Vahan Sarathi Portal | వాహన్‌ సారథి పోర్టల్‌కు గ్రహణం.. సేవల ప్రారంభానికి కుదరని ముహూర్తం

దేశవ్యాప్తంగా ఒకే తరహా ఆర్‌సీ, డీఎల్‌ ఉండేలా కేంద్ర ప్రభుత్వం తీసుకొచ్చిన ‘వాహన్‌ సారథి’ పోర్టల్‌ సేవలను రాష్ట్రంలో అందుబాటులోకి తెచ్చేందుకు ‘గ్రహాలు’ అనుకూలించడం లేదు. ప్రభుత్వ ‘పెద్దల’కు తీరిక లేకపోవడంతో ఆ పోర్టల్‌ ప్రారంభోత్సవానికి ‘ముహూర్తం’ కుదరడం లేదు.

• తీరిక లేదంటున్న రవాణా శాఖ మంత్రి
• 2 నెలల నుంచి అధికారుల ఎదురుచూపు
• తిరుమలగిరి ఆర్టీఏ కార్యాలయంలో 3 నెలల క్రితమే ముగిసిన పైలట్‌ ప్రాజెక్టు
• ఇప్పుడు మళ్లీ ఎన్నికల కోడ్‌తో తప్పని నిరీక్షణ
• త్వరలో తిరుమలగిరి ఆర్టీవో కూల్చివేత
• ఇక ఆ పోర్టల్‌ ప్రారంభం ఇప్పట్లో లేనట్టే

Vahan Sarathi Portal | హైదరాబాద్‌ సిటీబ్యూరో, మార్చి 30 (నమస్తే తెలంగాణ): దేశవ్యాప్తంగా ఒకే తరహా ఆర్‌సీ, డీఎల్‌ ఉండేలా కేంద్ర ప్రభుత్వం తీసుకొచ్చిన ‘వాహన్‌ సారథి’ పోర్టల్‌ సేవలను రాష్ట్రంలో అందుబాటులోకి తెచ్చేందుకు ‘గ్రహాలు’ అనుకూలించడం లేదు. ప్రభుత్వ ‘పెద్దల’కు తీరిక లేకపోవడంతో ఆ పోర్టల్‌ ప్రారంభోత్సవానికి ‘ముహూర్తం’ కుదరడం లేదు. ‘వాహన్‌ సారథి’ పోర్టల్‌ అమలు కోసం సికింద్రాబాద్‌లోని తిరుమలగిరి ఆర్టీఏ కార్యాలయం ఏడాదిపాటు ప్రయోగాత్మకంగా చేపట్టిన కార్యక్రమం (పైలట్‌ ప్రాజెక్టు) నిరుడు డిసెంబర్‌లోనే ముగిసింది. దీంతో ఆ కార్యాలయం నుంచి రాష్ట్రవ్యాప్తంగా ‘వాహన్‌ సారథి’ సేవలను ప్రారంభించేందుకు రవాణా శాఖ అధికారులు అన్ని ఏర్పాట్లు చేసుకున్నారు. కానీ, ఆ సేవలను ప్రారంభించేందుకు రవాణా శాఖ మంత్రి ఈ గత 3 నెలల నుంచి అపాయింట్‌మెంట్‌ ఇవ్వలేదు. దీనిపై ఉన్నతాధికారులు ఆ మంత్రిని సంప్రదించగా.. సీఎం రేవంత్‌రెడ్డితో ప్రారంభోత్సవం చేయిద్దామని చెప్పినట్టు తెలిసింది.

దీంతో మంత్రి అపాయింట్‌మెంట్‌ దొరకడమే గగనమైపోతే ఇక సీఎం రేవంత్‌రెడ్డి వచ్చి ఈ పోర్టల్‌ను ప్రారంభించడం ఇప్పట్లో జరిగేదేనా? అని అధికారులు చర్చించుకుంటున్నారు. వాస్తవానికి ఈ నెల 9 నుంచే రాష్ట్రవ్యాప్తంగా ‘వాహన్‌ సారథి’ సేవలను అందుబాటులోకి తెస్తామని, తదనుగుణంగా ఆ పోర్టల్‌ ప్రారంభోత్సవానికి ఏర్పాట్లు చేయాలని ప్రభుత్వం నుంచి ఆదేశాలు వచ్చాయి. ఆ ప్రకారంగా అధికారులు అన్ని ఏర్పాట్లు చేసినప్పటికీ ఇంకా ఆ సేవలు ప్రారంభం కాలేదు. దీంతో విసిగిపోయిన అధికారులు.. కనీసం రవాణా శాఖ మంత్రివర్యులైనా ‘వాహన్‌ సారథి’ పోర్టల్‌ను ప్రారంభిస్తే బాగుంటుందని ఎదురుచూస్తున్నారు. ఈ క్రమంలో ఇప్పుడు హైదరాబాద్‌లో మళ్లీ ఎన్నికల కోడ్‌ అమల్లోకి వచ్చింది. దీంతో ఆ పోర్టల్‌ సేవలు ఇప్పట్లో అందుబాటులోకి వచ్చే పరిస్థితి కనిపించడం లేదు.

కూల్చివేతకు సమీపిస్తున్న సమయం

రోడ్డు విస్తరణలో భాగంగా తిరుమలగిరి ఆర్టీఏ కార్యాలయం తొలగింపునకు గత నెలలో ఆదేశాలు జారీ కావడంతో అధికారులు 2 నెలల్లోగా ఆ కార్యాలయాన్ని కూల్చివేయనున్నారు. ఇప్పటికే తిరుమలగిరి మార్గంలో భూసేకరణ ప్రక్రియ కొనసాగుతోంది. దీంతో ‘వాహన్‌ సారథి’ పోర్టల్‌ ప్రారంభోత్సవానికి ముందే తిరుమలగిరి ఆర్టీఏ కార్యాలయం కూల్చివేత జరుగుతుందోనేమోనని అధికారులు తలలు పట్టుకుంటున్నారు.