పనిలేకే ఇన్నిసార్లు వెళ్లామా..?

• రాష్ట్ర మంత్రులు, ఎంపీలపై పీయూష్‌ గోయల్‌ అనుచిత వ్యాఖ్యలు
• ఢిల్లీకి ఎందుకొచ్చారంటూ ప్రశ్నలు.. ఢిల్లీలో ఉండటమే ఇష్టమంటూ వెటకారం

హైదరాబాద్‌, డిసెంబర్‌ 21 (నమస్తే తెలంగాణ): రైతుల ప్రయోజనాల కోసం ఢిల్లీ వేదికగా పోరాటంచేస్తున్న రాష్ట్ర మంత్రులు, ఎంపీలపై కేంద్ర మంత్రి పీయూష్‌ గోయల్‌ అనుచిత వ్యాఖ్యలుచేశారు. ఈ పోరాటాన్ని కించపరిచే విధంగా అవహేళనచేసేలా మాట్లాడారు. మంగళవారం ఢిల్లీలో మీడియాతో ‘తెలంగాణ మంత్రులకు, ఎంపీలకు ఏం పనిలేదు.. పదే పదే ఢిల్లీకి ఎందుకు వస్తున్నారు.. వాళ్లకు తెలంగాణ ప్రజలకు సేవ చేయడం కన్నా.. ఢిల్లీలో ఉండటమే ఇష్టంగా ఉన్నట్లుంది’ అంటూ కించపరిచే వ్యాఖ్యలుచేశారు. ఆయన ఇలాంటి వ్యాఖ్యలు చేయడం ఇదే తొలిసారి కాదు.. గతంలోనూ ఇలాంటి వ్యాఖ్యలు చేశారు. నేరుగా మంత్రులతోనే ఇలాంటి వ్యాఖ్యలు చేయడం గమనార్హం. సీఎం కేసీఆర్‌తోపాటు మంత్రులు, ఎంపీలు ఢిల్లీ బాట పట్టేందుకు కారణమెవరనే విషయాన్ని పక్కనపెట్టి చిత్తం వచ్చినట్టు మాట్లాడారు. రైతులతో రాజకీయంచేయాలని కేంద్రంలోని బీజేపీ సర్కారు చేస్తున్న కుట్రలను ఎదుర్కొనేందుకు తెలంగాణ ప్రభుత్వం ఢిల్లీపై పోరాటానికి దిగింది. రైతులకోసం ఢిల్లీకే కాదు ఇంకెక్కడికైనా, ఎన్నిసాైర్లెనా వెళ్లేందుకు సిద్ధమని రాష్ట్ర ప్రభుత్వం ఎప్పుడూ సిద్ధంగానే ఉన్నది. కేంద్ర ప్రభుత్వం మాదిరిగా తమకు రాజకీయం ముఖ్యం కాదని ఎప్పుడో తేల్చిచెప్పింది. సీఎం కేసీఆర్‌తో పాటు మంత్రులు, ఎంపీలు పలుమార్లు ఢిల్లీకి వెళ్లారు. టీఆర్‌ఎస్‌ ఎంపీలు పార్లమెంట్‌ వేదికగా వారంపాటు పోరాడారు. హైదరాబాద్‌ ఇందిరా పార్కు వద్ద సీఎం కేసీఆర్‌తో సహా పార్టీ శ్రేణులంతా ధర్నా నిర్వహించారు. ఈ విధంగా రైతుల కోసం రాష్ట్ర ప్రభుత్వం పోరాటం చేస్తుంటే.. రాజకీయాలు చేస్తున్న కేంద్ర మంత్రులు అనుచిత వ్యాఖ్యలు చేస్తుండడం గమనార్హం.
ఇప్పటివరకు ధాన్యం కొనుగోలుపై

మంత్రుల ఢిల్లీ పర్యటన, పరిణామాలు..

• ఆగస్టు 31న కేంద్ర ఆహార, ప్రజాపంపిణీ కార్యదర్శి సుధాన్షు పాండే తెలంగాణతోపాటు ఇతర రాష్ర్టాలకు లేఖరాశారు. ఈ సంవత్సరం బాయిల్డ్‌ రైస్‌(దొడ్డువడ్లు)ను ఎఫ్‌సీఐ తీసుకొనే పరిస్థితిలో లేమని అందులో పేర్కొన్నారు.
• ఆగస్టు 24న రాష్ట్ర వ్యవసాయశాఖ మంత్రి నిరంజన్‌రెడ్డి నిర్వహించిన సమావేశానికి హాజరైన ఎఫ్‌సీఐ జీఎం దీపక్‌శర్మ యాసంగి సీజన్‌లో దొడ్డు వడ్లు కొనేది లేదని తేల్చిచెప్పారు. గత యాసంగి సీఎంఆర్‌ను పూర్తిగా తీసుకోబోమన్నారు.
• సెప్టెంబర్‌1న గత యాసంగి ఉప్పుడు బియ్యం తీసుకోవాలని రాష్ట్ర మంత్రులు కేటీఆర్‌, గంగుల కమలాకర్‌ ఢిల్లీ వెళ్లి కేంద్ర, ఆహార ప్రజాపంపిణీ శాఖ మంత్రి పీయూష్‌ గోయల్‌ను కలిసి వినతిపత్రం ఇచ్చారు.
• సెప్టెంబర్‌ 2, 3లలో మంత్రి గంగుల కమలాకర్‌ ఢిల్లీలో కేంద్రం ఆహార శాఖ కార్యదర్శి సుధాన్షు పాండే, ఎఫ్‌సీఐ చైర్మన్‌ ఆశిష్‌తో చర్చించారు.
• సెప్టెంబర్‌ 8న మంత్రి నిరంజన్‌రెడ్డి నిర్వహించిన సమీక్షలో వచ్చే యాసంగిలో దొడ్డు వడ్లు కొనే ప్రసక్తే లేదని ఎఫ్‌సీఐ మళ్లీ స్పష్టం చేసింది.
• సెప్టెంబర్‌ 17న హైదరాబాద్‌లో చిరుధాన్యాల సదస్సుకు హాజరైన కేంద్ర మంత్రి నరేంద్రసింగ్‌ తోమర్‌ నాణ్యమైన ధాన్యాన్నే కొంటామని, పరోక్షంగా బాయిల్డ్‌ రైస్‌ కొనబోమని పేర్కొన్నారు.
• సెప్టెంబర్‌ 25న సీఎం కేసీఆర్‌ ఢిల్లీ వెళ్లి.. గత యాసంగిలో పూర్తిస్థాయి సీఎంఆర్‌ సేకరణకు, ఈ వానకాలంలో పూర్తి ధాన్యం సేకరణకు కేంద్ర మంత్రి గోయల్‌తో భేటీ అయి ఒప్పించారు. లేదంటే ఈ సీజన్‌లోనూ రైతులు తమ పంటను అమ్ముకొనే పరిస్థితి ఉండేది కాదు.
• నవంబర్‌ 18న వడ్ల కొనుగోలుపై కేంద్రంపై ఒత్తిడి తెచ్చేందుకు ఇందిరాపార్క్‌లో స్వయంగా సీఎం కేసీఆర్‌ ధర్నా చేపట్టారు.
• నవంబర్‌ 19న సీఎం కేసీఆర్‌ ప్రధాని నరేంద్రమోదీకి లేఖరాశారు.
• నవంబర్‌ 23న రాష్ట్ర మంత్రులు కేటీఆర్‌, నిరంజన్‌రెడ్డి, గంగుల కమలాకర్‌, టీఆర్‌ఎస్‌ లోక్‌సభాపక్ష నేత నామా నాగేశ్వర్‌రావు సహా ఇతర ఎంపీలు కేంద్రమంత్రులు పీయూష్‌ గోయల్‌, నరేంద్రసింగ్‌ తోమర్‌ను కలిసి తెలంగాణలో యాసంగిలో ధాన్యం కొనుగోలు చేయాలని విజ్ఞప్తిచేశారు. ఈ సందర్భంగా నాలుగు రోజుల తరువాత చెప్తామని గోయల్‌ చెప్పారు.
• నవంబర్‌ 26న మరోసారి మంత్రులు నిరంజన్‌రెడ్డి, గంగుల కమలాకర్‌ సహ ఎంపీలు పీయూష్‌ గోయల్‌ను కలిసి చర్చించారు.
• డిసెంబర్‌ 21న గోయల్‌ను మంత్రులు నిరంజన్‌రెడ్డి, జగదీశ్‌రెడ్డి, వేముల ప్రశాంత్‌రెడ్డి, ఎర్రబెల్లి దయాకర్‌రావు, టీఆర్‌ఎస్‌ పార్లమెంటరీ పార్టీ నేత కేకే, లోక్‌సభాపక్ష నేత నామా నాగేశ్వర్‌రావు ఎంపీల బృందం కలిసి మరోసారి విజ్ఞప్తిచేసింది. అంతేకాదు తేలేదాకా ఢిల్లీ వదిలి వెళ్లేది లేదని స్పష్టంచేశారు.