భూస్థాపిత బీజేపీ నుంచి బీసీ ముఖ్యమంత్రా?

రాష్ట్రంలో భూస్థాపితమైపోయిన బీజేపీ.. ఎన్నికల్లో గెలిస్తే బీసీని సీఎం చేస్తారా? అని బీఆర్‌ఎస్‌ సీనియర్‌నేత దాసోజు శ్రవణ్‌ ఎద్దేవా చేశారు.. కేంద్రమంత్రి అమిత్‌షా అబద్ధాల అనకొండగా మారారని విమర్శించారు. అమిత్‌ షా చేసిన బీసీ సీఎం హామీ బూటకమేనని శనివారం ఒక ప్రకటనలో మండిపడ్డారు.

• ఇప్పటిదాకా బీసీలకు చేసిన మేలేమిటో చెప్పాలి
• బీఆర్‌ఎస్‌ సీనియర్‌ నేత దాసోజు శ్రవణ్‌

హైదరాబాద్‌, అక్టోబర్‌ 28 (నమస్తే తెలంగాణ): రాష్ట్రంలో భూస్థాపితమైపోయిన బీజేపీ.. ఎన్నికల్లో గెలిస్తే బీసీని సీఎం చేస్తారా? అని బీఆర్‌ఎస్‌ సీనియర్‌నేత దాసోజు శ్రవణ్‌ ఎద్దేవా చేశారు.. కేంద్రమంత్రి అమిత్‌షా అబద్ధాల అనకొండగా మారారని విమర్శించారు. అమిత్‌ షా చేసిన బీసీ సీఎం హామీ బూటకమేనని శనివారం ఒక ప్రకటనలో మండిపడ్డారు. బీజేపీ చేస్తున్న కుట్రలు, కుతంత్రాలను తెలుసుకోగలిగే విజ్ఞత తెలంగాణ ప్రజలకు ఉనదని తెలిపారు.

తెలంగాణ ప్రజలు బీజేపీని అడుగుతున్న ప్రశ్నలకు సమాధానాలు చెప్పాలని డిమాండ్‌ చేశారు. బీజేపీ 2014లో వెనుకబడిన వర్గాల నాయకుడని నరేంద్ర మోదీని చూపించి.. అధికారం దకించుకొని.. ఆ తరువాత బీసీలకు చేసిన మేలేమిటో చెప్పాలని సవాల్‌ చేశారు. దేశవ్యాప్తంగా బీసీలను దారుణంగా అణచివేసిన బీజేపీ తెలంగాణ ఓటర్లను మభ్యపెట్టాలని బూటకపు నినాదం ఎత్తుకున్నదని మండిపడ్డారు. రాష్ట్రంలో బీజేపీ అధికారంలోకి రావడం పగటికలేనని తేల్చిచెప్పారు. కేంద్రమంత్రి అమిత్‌షాకు ఆయన కొన్ని ప్రశ్నలు సంధించారు.

• రాష్ట్ర అధ్యక్ష పదవి నుంచి బీసీని ఎందుకు తొలగించారు?
• బీసీ కులగణనను ఎందుకు నిర్వహించలేకపోతున్నారు?
• కేంద్రప్రభుత్వంలో ఓబీసి మంత్రిత్వ శాఖ ఎందుకు లేదు?
• ఓబీసీ రిజర్వేషన్ల బిల్లును ఎందుకు ప్రవేశపెట్టలేదు?
• జాతీయ ఓబీసీ కమిషన్‌ను ఎందుకు బలహీనం చేశారు?
• జాతీయ ఓబీసీ కార్పొరేషన్‌ను ఎందుకు నిర్లక్ష్యం చేశారు?
• ఓబీసీలకు ప్రత్యేకమైన బడ్జెట్‌ కేటాయించకుండా.. వారి పట్ల మీ ప్రభుత్వం ఎందుకు వివక్ష చూపుతున్నది?
• బ్యాక్‌లాగ్‌ పోస్టుల భర్తీలో ఎందుకు విఫలమైంది?
• భారతదేశంలోని సెంట్రల్‌ ఇన్‌స్టిట్యూట్‌లు, యూనివర్సిటీలలోని వివిధ రిక్రూట్‌మెంట్లలో ఓబీసీ రిజర్వేషన్లు ఎందుకు అమలు చేయడం లేదు ?