‘అమ్మ ఒడి’లో భద్రంగా..!

• గర్భిణులను సురక్షితంగా చేర్చుతున్న వాహనాలు
• రోజుకు సగటు ట్రిప్పులు1,360
• రోజుకు సగటు లబ్ధిదారులు4,150
• గర్భిణులకు రోజుకు సగటు ఆదా రూ.5లక్షలు

హైదరాబాద్‌, జూలై 1 (నమస్తే తెలంగాణ): సీఎం కేసీఆర్‌ ఆలోచనల మేరకు ప్రవేశపెట్టిన 102 లేదా అమ్మ ఒడి వాహనాలు గర్భిణులు, బాలింతలకు వరంగా మారాయి. ఒకప్పుడు ఏఎన్సీ చెకప్‌కు వెళ్లడం శ్రమ, ఖర్చుతో కూడుకున్న వ్యవహారం. కానీ.. అమ్మఒడి వాహనాలతో పైసా ఖర్చు లేదు. కాబోయే అమ్మలకు శ్రమ తగ్గింది. దవాఖానకు సులభంగా, సురక్షితంగా వెళ్లగలుగుతున్నారు. ప్రసవం అయితే తల్లీ, బిడ్డ సురక్షితంగా ఆ వాహనంలోనే ఇంటికి చేరుతున్నారు.

రోజుకు నాలుగు ట్రిప్పులకుపైనే..

• ప్రస్తుతం రాష్ట్రవ్యాప్తంగా 300 అమ్మ ఒడి వాహనాలు ఉన్నాయి. గత మూడు నెలల గణాంకాలను పరిశీలిస్తే..
• ఒక్కో వాహనం రోజుకు నాలుగు ట్రిప్పులకు పైనే తిరుగుతున్నది.
• ఒక్కో వాహనం ద్వారా రోజకు సగటున 13 మంది గర్భిణులు/బాలింతలు లబ్ధి పొందుతున్నారు.
• 300 వాహనాల ద్వారా నెలకు సగటున 41 వేలకు పైగా ట్రిప్పులు నమోదవుతున్నాయి.
• నెలకు సగటున 1.20 లక్షల మంది గర్భిణులు ప్రయోజనం పొందుతున్నారు.
• ఒక్కొక్కరికి రూ.100-150 వరకు ఆదా అవుతున్నది. సగటున రూ.125 గణించినా.. నెలకు గర్భిణులకు రూ.1.50 కోట్లు ఆదా అవుతున్నట్టే లెక్క.

నెల                        ట్రిప్పులు                లబ్ధిదారులు
మార్చి                     41,453                      1,13,625
ఏప్రిల్‌                    41,018                      1,24,591
మే                          40,817                      1,24,516