కండ్ల కలకలం

సర్వేంద్రియానాం నయనం ప్రధానం.. మనిషికి శరీరంలో కండ్లు చాలా ముఖ్యమైనవి. వాటికి ఏ చిన్న సమస్య వచ్చినా విలవిలలాడిపోతాం. ప్రస్తుత సీజన్‌లో వచ్చే కండ్ల కలక పిల్లలు, పెద్దలను కలవరపెడుతోంది.

• పిల్లలు,పెద్దలను ఇబ్బందులకు గురిచేస్తున్న వైరస్‌
• ఒకరి నుంచి ఒకరికి విస్తరిస్తున్న వ్యాధి
• భౌతిక దూరం శ్రేయస్కరం..
• జాగ్రత్తలు పాటించాలని సూచిస్తున్న వైద్యులు
• ఆరోగ్య కేంద్రాల్లో అందుబాటులో మందులు

సర్వేంద్రియానాం నయనం ప్రధానం.. మనిషికి శరీరంలో కండ్లు చాలా ముఖ్యమైనవి. వాటికి ఏ చిన్న సమస్య వచ్చినా విలవిలలాడిపోతాం. ప్రస్తుత సీజన్‌లో వచ్చే కండ్ల కలక పిల్లలు, పెద్దలను కలవరపెడుతోంది. కళ్లు ఎర్ర బారిపోయి నీళ్లు రావడం, రాత్రి పూట పూర్తిగా ఊసులతో మూసుకుపోవడం, ఇసుక పోసినట్లు గరగరలాడుతూ ఇబ్బందులు పెడుతోంది. ఇది అంటువ్యాధి కావడంతో ఒకరి నుంచి ఒకరికి విస్తరిస్తోంది. ఈ క్రమంలో సొంత వైద్యం వద్దని, ఆరోగ్య కేంద్రాల్లో మందులు అందుబాటులో ఉన్నాయని, భౌతిక దూరం, సరైన జాగ్రత్తలు తీసుకోవాలని వైద్యులు సూచిస్తున్నారు.

– భూపాలపల్లి టౌన్‌, ఆగస్టు 9

జిల్లాలో గత పది రోజుల నుంచి వర్షాలు కురవడంతో వాతావరణంలో వచ్చిన మార్పులతో కండ్ల కలక వ్యాధి విస్తరిస్తున్నది. కండ్ల కలకను పింక్‌ అంటారు. కంటి గుడ్డు చుట్టూ ఉండే తెల్లని పొర, కంటి రెప్పల వెనుక ఉండే పొరను కంజెటైవా అంటారు. కండ్లు తెరిచి ఉండడంతో దుమ్ము, ధూళి, వేడి, చలి, నీళ్లు ఏదైనా ప్రభావం చూపిస్తాయి. దీంతో వచ్చే ఇన్‌ఫెక్షన్‌నే కండ్ల కలక అంటారు. ఇది బ్యాక్టీరియా, వైరస్‌తో ఎక్కువగా వ్యాప్తి చెందుతుంది. ఇది చిన్నపాటి ఇన్‌ఫెక్షన్‌గా అనిపించినా రోజు వారీ పనులు చేసుకోకుండా, ఇంట్లో నుంచి బయటికి రాకుండా చేస్తుంది. వాన కాలంలో మురికి, కాలుష్యం పెరగడంతో కండ్ల కలక సోకుతుంది. ఇది ఒకరి నుంచి మరొకరికి సోకే ప్రమాదం ఉంటుందని వైద్య నిపుణులు చెబుతున్నారు. సరైన జాగ్రత్తలు పాటించడంతో పాటు కండ్ల కలక సోకితే సమీపంలోని ప్రభుత్వ దవాఖానలో చికిత్స పొందాలని సూచిస్తున్నారు.

తీసుకోవాల్సిన జాగ్రత్తలు

• రద్దీగా ఉండే ప్రదేశాల్లో సంచరించవద్దు, ప్రయాణ సమయంలో ప్రత్యేకంగా జాగ్రత్తలు తీసుకోవాలి.
• చేతులను ఎప్పటికప్పుడు శుభ్రంగా ఉంచుకోవాలి. మురికిగా ఉండే చేతులతో కండ్లను తాకితే వైరస్‌ వ్యాపిస్తుంది.
• ద్విచక్ర వాహనదారులు కండ్లకు సన్‌గ్లాసెస్‌ లేకపోతే సేఫ్టీ గ్లాసెస్‌ను ధరించడం మంచిది. వీటితో గాలిలో ఉండే దుమ్మూ, ధూళి నుంచి రక్షణగా ఉండడమే కాకుండా వైరల్‌ నుంచి కాపాడతాయి.
• కండ్ల కలకతో బాధపడే వారికి దూరంగా ఉండడం శ్రేయస్కరం. వారు వాడిన వస్తువులను తాకొద్దు.
• ఇంట్లో ఒకరికి వస్తే అందరికీ వ్యాపించే అవకాశం ఉంది. చిన్న పిల్లలకు సులభంగా సోకుతుంది.
  నివారణ చర్యలు
• కండ్ల కలక సోకిన వారికి దురదగా అనిపించిన సమయంలో కండ్లపై రుద్దకూడదు.
• తరచూ శుభ్రంగా కండ్లను కడగడంతో పాటు తుడుచుకోవడానికి శుభ్రమైన కాటన్‌ క్లాత్‌, టిష్యూ పేపర్‌ని వాడాలి.
• కండ్ల కలక సోకిన వారు ఇంటి బయటికి రాకుండా ఉండడం మంచిది.
• వ్యక్తిగత వస్తువులను మరెవ్వరికీ ఇవ్వొద్దు.
• అర్హత గల కంటి వైద్యులను సంప్రదించడంతో వ్యాధి తీవ్రత తగ్గించవచ్చు. కంటి వైద్యుల పర్యవేక్షణలో యాంటీబయాటిక్‌ ఐ డ్రాప్స్‌, లూబ్రికెంట్‌ ఐడ్రాప్స్‌ మందులు వాడుకోవాలి.

సొంత వైద్యం వద్దు

కండ్ల కలక వైరస్‌ సోకిన వారు సొంత వైద్యం చేసుకొని ఇబ్బందులకు గురికావొద్దు. మూడు రోజుల పాటు ఇంట్లోనే ఉండాలి. జిల్లాలో ఈ వ్యాధి పెరుగుతుండడంతో ఆరోగ్య కేంద్రాల్లో మందులు అందుబాటులో ఉంచాం. పాఠశాలల్లో వైరస్‌ లక్షణాలు కనిపించిన పిల్లలను వెంటనే ఇంటికి పంపించాలని కోరాం.

– డీఎంహెచ్‌వో శ్రీరాం

లక్షణాలు

• కండ్లు ఎర్రబారడం, దురద, కంట్లోంచి నీరు కారుతుంది.
• కంటి రెప్పలు ఉబ్బిపోయి నిద్రపోయినప్పుడు అతుక్కొనిపోతాయి. ఊసులు వస్తాయి.
• సాధారణ కండ్ల కలక వస్తే వారం పాటు ఇబ్బంది పెట్టిన తర్వాత తగ్గిపోతుంది.
• వైరస్‌తో కండ్ల కలక వస్తే మూడు వారాలపాటు ఉండొచ్చు.