ముగిసిన గడువు..ఈ నెల 20 నుంచి ఖాతాల్లోకి డబ్బులు..
ఒక్కొక్కరికి నెలకు 25 కిలోల సన్న బియ్యం
సీఎం కేసీఆర్కు రుణపడి ఉంటామని వెల్లడి
ఆదిలాబాద్ రూరల్, ఏప్రిల్ 15 :కరోనా నేపథ్యంలో ప్రైవేట్ పాఠశాలల్లో పనిచేస్తున్న టీచింగ్, నాన్ టీచింగ్ సిబ్బందికి నెలకు రూ.2 వేలు, 25 కిలోల సన్న బియ్యం సీఎం కేసీఆర్ ప్రకటించిన విషయం విదితమే. ఇందుకోసం అర్హుల నుంచి దరఖాస్తులను ఆహ్వానించగా.. ఉమ్మడి ఆదిలాబాద్ జిల్లావ్యాప్తంగా 14,543 మంది దరఖాస్తు చేసుకున్నారు. ఇందులో టీచర్స్ 10,884, నాన్ టీచింగ్ సిబ్బంది 3,659 మంది ఉన్నారు. ఇందులో అర్హులకు ఈనెల 20 నుంచి వారి ఖాతాల్లో డబ్బులు పడనుండగా.. 25 కిలోల బియ్యం రేషన్ దుకాణాల్లో ఇవ్వనున్నది.
కరోనా నేపథ్యంలో ప్రైవేట్ పాఠశాలలు మూతబడ్డాయి. అందులో పనిచేస్తున్న టీచింగ్, నాన్ టీచింగ్ వాళ్ల పరిస్థితి దారుణంగా తయారైంది. యేడాదిగా కుటుంబ పోషణ కూడా కరువైంది. వీరిని ఆదుకోవాలని సీఎం కేసీఆర్ నిర్ణయించారు. ఈ మేరకు ఒక్కొక్కరికి నెలకు రూ.2 వేలు, 25 కిలోల సన్న బియ్యం ఇస్తామని ప్రకటించారు. ప్రైవేట్ పాఠశాలల్లో పనిచేస్తున్న అర్హులైన ఉపాధ్యాయులు, ఆఫీస్ స్టాఫ్, ఆయాలు, డ్రైవర్లను దరఖాస్తు చేసుకోవాలని ఆదేశించారు. రాష్ట్ర విద్యాశాఖ అధికారులు ప్రత్యేక వెబ్సైట్ ఏర్పాటు చేసి పేర్లు నమోదు చేసుకునేలా ఏర్పాట్లు చేశారు. అయితే గడువు గురువారం సాయంత్రం 5 గంటలకు ముగిసింది. ఆదిలాబాద్ జిల్లాలో ఉపాధ్యాయులు 2,145 మంది, నాన్ టీచింగ్ వాళ్లు 778 మంది.. నిర్మల్లో టీచర్స్ 3,174, ఉపాధ్యాయేతరులు 1,050 మంది.. కుమ్రం భీం ఆసిఫాబాద్లో 1,065, నాన్ టీచింగ్ 331 మంది దరఖాస్తు చేసుకున్నారు.
కాగా.. మంచిర్యాలలో ఉపాధ్యాయులు 4,500, నాన్ టీచింగ్ 1,500 దరఖాస్తులు రాగా.. ప్రక్రియ కొనసాగుతున్నది. ఇంకా పెరిగే అవకాశం ఉంది. వీటిని ఆయా పాఠశాల ప్రధానోపాధ్యాయులు ధ్రువీకరించి, ఆన్లైన్ చేసి హార్డ్ కాపీలను డీఈవో కార్యాలయంలో సమర్పించారు. జిల్లా విద్యాశాఖ సిబ్బంది పరిశీలించి అర్హులైన ఉపాధ్యాయులు, సిబ్బంది జాబితాను కలెక్టర్ ద్వారా ప్రభుత్వానికి నివేదిస్తారు. అర్హులకు ఈనెల 20 నుంచి అర్హులైన వారికి తమ ఖాతాల్లో రూ.2 వేల నగదు, రేషన్ దుకాణాల ద్వారా 25 కిలోల సన్న బియ్యాన్ని పంపిణీ చేయడానికి అధికారులు ఏర్పాట్లు చేస్తున్నారు. వీరు సీఎం కేసీఆర్కు రుణపడి ఉంటామని హర్షం వ్యక్తం చేస్తున్నారు. ఉన్నతాధికారుల ఆదేశాలు రాగానే ప్రక్రియను ప్రారంభిస్తామని ఆదిలాబాద్ జిల్లా విద్యాధికారి రవీందర్రెడ్డి తెలిపారు.