రైతు డిస్కమ్‌పై రగడ.. విద్యుత్తు ఉద్యోగుల నుంచి వ్యతిరేకత

రాష్ట్రంలో మూడో డిస్కమ్‌ ఏర్పాటు చేయాలన్న సర్కార్‌ నిర్ణయంపై విద్యుత్తు ఉద్యోగుల నుంచి వ్యతిరేకత ఎదురవుతున్నది. రైతు డిస్కమ్‌ ఏర్పాటు నిర్ణయాన్ని విద్యుత్తు ఇంజినీర్లు, ఉద్యోగులు తీవ్రంగా వ్యతిరేకిస్తున్నారు.

హైదరాబాద్‌, మార్చి 17 (నమస్తే తెలంగాణ) : రాష్ట్రంలో మూడో డిస్కమ్‌ ఏర్పాటు చేయాలన్న సర్కార్‌ నిర్ణయంపై విద్యుత్తు ఉద్యోగుల నుంచి వ్యతిరేకత ఎదురవుతున్నది. రైతు డిస్కమ్‌ ఏర్పాటు నిర్ణయాన్ని విద్యుత్తు ఇంజినీర్లు, ఉద్యోగులు తీవ్రంగా వ్యతిరేకిస్తున్నారు. మూడో డిస్కమ్‌ ఏర్పాటును పునఃపరిశీలించాలని తెలంగాణ రాష్ట్ర విద్యుత్తు ఉద్యోగుల జాయింట్‌ యాక్షన్‌ కమిటీ(టీజీ పీఈజేఏసీ) సోమవారం విద్యుత్తు సంస్థల సీఎండీలను కలిసి డిమాండ్‌ చేసింది. ఇంజినీర్లు, ఉద్యోగల సంఘాలతో కూడిన జేఏసీ పలు అభ్యంతరాలు వ్యక్తంచేసింది. పలు అనుమానాలు నివృత్తిచేయాలని డిమాండ్‌ చేసింది.

ఉద్యోగుల అభ్యంతరాలివి..

• లాభసాటిగా లేని వ్యవసాయ కనెక్షన్లను వేరు చేసి, ఆదాయం వచ్చే కనెక్షన్లను ప్రైవేట్‌పరం చేసే కుట్ర ఇది.
• ఇప్పుడున్న దక్షిణ డిస్కమ్‌, ఉత్తర డిస్కమ్‌లను ప్రైవేటీకరించే ప్రమాదం ఉంది.
• ఇప్పుడున్న డిస్కమ్‌లు క్రాస్‌ సబ్సిడీని వాడుకుంటాయి. అంటే కమర్షియల్‌, పరిశ్రమల కనెక్షన్ల నుంచి వచ్చే లాభాన్ని పొందుతాయి. రైతు డిస్కమ్‌కు క్రాస్‌ సబ్సిడీని బదిలీచేయడం కుదరదు.
• డిస్కమ్‌లు యూనివర్సల్‌ సైప్లె బాధ్యతను కలిగి ఉంటాయి. రేపు రైతు డిస్కమ్‌ను ఇతర వినియోగదారులు కనెక్షన్‌ కావాలి అని కోరితే తిరస్కరించొచ్చు.
• ఎనర్జీ ఆడిటింగ్‌, మీటరింగ్‌, సెటిల్‌మెంట్‌ సమస్యలు ఉత్పన్నమవుతాయి.
• ఉద్యోగుల సర్వీసు నిబంధనలు, సీనియారీటీ సమస్యలు తలెత్తుతాయి.
• ట్రూ అప్‌ సర్దుబాటు సమస్యలొస్తాయి.