Telangana | ఉన్నత విద్యలో ఎస్సీ, ఎస్టీల హవా.. ఐదేండ్లలో ఆరు శాతం పెరిగిన ఎన్‌రోల్‌మెంట్‌ రేషియో

ఉన్నత విద్యలో ప్రవేశాలు పొందే ఎస్సీ, ఎస్టీ వర్గాలకు చెందిన విద్యార్థుల సంఖ్య రాష్ట్రంలో ఏటేటా పెరుగుతున్నది. మరీ ముఖ్యంగా అమ్మాయిలు, ఎస్సీ, ఎస్టీ సామాజికవర్గాల ఎన్‌రోల్‌మెంట్‌ గణనీయంగా మెరుగవుతున్నది. ఇదే విషయాన్ని ఆలిండియా సర్వే ఆన్‌ హయ్యర్‌ ఎడ్యుకేషన్‌ (అయిషే) సర్వే వెల్లడించింది.

• రాష్ట్రంలో భారీగా పెరిగిన బీఈఆర్‌
• ఐదేండ్లలో ఆరు శాతం పెరుగుదల
• 34% 2017-18లో
• 40% 2021-22లో
• అన్ని క్యాటగిరీల్లో తెలంగాణే బెటర్‌
• రాష్ర్టాలవారీగా రాష్ర్టానికి ఐదో స్థానం
• అయిషే 2021 -22 నివేదికలో వెల్లడి

Telangana | హైదరాబాద్‌, జనవరి 26 (నమస్తే తెలంగాణ): ఉన్నత విద్యలో ప్రవేశాలు పొందే ఎస్సీ, ఎస్టీ వర్గాలకు చెందిన విద్యార్థుల సంఖ్య రాష్ట్రంలో ఏటేటా పెరుగుతున్నది. మరీ ముఖ్యంగా అమ్మాయిలు, ఎస్సీ, ఎస్టీ సామాజికవర్గాల ఎన్‌రోల్‌మెంట్‌ గణనీయంగా మెరుగవుతున్నది. ఇదే విషయాన్ని ఆలిండియా సర్వే ఆన్‌ హయ్యర్‌ ఎడ్యుకేషన్‌ (అయిషే) సర్వే వెల్లడించింది. 2017-18 నుంచి 2021-22 మధ్య ఐదేండ్ల కాలంలో రాష్ట్రంలో మొత్తం నమోదు 6 శాతం పెరిగింది. ఇదివరకు 34 శాతం ఉండగా, ఐదేండ్లల్లో 40.0శాతానికి చేరగా, పురుషుల నమోదు నాలుగు శాతం పెరిగి 34.7శాతం నుంచి 38.5శాతానికి, మహిళల నమోదు ఏకంగా 7 శాతం పెరిగి 34.1 శాతం నుంచి 41.56 శాతానికి చేరింది.

• ఎస్సీల మొత్తం నమోదు శాతం 30.4 శాతం నుంచి 39.2శాతానికి చేరగా, పురుషుల నమోదు 28.6శాతం నుంచి 35.6శాతానికి, మహిళల నమోదు 32.4శాతం నుంచి 42.9శాతానికి అంటే ఏకంగా 10 శాతం పెరిగింది.
• ఎస్టీల నమోదు శాతాన్ని పరిశీలిస్తే మొత్తం నమోదు 28.4% నుంచి 38% చేరగా, పురుషుల నమోదు 30.2% నుంచి 39.1 శాతానికి, మహిళల నమోదు 26.6శాతం నుంచి 36.9 శాతానికి చేరింది.
• జాతీయ సగటు జీఈఆర్‌ 28.4శాతం, పురుషుల జీఈఆర్‌ 28.3, మహిళల జీఈఆర్‌ 28.5శాతం మాత్రమే ఉన్నది. ఎస్సీ, ఎస్టీసహా మహిళల ఏ క్యాటగిరీలో తీసుకున్నా తెలంగాణ జాతీయ సగటు కన్నా ఉత్తమంగా ఉండటం విశేషం.
• రాష్ట్రంలో విద్యార్థుల సంఖ్యాపరంగా ఉన్నత విద్యలో మొత్తం నమోదు 2017-18లో 14.19 లక్షలు ఉండగా, 2021- 22కు వచ్చేసరికి 15.96 లక్షలకు చేరింది. అంటే 1.77 లక్షల నమోదు పెరిగింది. పురుషుల నమోదు 7.35 లక్షల నుంచి 7.93 లక్షలకు పెరిగితే మహిళల నమోదు 6.83 లక్షల నుంచి 8.03 లక్షలకు చేరింది.
• ఎస్సీ విద్యార్థుల నమోదు 2017-18లో మొత్తం నమోదు 2.03 లక్షలుంటే 2021 -22లో 2.53 లక్షలకు చేరింది. పురుషుల నమోదు 98 వేల నుంచి 1.19 లక్షలకు చేరితే మహిళల నమోదు 1.05 లక్షల నుంచి 1.34 లక్షలకు చేరింది.
• ఎస్టీల నమోదు 2017-18 నుంచి 2021 – 22 మధ్యకాలంలో 1.06 లక్షల నుంచి 1.37 లక్షలకు, పురుషుల నమోదు 57 వేల నుంచి 72 వేలకు, మహిళల ఎన్‌రోల్‌మెంట్‌ 48వేల నుంచి 65వేలకు పెరిగింది.
• ఓబీసీల నమోదు 2017-18 నుంచి 2021-22 మధ్యకాలంలో 5.96 లక్షల నుంచి 7.39 లక్షలకు చేరగా, పురుషుల నమోదు 3.03 లక్షల నుంచి 3.70 లక్షలకు, మహిళల నమోదు 2.92లక్షల నుంచి 3.68 లక్షలకు పెరిగింది.

సర్వేలో వెల్లడైన విషయాలు

• కళాశాలల సాంద్రత (కాలేజ్‌ డెన్సిటీ) పరంగా 18-23 ఏండ్ల మధ్య వయస్సుగల లక్ష జనాభాకు అత్యధిక కాలేజీలున్న రాష్ర్టాల్లో 66 కాలేజీలతో కర్ణాటక మొదటిస్థానంలో ఉన్నది. ఆ తర్వాత 52 కాలేజీలతో తెలంగాణ రెండోస్థానం, 49 కాలేజీలతో ఏపీ మూడోస్థానంలో ఉన్నది. ఈ విషయంలో జాతీయ సగటు కాలేజీల సంఖ్య 30 మాత్రమే.
• ఒక రాష్ట్రంలో అత్యధిక కాలేజీలున్న వాటిలో మహారాష్ట్ర, కర్ణాటక, రాజస్థాన్‌, తమిళనాడు, మధ్యప్రదేశ్‌ టాప్‌ 5లో నిలువగా, ఆ తర్వాత ఏపీ, గుజరాత్‌ తర్వాత తెలంగాణ 2,395 కాలేజీలతో 8వ స్థానంలో ఉన్నది.
• ఉన్నత విద్య నమోదులో తెలంగాణసహా పలు రాష్ర్టాల్లో పురుషులను వెనక్కినెట్టి మహిళలు దూసుకుపోతున్నారు. కేరళ, తెలంగాణ, హర్యానా, అసోం, హిమాచల్‌ప్రదేశ్‌, జమ్ముకశ్మీర్‌, మేఘాలయ, చత్తీస్‌గఢ్‌లలో పురుషుల కన్నా.. మహిళల నమోదు అధికంగా ఉన్నది.
• కేంద్రపాలిత ప్రాంతాలను మినహాయిస్తే అత్యధికంగా నమోదుశాతం గల రాష్ర్టాల్లో తెలంగాణ నాలుగోస్థానంలో ఉన్నది. తమిళనాడు (47), హిమాచల్‌ప్రదేశ్‌ (43.1), ఉత్తరాఖండ్‌ (41.8), కేరళ (41.3), తెలంగాణ (40) రాష్ర్టాలు వరుసగా టాప్‌ 5 రాష్ర్టాల్లో నిలిచాయి.
• ఒక కాలేజీలో సగటు ఎన్‌రోల్‌మెంట్‌ తెలంగాణలో ఏటా పెరుగుతున్నది. 2017-18లో 558 మంది విద్యార్థులుండగా, 2018-19లో 554, 2019-20లో 545, 2020-21లో 556, 2021-22లో 611 మంది విద్యార్థులకు చేరింది.
• రాష్ట్రంలోని మొత్తం కాలేజీల సంఖ్య సైతం పెరుగుతున్నది. 2017-18లో రాష్ట్రంలో మొత్తం కాలేజీల సంఖ్య 2,045 కాగా, 2018-19లో 1,988, 2019-20లో 2,071, 2020-21లో 2,062, 2021, 22లో 2,083 కాలేజీలకు చేరింది.