Hyderabad | 24 గంటల్లో ఐదు హత్యలు.. వరుస ఘటనలతో వణుకుతున్న హైదరాబాద్‌

విశ్వ నగరంగా ఎదుగుతున్న హైదరాబాద్‌ నగరం అర్ధరాత్రి హత్యలతో ఉలిక్కిపడుతున్నది. దేశంలోని అన్ని మెట్రో నగరాల్లో హైదరాబాద్‌ నగరం సురక్షితమని ఉత్తరాది ఐటీ ఉద్యోగులు వేన్నోళ్ల పొగిడిన సందర్భాలు గుర్తు చేసుకుంటూ... ఇప్పుడు ‘ఈ నగరానికి ఏమైంది?’ అన్న ఆందోళన వ్యక్తమవుతున్నది.

• ఆసిఫ్‌నగర్‌ పోలీస్‌స్టేషన్‌ సమీపంలోనే ఇద్దరు హతం
• మిత్రుడిని చంపిన దొంగ.. భార్యను హత్యచేసిన భర్త
• రైలు పట్టాలపై శవమై తేలిన ఈదీబజార్‌ యువకుడు
• మేడ్చల్‌ ఠాణా పక్కన నగలషాపు దోపిడీకి యత్నం
• చెంచు మహిళపై ముగ్గురి పైశాచిక దాడి
• పది రోజులుగా ఒకే గదిలో నిర్బంధించి చిత్రహింసలు

Hyderabad | హైదరాబాద్‌ సిటీబ్యూరో ప్రధాన ప్రతినిధి, జూన్‌ 20 (నమస్తే తెలంగాణ): విశ్వ నగరంగా ఎదుగుతున్న హైదరాబాద్‌ నగరం అర్ధరాత్రి హత్యలతో ఉలిక్కిపడుతున్నది. దేశంలోని అన్ని మెట్రో నగరాల్లో హైదరాబాద్‌ నగరం సురక్షితమని ఉత్తరాది ఐటీ ఉద్యోగులు వేన్నోళ్ల పొగిడిన సందర్భాలు గుర్తు చేసుకుంటూ… ఇప్పుడు ‘ఈ నగరానికి ఏమైంది?’ అన్న ఆందోళన వ్యక్తమవుతున్నది. కొన్నిరోజుల కిందటనే ఒకేరోజు మూడు హత్యలతో పాటు వివిధ ప్రాంతాల్లో ధార్‌… బురఖా… చుడీదార్‌… భవారియా… ఇలా కొత్త కొత్త గ్యాంగులు ప్రవేశించి దోపిడీలకు పాల్పడుతుండగా… మరోవైపు హత్యల పరంపర నగరవాసులను భయాందోళనలకు గురి చేస్తున్నాయి. ఈ క్రమంలో మంగళవారం అర్ధరాత్రి నుంచి బుధవారం అర్ధరాత్రి వరకు నగరంలోని వివిధ ప్రాంతాల్లో నడిరోడ్డుపై నాలుగు హత్యలు చోటుచేసుకోవడం మరోసారి నగరాన్ని భయం నీడలోకి తీసుకువెళ్లింది. ఇందులో ఆసిఫ్‌నగర్‌ పరిధిలో బుధవారం అర్ధరాత్రి ఒక హత్య జరుగగా… ఈ పరిధిలోనే నాలుగు రోజుల కిందట మరో హత్య జరగడం… పైగా ఈ రెండు హత్యలు కూడా పోలీస్‌స్టేషన్‌కు కూతవేటు దూరంలోనే జరుగడం గమనార్హం.

24 గంటల వ్యవధిలో జరిగిన హత్యలివి

• శాలిబండ ఠాణా పరిధిలో రౌడీషీటర్ల వార్‌ జరిగింది. కాలపత్తర్‌ పోలీస్‌స్టేషన్‌ పరిధిలో రౌడీషీటర్‌గా ఉన్న అసద్‌(30), కాలపత్తర్‌కు చెందిన అన్వర్‌ (40), అదే ప్రాంతంలో బేకరీలో పనిచేసే వాజిద్‌ను మంగళవారం అర్ధరాత్రి తాడ్‌బన్‌ ఫాతిమా దవాఖాన వద్దకు పిలిపించాడు. ఈ విషయం తెలుసుకొని అతని సోదరులు సాజిద్‌, నిమ్రా ఫాస్ట్‌పుడ్‌ సెంటర్‌ నిర్వాహకుడు రఫీఖ్‌ షిమ్లాన్‌(40), ఖదీర్‌ అక్కడకు చేరుకున్నారు. అక్కడ రెండు గ్రూప్‌లు కత్తులతో దాడులు చేసుకోగా, ఇద్దరికి తీవ్ర గాయాలు అయ్యాయి. దవాఖానకు తరలిస్తుండగా రఫీఖ్‌ మృతి చెందాడు.
• దొంగసొత్తు పంపకాలలో తలెత్తిన వివాదం సనత్‌నగర్‌ ఠాణా పరిధిలో హత్యకు దారి తీసింది. ఏజీకాలనీ సమీపంలోని నేతాజీనగర్‌కు చెందిన సయ్యద్‌ అజహర్‌ (22), ఎర్రగడ్డకు చెందిన మహ్మద్‌ ఆసిఫ్‌ (23) మధ్య చోరీ సొత్తు పంచుకునే విషయంలో విభేదాలు ఏర్పడ్డాయి. మనస్పర్ధలున్నా ఇద్దరూ మంగళవారం అర్ధరాత్రి భరత్‌నగర్‌ ఎంఎంటీఎస్‌ స్టేషన్‌ వద్ద కలుసుకుని మద్యం సేవించారు. అనంతరం గొడవ పడ్డారు. ఆసిఫ్‌ బండరాయితో అజహర్‌ తలపై మోది పరారయ్యాడు.
• పిల్లల ముందే భార్యను భర్త విచక్షణారహితంగా కత్తితో పొడిచి చంపాడు. రామగుండంలోని ధర్మారం రోడ్డు బసంత్‌నగర్‌కు చెందిన లక్ష్మణ్‌(34), రోజా(31)కు పదేండ్ల క్రితం పెండ్లయింది. వీరికి ముగ్గురు పిల్లలు. మద్యం సేవించి నిత్యం వేధిస్తుండడంతో భార్య రోజా, పిల్లలు, తల్లి లక్ష్మమ్మతో కలిసి ఏడాది క్రితం తుకారంగేట్‌ పోలీస్‌స్టేషన్‌ పరిధిలోని అడ్డగుట్టలో ఉంటుంది. రోజా బట్టల దుకాణంలో, తల్లి లక్ష్మమ్మ ఫాస్ట్‌పుడ్‌ సెంటర్‌లో పనిచేస్తూ కుటుంబాన్ని పోషించుకుంటున్నారు. 20 రోజుల క్రితం రోజా భర్త వద్దకు వెళ్లి హైదరాబాద్‌కు తీసుకొచ్చింది. అయినా లక్ష్మణ్‌ ప్రవర్తనలో మార్పు రాలేదు. ఈ నెల 18న ఫాస్ట్‌పుడ్‌ సెంటర్‌ వద్ద అత్తతో గొడవపడి.. ఆవేశంగా ఇంటికి వచ్చిన లక్ష్మణ్‌ భార్యతోను గొడవపడ్డాడు. భార్య కూరగాయాలు కోస్తుండడంతో అదే కత్తి గుంజుకొని కన్నపిల్లలు చూస్తుండగానే ఆమె కడుపులో విచక్షణారహితంగా పొడిచి చంపాడు.
• బుధవారం అర్ధరాత్రి ఆసిఫ్‌నగర్‌ పోలీస్‌స్టేషన్‌ పరిధిలో మల్లేపల్లి అగాపురాలో నివాసముండే అలీం(34) అనే రౌడీషీటర్‌ దారుణహత్యకు గురయ్యాడు. హబీబ్‌నగర్‌ ఠాణా పరిధిలో అలీంపై రౌడీషీట్‌ నమోదయింది. ఇతడి స్నేహితుడైన ఒమర్‌తో తరుచూ గొడవలు జరిగేవి. ఒమర్‌ తన స్నేహితులైన సిరాజ్‌, గౌస్‌, పాషాతో కలిసి అలీంను చంపేందుకు బుధవారం అర్ధరాత్రి స్కెచ్‌ వేశాడు. ఫీల్‌ఖానా రోడ్డులో అలీంను పిలిపించి కత్తులతో పొడిచి హతమార్చి పరారయ్యారు.
• ఈదీబజార్‌కు చెందిన కజీంసోహెల్‌ యువకుడు యాకత్‌పురా-ఉప్పుగూడ రైల్వే స్టేషన్ల మధ్య బుధవారం అనుమానాస్పద స్థితిలో మృతి చెందాడు. గుర్తుతెలియని వ్యక్తులు హత్య చేసి రైలు పట్టాల కింద పడేశారని మృతుడి కుటుంబసభ్యులు ఆరోపిస్తున్నారు.