని రైతులు వేయకపోవడం మంచిది. గ్రామాల్లో విడిగా విత్తనాలు అమ్మేందుకు వచ్చిన వారి సమాచారం ఇవ్వాలి. అలాగే విత్తన షాపుల యజమానులు నిబంధనలు పాటించకుండా విత్తనాలు విక్రయిస్తే వ్యవసా యాధికారులకు రైతులు ఫిర్యాదు చేయాలి.
– విజయభాస్కర్‌, జిల్లా వ్యవసాయాధికారి, భూపాలపల్లి