Visit:
హైద‌రాబాద్ : సింగరేణి సంస్థ మూసివేతకు కేంద్రంలోని బీజేపీ ప్రభుత్వం కుట్ర చేస్తుంద‌ని టీఆర్ఎస్ ఎమ్మెల్సీ కల్వకుంట్ల కవిత పేర్కొన్నారు. ఈ సంద‌ర్భంగా ఎమ్మెల్సీ కవిత ట్విట్ట‌ర్ వేదిక‌గా బీజేపీపై మండిప‌డ్డారు. సింగరేణి బొగ్గు గని కార్మికులు త‌మ చెమట చుక్కతో దక్షిణ భారతానికి వెలుగులు పంచుతున్నారు అని పేర్కొన్నారు. సింగరేణిలో రాష్ట్రానికి 51శాతం, కేంద్రానికి 49 శాతం వాటా ఉన్నప్పటికీ బీజేపీ తన అధికారాలను తప్పుడు రీతిలో ఉపయోగిస్తోంది అని కవిత ధ్వ‌జ‌మెత్తారు. బీజేపీ వైఖరి సమాఖ్య స్పూర్తికి పూర్తి విరుద్దం అని ఆమె పేర్కొన్నారు.
సీఎం కేసీఆర్ నాయకత్వంలో సింగరేణి సంస్థ అద్భుతమైన పురోగతితో, దేశంలోని ఇతర సంస్థల కంటే ఎంతో గొప్పగా లాభాలు సాధించింద‌ని గుర్తు చేశారు. లాభాల్లో ఉన్న సింగరేణి సంస్థను నష్టాల్లో ఉన్నట్టుగా చూపిస్తూ, 4 బొగ్గు బ్లాకులను కేంద్రం వేలం వేస్తోంది అని తెలిపారు. సింగరేణి ప్రైవేటీకరణను వ్యతిరేకిస్తూ సీఎం కేసీఆర్ అనేక సార్లు విజ్ఞప్తి చేసినా కేంద్ర ప్రభుత్వం నిరంకుశంగా వ్యవహరిస్తోంది అని మండిప‌డ్డారు. బొగ్గు గనుల వేలాన్ని నిలిపివేసే వరకూ, కార్మికుల పక్షాన గల్లీ నుండి ఢిల్లీ వరకు అన్ని స్థాయిల్లో టీఆర్ఎస్ పార్టీ కొట్లాడుతుంద‌ని ఎమ్మెల్సీ కవిత తేల్చిచెప్పారు.
సింగరేణి ప్రైవేటీకరణకు వ్యతిరేకిస్తూ సీఎం కేసీఆర్ గారు అనేక సార్లు విజ్ఞప్తి చేసినా కేంద్ర ప్రభుత్వం నిరంకుశంగా వ్యవహరిస్తోంది.బొగ్గు గనుల వేలాన్ని నిలిపివేసే వరకూ,కార్మికుల పక్షాన గల్లీ నుండి ఢిల్లీ వరకు అన్ని స్థాయిల్లో టీఆర్ఎస్ పార్టీ కొట్లాడుతుంది 3/3. #SaveSingareniFromBJP
— Kavitha Kalvakuntla (@RaoKavitha) February 2, 2022
