నేటి నుంచే ‘తొలిమెట్టు’

ప్రభుత్వ పాఠశాలల్లో విద్యార్థులకు చదవటం, రాయటంలో మెరుగైన శిక్షణ ఇచ్చేందుకు రూపొందించిన ‘తొలిమెట్టు’ కార్యక్రమం సోమవారం నుంచి ప్రారంభమవుతున్నది. కరోనా కారణంగా పాఠశాలల్లో విద్యా ప్రమాణాలు పడిపోయాయి. విద్యార్థులను తిరిగి గాడిలో పెట్టేందుకు తొలిమెట్టుకు ప్రభుత్వం శ్రీకారం చుట్టింది

• విద్యార్థులకు చదవడం, రాయడంలో శిక్షణ
• ప్రభుత్వ బడుల్లో 1 -5 తరగతులకు బోధన
• ఐదు రోజులు బోధన
• ఒక రోజు మూల్యాంకనం

హైదరాబాద్‌, ఆగస్టు 14 (నమస్తే తెలంగాణ): ప్రభుత్వ పాఠశాలల్లో విద్యార్థులకు చదవటం, రాయటంలో మెరుగైన శిక్షణ ఇచ్చేందుకు రూపొందించిన ‘తొలిమెట్టు’ కార్యక్రమం సోమవారం నుంచి ప్రారంభమవుతున్నది. కరోనా కారణంగా పాఠశాలల్లో విద్యా ప్రమాణాలు పడిపోయాయి. విద్యార్థులను తిరిగి గాడిలో పెట్టేందుకు తొలిమెట్టుకు ప్రభుత్వం శ్రీకారం చుట్టింది. 140 రోజులపాటు 23 వేల బడుల్లో తొలిమెట్టు నిర్వహిస్తారు. 11.24 లక్షల మంది విద్యార్థులు చదవడం, రాయడంలో కనీస సామర్థ్యాలు సాధించేలా శిక్షణ ఇస్తారు.

ఈ కార్యక్రమం కోసం ఇప్పటికే 52,708 మంది టీచర్లకు ప్రభుత్వం శిక్షణ ఇచ్చింది. తొలిమెట్టు కరదీపికను అధికారులు సిద్ధంచేశారు. తరగతులవారీగా ఏయే లక్ష్యాలను సాధించాలో ఇప్పటికే నిర్ధారించి, అందుకు తీసుకోవాల్సిన చర్యలను సైతం సూచించారు. తొలిమెట్టు కార్యక్రమ పర్యవేక్షణకు మండలానికో నోడల్‌ అధికారిని విద్యాశాఖ నియమించింది. వీరితోపాటు క్లస్టర్‌ హెచ్‌ఎంలను తొలిమెట్టు క్లస్టర్‌ కో ఆర్డినేటర్లుగా నియమించారు. వీరంతా వారానికి రెండు స్కూళ్లను సందర్శించి సమీక్షలు నిర్వహించాలి. అవసరమైతే విద్యార్థులకు పరీక్షలు పెట్టాలి. విద్యార్థులు ప్రగతిని నమోదుచేసేందుకు మొబైల్‌ యాప్‌ను సైతం సిద్ధం చేస్తున్నారు.

తొలిమెట్టులో చేసే పనులివీ..

• పిల్లలకు బేస్‌లైన్‌ టెస్ట్‌ను నిర్వహించి, వారి అభ్యసన స్థాయిని గుర్తించడం.
• స్థాయికి అనుగుణంగా బోధనా ప్రణాళికలు సిద్ధం చేయడం.
• వార్షిక ప్రణాళిక, వారపు ప్రణాళిక, పాఠ్యప్రణాళిక, పీరియడ్‌ ప్రణాళికలు సిద్ధం చేయడం.
• తరగతి గదుల్లో పటిష్ఠమైన బోధనా ప్రణాళిక ప్రకారం బోధించడం.
• వారంలో ఐదు రోజులు బోధించి, ఒక రోజు మూల్యాంకనం చేయడం.
• అన్ని తరగతులకు రోజూ గ్రంథాలయ పీరియడ్‌ ద్వారా పఠన కార్యక్రమాన్ని నిర్వహించడం.
• వరుసగా ఐదురోజులు పిల్లలు బడికి రాకుంటే వారి తల్లిదండ్రులతో మాట్లాడి కారణాలు తెలుసుకోవడం.
• నెలకొకసారి పిల్లల ప్రగతిని నమోదు చేయటం.
• కాంప్లెక్స్‌ స్థాయిలో ఉపాధ్యాయులవారీగా సమీక్ష నిర్వహించటం.
• మండల స్థాయిలో నెలకొకసారి హెచ్‌ఎంలతో సమీక్ష.
• జిల్లా స్థాయిలో మండలాలవారీగా సమీక్ష.
• రాష్ట్రస్థాయిలో జిల్లాలవారీగా ప్రగతి సమీక్ష.