ఉద్యోగులకు హెల్త్‌కార్డులు ఇచ్చేదెప్పుడో?

రెండు, మూడు రోజుల్లో ఈహెచ్‌ఎస్‌ ట్రస్టు ఏర్పాటుచేస్తాం. ఏడు రోజుల్లో మార్గదర్శకాలిస్తాం. పది రోజుల్లో కార్డులిచ్చి ఉచిత వైద్యాన్ని అందిస్తాం. ఇదీ ఉద్యోగ సంఘాల జేఏసీ నేతలకు కాంగ్రెస్‌ సర్కార్‌ ఇచ్చిన హామీ.

• జూన్‌ 2 దాటినా కార్డులు అందని పరిస్థితి
• రెండ్రోజుల్లో ట్రస్టు ఏర్పాటు చేస్తామని చెప్పిన సర్కార్‌
• ఆఖరికి ఈ గడువు ముగిసినా ఏర్పాటు కాని ట్రస్టు
• నెల ప్రీమియం చెల్లించినా వైద్యం అందని ఉద్యోగులు

హైదరాబాద్‌, జూన్‌ 6 (నమస్తే తెలంగాణ) : రెండు, మూడు రోజుల్లో ఈహెచ్‌ఎస్‌ ట్రస్టు ఏర్పాటుచేస్తాం. ఏడు రోజుల్లో మార్గదర్శకాలిస్తాం. పది రోజుల్లో కార్డులిచ్చి ఉచిత వైద్యాన్ని అందిస్తాం. ఇదీ ఉద్యోగ సంఘాల జేఏసీ నేతలకు కాంగ్రెస్‌ సర్కార్‌ ఇచ్చిన హామీ. జూన్‌ 1న ప్రభుత్వం హామీ ఇవ్వగా, రెండు, మూడు రోజులంటే జూన్‌ 4వ తేదీకి గడువు ముగిసి 7వ తేదీ వచ్చింది. కానీ, ఇంతవరకు ట్రస్టును ఏర్పాటు చేయలేదు, మార్గదర్శకాలివ్వలేదు. దీంతో హెల్త్‌కార్డు ఇచ్చేదెప్పుడో? ఉద్యోగులకు ఉచిత వైద్యం అందేదెప్పుడో? అనే సందేహాలు వ్యక్తమవుతున్నాయి. జూన్‌ నుంచి ప్రీమియం వసూలు చేస్తామన్న సర్కార్‌, మే నుంచే కోత విధించింది. ఈ నెల ప్రీమియం చెల్లించినా రాష్ట్రంలోని ఉద్యోగులు, ఉపాధ్యాయులు ఉచిత వైద్యానికి నోచుకోలేకపోతున్నారు.

ఎన్నాళ్లు ఎదురుచూపులు..
హెల్త్‌కార్డుల కోసం రాష్ట్రంలోని ఉద్యోగులు, పెన్షనర్లకు ఎదురుచూపులు తప్పడంలేదు. 2023 నుంచి నిరీక్షించాల్సిన పరిస్థితి. ప్రతిసారి చర్చలు జరుపడం, ఇస్తామనడం తప్ప పురోగతి లేదు. 2025 సెప్టెంబర్‌ 1న జేఏసీ నేతలతో సర్కార్‌ చర్చలు జరిపింది. వారంలో హెల్త్‌కార్డుల విధివిధానాలు ఖరారు చేస్తామని చెప్పింది. సరిగ్గా వారం గడిచాక ఈ పథకంపై సచివాలయంలో సమీక్ష నిర్వహించారు. తీరా కొత్త కథను తెరపైకి తెచ్చారు. ఈహెచ్‌ఎస్‌ స్కీమ్‌పై ఇతర రాష్ర్టాల్లో అధ్యయనం చేసి నివేదిక తెప్పించుకుంటామన్నారు. ఆ తర్వాత మంత్రుల సబ్‌ కమిటీ చర్చల్లోనూ హెల్త్‌కార్డులిస్తామన్నారు. ఆ తర్వాత ఈ ఏడాది ఫిబ్రవరిలో హెల్త్‌కార్డులకు క్యాబినెట్‌ పచ్చజెండా ఊపింది. జూన్‌ 2 నుంచి హెల్త్‌కార్డులిస్తామని చెప్పారు. ఇదే అంశంపై జూన్‌ 1న సాక్షాత్తు సీఎం రేవంత్‌రెడ్డి సమీక్ష నిర్వహించారు. చివరికి ఈ గడువు కూడా ముగిసింది. ఇంత వరకు కార్డులు మాత్రం రాలేదు. నిమ్స్‌, గాంధీ, ఉస్మానియాలో తప్ప ఎక్కడా ఉద్యోగులకు వైద్యం అందడంలేదు. ఉద్యోగ సంఘాల విజ్ఞప్తి మేరకు ఈహెచ్‌ఎస్‌ స్కీమ్‌ అమలుకు కేసీఆర్‌ సర్కార్‌ జీవో-186 జారీ చేసింది. అంతలోనే ప్రభుత్వం మారింది. కాంగ్రెస్‌ సర్కార్‌ కేవ లం మార్గదర్శకాల జీవో ఇచ్చి ఉద్యోగులు, స ర్కార్‌ వాటాను ట్రస్టులో జమ చేయడం, కా ర్డులిచ్చి వైద్యం అందించడం మాత్రమే మిగిలింది. ఈ రెండు పనుల కోసం రెండేండ్లు దా టినా ముందడుగు పడకపోవడం గమనార్హం.

ఇప్పటికీ అభ్యంతరాలు..

• జూనియర్‌ ఉద్యోగులకు మాత్రమే ఈ కార్డు లాభించనున్నది. సీనియర్లకు పెద్దగా ఉపయోగం లేదు. జూనియర్ల చెల్లింపు ప్రీమియం తక్కువగా ఉండగా, ఇంట్లో అర్హులైన అందరికీ హెల్త్‌కార్డు వర్తిస్తుంది. అదే రిటైర్మెంట్‌కు దగ్గర ఉన్నవారు చెల్లించే ప్రీమియం అధికంగా ఉం టుంది. పైగా భార్యభర్తలిద్దరికే వర్తిస్తుంది.
• ఉద్యోగుల మూల వేతనం నుంచి 1.5 శాతాన్ని ప్రీమియంగా వసూలు చేస్తున్నారు. దీనికి బదులుగా కుటుంబ ఆధారిత విరాళాన్ని ఉద్యోగ సంఘాల నేతలు కొందరు ప్రతిపాదిస్తున్నారు. కుటుంబ సభ్యుల సంఖ్యను బట్టి విరాళాన్ని నిర్ణయించాలన్నది వారి వాదన. ఒక వేళ 1.5 శాతమే కోత విధిస్తే వయోపరిమితి ఉండకుండా చూడాలని కోరుతున్నారు.
• కేంద్ర ప్రభుత్వంలో మూడంచెల విరాళాన్ని అమలు చేస్తున్నారు. గెజిటెడ్‌, నాన్‌ గెజిటెడ్‌తోపాటు ఆప్షన్‌ బేస్డ్‌ కంట్రిబ్యూషన్‌ విధానాన్ని అనుసరించాలని కొందరి పేర్కొంటున్నారు.
• ఆరోగ్యశ్రీ బకాయిలు రూ.120 కోట్లున్నాయి. వీటిని చెల్లించాలని దవాఖానల యాజమాన్యాలు కోరుతున్నాయి. వీటిని చెల్లిస్తేనే ఈహెచ్‌ఎస్‌పై ముందడుగు పడే అవకాశమున్నది.

ఆరుగురు ట్రస్టీలను నియమించాలి : పెన్షనర్స్‌ జేఏసీ
ఎంప్లాయీస్‌ హెల్త్‌ కేర్‌ ట్రస్టులో పెన్షనర్ల నుంచి ఆరుగురు ట్రస్టీలను నియమించాలని తెలంగాణ ప్రభుత్వ పెన్షన్‌దారుల సంయుక్త కార్యాచరణ సమితి(జేఏసీ) డిమాండ్‌ చేసింది. ఈ స్కీమ్‌లో చేరాలా..? వద్దా ? అనే ఆప్షన్‌ ఇవ్వాలని, బలవంతంగా చేర్చరాదని కోరింది. జేఏసీ చైర్మన్‌ కే లక్ష్మయ్య, సెక్రటరీ జనరల్‌ తులసి సత్యనారాయణ శనివారం సీఎస్‌ రామకృష్ణారావును కలిసి వినతిపత్రం సమర్పించారు. సంవత్సరానికి రెండుసార్లు ఔట్‌ పేషంట్‌ ట్రీట్‌మెంట్‌ అవకాశం కల్పించాలని, అవసరమైన మందులు ఇవ్వాలని, వైద్య పరీక్షలు కల్పించాలని కోరారు. ఆయుర్వేద, యునానీ, హోమియో, సిద్ధ వైద్య, న్యాచురోపతి వైద్యానికి అవకాశం కల్పించాలని విజ్ఞప్తిచేశారు.