Congress Govt | 17 నెలల్లో 3 కమిటీలు.. ఉద్యోగులకు ఇచ్చిన మాట మీద నిలబడని ప్రభుత్వం

అయితే మంత్రివర్గ ఉపసంఘం! లేదంటే అధికారుల కమిటీ! ఇంకొంచెం ముందుకెళ్తే అధికారులు, ప్రజాప్రతినిధుల మేళవింపుతో మరో అత్యున్నత స్థాయి కమిటీ! ఇలా కమిటీ వెయ్‌... సాగదియ్‌! అన్నట్టుగా ఉన్నది రాష్ట్ర ప్రభుత్వ తీరు! ఉద్యోగ సంఘాల డిమాండ్లపై ప్రతిసారీ ఏదో ఒక కమిటీని సర్కారు ముందుకు తెచ్చి సాగదీస్తున్నది. తమ డిమాండ్లు నెరవేరకపోవడంతో ఉద్యోగ సంఘాల జేఏసీ కార్యాచరణ ప్రకటించడం.. సర్కారు చర్చలు జరపడం.. సమస్యలు వినడం.. కమిటీ వేయడం.. ఈ కమిటీకి సమస్యలు చెప్పుకోమనడం.. తీరా కాలయాపన చేయడం సర్వసాధారణమైంది. సీనియర్‌ అధికారులతో త్రిసభ్య కమిటీతో కలిపి 17 నెలల్లో ఉద్యోగ సంఘాల డిమాండ్లపై సర్కారు మూడు కమిటీలు వేసింది.

• ఉద్యోగుల డిమాండ్లపై మళ్లీ సాగదీతే
• త్రిసభ్య కమిటీ వేసినా ఫలితం శూన్యం
• ముగిసిన గడువు.. మరోసారి చర్చలట!
• ఇంకా రాష్ట్ర సర్కారుకు అందని నివేదిక
• ఉద్యోగ సంఘాల జేఏసీ నేతల్లో విసుగు

Congress Govt | హైదరాబాద్‌, మే 17 (నమస్తే తెలంగాణ): అయితే మంత్రివర్గ ఉపసంఘం! లేదంటే అధికారుల కమిటీ! ఇంకొంచెం ముందుకెళ్తే అధికారులు, ప్రజాప్రతినిధుల మేళవింపుతో మరో అత్యున్నత స్థాయి కమిటీ! ఇలా కమిటీ వెయ్‌… సాగదియ్‌! అన్నట్టుగా ఉన్నది రాష్ట్ర ప్రభుత్వ తీరు! ఉద్యోగ సంఘాల డిమాండ్లపై ప్రతిసారీ ఏదో ఒక కమిటీని సర్కారు ముందుకు తెచ్చి సాగదీస్తున్నది. తమ డిమాండ్లు నెరవేరకపోవడంతో ఉద్యోగ సంఘాల జేఏసీ కార్యాచరణ ప్రకటించడం.. సర్కారు చర్చలు జరపడం.. సమస్యలు వినడం.. కమిటీ వేయడం.. ఈ కమిటీకి సమస్యలు చెప్పుకోమనడం.. తీరా కాలయాపన చేయడం సర్వసాధారణమైంది.

సీనియర్‌ అధికారులతో త్రిసభ్య కమిటీతో కలిపి 17 నెలల్లో ఉద్యోగ సంఘాల డిమాండ్లపై సర్కారు మూడు కమిటీలు వేసింది. త్రిసభ్య కమిటీ వేసినా జేఏసీ డిమాండ్లు పరిష్కారమయ్యేలా కనిపించడంలేదు. ఈ కమిటీకిచ్చిన వారం రోజుల గడువు ముగిసింది. ఈ మంగళవారం వస్తే పక్షం రోజులవుతున్నది. కానీ కమిటీ ఇంకా నివేదికను సర్కారుకు అందజేయలేదు. మరో రెండురోజుల్లో జేఏసీతో ఈ కమిటీ మరోసారి చర్చలు జరపనున్నది. దీంతో మళ్లీ సాగదీతేనా? కాలయాపనేనా? అని ఉద్యోగ సంఘాల జేఏసీ నేతలు విస్మయం వ్యక్తంచేస్తున్నారు.

సందర్భం.. కమిటీ..

• పార్లమెంట్‌ ఎన్నికల ముందు మార్చి 10న ఎంసీఆర్‌హెచ్చాఆర్డీలో ఉద్యోగ సంఘాల ఆత్మీయ సమ్మేళనం నిర్వహించారు. సీఎం రేవంత్‌ సహా మంత్రులు హాజరయ్యారు. ఉద్యోగ సంఘాలు తమ సమస్యలను ఏకరువుపెట్టాయి. తర్వాత ప్రణాళికా సంఘం ఉపాధ్యక్షుడు చిన్నారెడ్డి, ప్రొఫెసర్‌ కోదండరాం, ఐఏఎస్‌ అధికారి దివ్యాదేవరాజన్‌తో కమిటీ వేశా రు. జేఏసీ నేతలతో పలు ధఫాలుగా చర్చలు జరిపినా ఒక్క సమస్యా పరిష్కారం కాలేదు.
• ఉద్యోగుల డిమాండ్లను పరిష్కరించడంలో ప్రభుత్వ వైఫల్యాన్ని నిరసిస్తూ 2024, అక్టోబర్‌ 22న ఎంప్లాయీస్‌ జేఏసీ ఉద్యమ కార్యాచరణను ప్రకటించింది. జడుసుకున్న సర్కారు జేఏ సీ నేతలను చర్చలకు ఆహ్వానించింది. 2024, అక్టోబర్‌ 24న సీఎం రేవంత్‌రెడ్డి కమాండ్‌ కం ట్రోల్‌ సెంటర్‌లో చర్చలు జరిపారు. ఈ సందర్భంగా మంత్రివర్గ ఉపసంఘాన్ని వేస్తున్నట్టు సీఎం ప్రకటించారు. డిప్యూటీ సీఎం భట్టి విక్రమార్క చైర్మన్‌గా మంత్రులు డీ శ్రీధర్‌బాబు, పొన్నం ప్రభాకర్‌ సభ్యులుగా ప్రభుత్వ సలహాదారు కే కేశవరావు ప్రత్యేక ఆహ్వానితులుగా, జీడీఏ పీఎస్‌ మెంబర్‌ కన్వీనర్‌గా ఏర్పాటైన మంత్రివర్గ ఉపసంఘం జేఏసీతో చర్చించ లేదు.. ఏసమస్యనూ పరిష్కరించిందీ లేదు.
• ఉద్యోగ, ఉపాధ్యాయ, పెన్షనర్ల సమస్యలను ప్రభుత్వం పరిష్కరించకపోవడంతో జేఏసీ ప్రత్యక్ష కార్యాచరణ ప్రకటించింది. మే 15న నల్లబ్యాడ్జీలతో నిరసన, జూన్‌ 9న చలో హైదరాబాద్‌కు పిలుపునిచ్చింది. దీంతో ఐఏఎస్‌ అధికారి నవీన్‌మిట్టల్‌ చైర్మన్‌గా, కృష్ణభాస్కర్‌, లోకేశ్‌కుమార్‌ సభ్యులుగా కమిటీ వేసింది. వారంలోగా నివేదికను అందజేయాలని సర్కారు ఆదేశించగా, ఈ గడువు ముగిసిపోయింది.

లెక్కలేనన్ని అవమానాలు..

• ‘జీవో-317పై క్యాబినెట్‌ సబ్‌ కమిటీ రిపోర్టును సీల్డ్‌ కవర్‌లో సమర్పించింది. సీల్డ్‌ కవర్‌ను నేను ఓపెన్‌ చేయలేదు. ఆ నివేదిక సీఎస్‌ దగ్గరున్నది. మీరంతా సీఎస్‌ను కలిస్తే నివేదిక ఇస్తారు. ఆ నివేదికను అధ్యయనం చేసి, మార్పులు చేర్పులుంటే సూచించండి. క్యాబినెట్‌లో ఆయా అంశాలను చర్చించి పరిష్కరిస్తాం’ అని అక్టోబర్‌లో ఉద్యోగ సంఘాల జేఏసీ నేతలతో సీఎం రేవంత్‌రెడ్డి చెప్పిన మాటలివి! జేఏసీ నేతలంతా ఈ నివేదికను తీసుకుందామని సచివాలయానికి వెళ్లారు. ‘జీవో-317 క్యాబినెట్‌ సబ్‌ కమిటీ నివేదిక ఫైల్‌ సర్క్యులేషన్‌లో ఉన్నది. ఇప్పడైతే మేము ఇవ్వలేము’ అంటూ సీఎస్‌ శాంతికుమారి చెప్పడంతో జేఏసీ నేతలంతా అవమాన భారంతో వెనుదిరిగారు.
• కమాండ్‌ కంట్రోల్‌ సెంటర్‌లో చర్చల సమయంలో క్యాబినెట్‌ సబ్‌ కమిటీ ఏర్పాటు చేస్తామని సాక్షాత్తు సీఎం రేవంత్‌రెడ్డి హామీనిచ్చారు. సీఎం చెప్పినట్టు క్యాబినెట్‌ సబ్‌ కమిటీ ఏర్పాటుకాలేదు. సీఎం చెప్పిన తర్వాత కూడా సబ్‌ కమిటీని ఏర్పాటు చేయకపోవడంతో ఉద్యోగుల జేఏసీ నేతలు సచివాలయంలో సీఎంవో అధికారులను ప్రశ్నించారు. జేఏసీ నేతలు వెళ్లి అడిగితే ప్రభుత్వం జీవోను జారీచేసింది.
• ‘ఆర్థిక ఇబ్బందుల్లో ఉన్నాం. అర్థం చేసుకోండి. డిసెంబర్‌ లోపు ఉద్యోగుల ఆర్థికేతర సమస్యలు పరిష్కరిస్తాం. ఏప్రిల్‌లోపు ఆర్థిక సమస్యలు పరిష్కరిస్తాం’ ఇది జేఏసీ నేతలకు సీఎం రేవంత్‌రెడ్డి ఇచ్చిన హామీ. 2014 డిసెంబర్‌ పోయింది. అయినా ఒక్క సమస్య పరిష్కారం కాలేదు. 2025 ఏప్రిల్‌ కూడా గడిచింది. ఆర్థిక సమస్యలకు దిక్కూమొక్కూలేకుండా పోయింది.
• మార్చి 7న ఉద్యోగ సంఘాల జేఏసీ నేతలు ఉపముఖ్యమంత్రి భట్టి విక్రమార్కతో సమావేశమయ్యారు. ఏప్రిల్‌ నుంచి నెలకు 500-600 కోట్ల చొప్పున ఏడాదిలో పెండింగ్‌ బిల్లులను క్లియర్‌ చేస్తామని భట్టి హామీనిచ్చారు. ‘ఇక నుంచి ఎవరిచుట్టూ తిరగాల్సిన పనిలేదు. మాదీ పూచి!’ అన్నారు. ఏప్రిల్‌ పోయి మే వచ్చింది. అయినా ఒక్క బిల్లు కూడా చెల్లిస్తే ఒట్టు.
• ఈ ఏప్రిల్లో జేఏసీ నేతలు డిప్యూటీ సీఎం భట్టిని కలిశారు. ఏప్రిల్‌ 12న చర్చలకు ఆహ్వానించారు. ఈ క్రమంలో జేఏసీ నేతలు సర్కారు తీరుపట్ల ఫైరయ్యారు. దీంతో చర్చలు ఆహ్వానం దశలోనే వాయిదాపడ్డాయి.
• కాంగ్రెస్‌ తీరును నిరసిస్తూ జేఏసీ ఈ నెల 15న నల్లబ్యాడ్జీలతో నిరసన, జూన్‌ 9న చలో హైదరాబాద్‌కు పిలుపునిచ్చింది. ఈ నేపథ్యంలో సీఎం రేవంత్‌రెడ్డి ఉద్యోగులపై నోరుపారేసుకున్నారు. ‘ఎవరిపై సమరం? ఎవరి మీద యుద్ధం ప్రకటిస్తున్నరు? ఉద్యోగ సంఘాల నేతలు నన్ను కోసుకుని తింటరా? నన్ను వండుకుని తింటరా ? పెన్షన్లు, ఉచిత కరెంట్‌ ఏది ఆపుమంటరో మీరే చెప్పండి. మేం మాత్రం బోనస్‌లు తీసుకుంటం. జీతాలు పెంచుకుంటం. మేం తినంగ మిగిలితేనే ప్రజలకు పెడతామని చెప్పండి’ అం టూ ఉద్యోగులను తీవ్రంగా అవమానించారు.

రగులుతున్న ఉద్యోగులు

తమ సమస్యలు, డిమాండ్లను పరిష్కరించకపోవడంతో పాటు సర్కారు తమను తీవ్రంగా అవమానిస్తుండటంతో ఉద్యోగ సంఘాల నేతలు రగిలిపోతున్నారు. ప్రజా ప్రభుత్వంలో తమకు ఎదురవుతున్న అవమానాలను తలుచుకొని కుమిలిపోతున్నారు. ‘మా డిమాండ్ల సాధనకు ఎక్కని ఆఫీసులేదు.. తొక్కని గడపలేదు. ప్రభుత్వాన్ని కలిసేందుకు మాకు అపాయింట్‌మెంట్‌ కూడా ఇవ్వడంలేదు. చర్చలకు ఆహ్వానించలేదు. సావధానంగా కూర్చోబెట్టి మాతో చర్చించిన, మాట్లాడిన దాఖలాల్లేవు. అసలు ఈ రాష్ట్రంలో ఉద్యోగులు, ఉద్యోగ సంఘాలకు గౌరవమే దక్కడంలేదు. సంఘాలకు కనీస గుర్తింపునివ్వడంలేదు. ఉద్యోగులుగా మేము పోరాటం చేయాల్సి రావడం బాధాకరం’ అంటూ ఓ ఉద్యోగ సంఘం నేత వాపోయారంటే పరిస్థితి ఎలా ఉన్నదో అర్థం చేసుకోవచ్చు. ‘మేం ఉద్యోగులకు నచ్చజెప్పలేకపోతున్నం.

ఉద్యోగ సంఘాలు ప్రభుత్వంతో రాజీ పడ్డాయని ఉద్యోగులు మమ్మల్ని నిందిస్తున్నరు. ఏ జిల్లా కలెక్టర్‌ కూడా ఉద్యోగ సంఘాలతో ఒక్కసారి కూడా సమావేశం కాలేదు. సమస్యలను పరిష్కరించలేదు. జాయింట్‌ స్టాఫ్‌ కౌన్సిల్‌ ఏర్పాటు చేయాలని జీఏడీలో ఇప్పటివరకు వందసార్లు వినతిపత్రాలిచ్చినం. ఆఫీసర్ల కమిటీ వేయాలని సీఎస్‌ వద్దకు దాదాపు 20 సార్లు వెళ్లినం. ముఖ్యమైన సమస్యలను మంత్రులు, అధికారులు పరిష్కరించకపోతే మాకెవరు దిక్కు’ అంటూ మరో నేత అసంతృప్తి వెళ్లగక్కారు. అయినా సర్కారు ఉద్యోగ సంఘాలను ఖాతరు చేయడం లేదు. పైగా పలుమార్లు తీవ్రంగా అవమానించింది.