Telangana | చాక్‌పీసులు, డస్టర్లు కొనేందుకు డబ్బులేవి.. 4 నెలలైనా ఒక్క రూపాయి ఇవ్వని విద్యాశాఖ

Telangana | కాంపొజిట్‌ స్కూల్‌ గ్రాంట్‌. పాఠశాలల్లో చాక్‌పీసులు, డస్టర్లు కొనాలన్నా.. ఇంటర్నెట్‌, విద్యుత్తు బిల్లులు చెల్లించాలన్నా .. పంద్రాగస్టుకో, జనవరి 26కో స్వీట్లు పంపిణీ చేయాలన్నా ఈ నిధులే ఆధారం. ఇలాంటి స్కూల్‌ గ్రాంట్‌ నిధులు ఇంతవరకు మంజూరు కాలేదు. విద్యాసంవత్సరం ప్రారంభమై నాలుగు నెలలు గడుస్తున్నా సర్కారు ఒక్క రూపాయి విదిల్చలేదు.

Telangana | హైదరాబాద్‌, సెప్టెంబర్‌ 10 (నమస్తే తెలంగాణ): కాంపొజిట్‌ స్కూల్‌ గ్రాంట్‌. పాఠశాలల్లో చాక్‌పీసులు, డస్టర్లు కొనాలన్నా.. ఇంటర్నెట్‌, విద్యుత్తు బిల్లులు చెల్లించాలన్నా .. పంద్రాగస్టుకో, జనవరి 26కో స్వీట్లు పంపిణీ చేయాలన్నా ఈ నిధులే ఆధారం. ఇలాంటి స్కూల్‌ గ్రాంట్‌ నిధులు ఇంతవరకు మంజూరు కాలేదు. విద్యాసంవత్సరం ప్రారంభమై నాలుగు నెలలు గడుస్తున్నా సర్కారు ఒక్క రూపాయి విదిల్చలేదు. దీంతో టీచర్లే తలా కొంత వేసుకుని.. జేబు నుంచి ఖర్చుచేయాల్సిన పరిస్థితి నెలకొన్నది. దీంతో టీచర్లంతా సర్కారు తీరుపై భగ్గుమంటున్నారు.

గత సర్కారు జూలైలోనే 50శాతం నిధులను విడుదల చేసింది. కానిప్పుడు ఇంకా నిధులు విడుదల కాకపోవడంతో పాఠశాల నిర్వహణ అధ్వానంగా తయారైంది. స్కూల్‌ గ్రాంట్‌ నిధుల్లో నుంచి విద్యుత్తు బిల్లులు చెల్లించేవారు. అయితే ఇటీవలే సర్కారు విద్యాసంస్థలకు ఉచిత విద్యుత్తును ప్రకటించింది. దీంతో స్కూల్‌ గ్రాంట్‌గా ఇచ్చే నిధుల్లో కొంతమేర కోతలు పెట్టే ప్రతిపాదనలు విద్యాశాఖ పరిశీలనలో ఉన్నాయి. ఇదే జరిగితే ఒక్కో స్కూల్‌కు రూ.3 నుంచి నాలుగు వేలు కోతపడనున్నది. ఒక్క స్కూల్‌ గ్రాంటే కాకుండా పారిశుద్ధ్య నిధులు, ఇతర గ్రాంట్‌లను కూడా ప్రభుత్వం విడుదల చేయడంలేదు.

• పారిశుద్ధ్య నిర్వహణకు విద్యార్థుల సంఖ్యను బట్టి స్కూల్‌ ఫెసిలిటీ గ్రాంట్‌గా రూ. 3వేల నుంచి 30వేల వరకు ప్రభుత్వం నిధులిస్తామన్నది. సింగరేణి సంస్థ ద్వారా రూ.136 కోట్ల డీఎంఎఫ్‌టీ ఫండ్స్‌ను కేటాయించాలని ఆయా సంస్థకు ఆదేశాలిచ్చింది. కానీ ఇంతవరకు ఈ నిధులు కలెక్టర్ల ఖాతాల్లో జమకాలేదు.
• స్పోర్ట్స్‌ గ్రాంట్‌గా ప్రాథమిక స్కూళ్లకు ఐదువేలు, ప్రాథమికోన్నత, ఉన్నత పాఠశాలలకు పది వేల చొప్పున ఇవ్వాల్సి ఉండగా, ఇంతవరకు విడుదల చేయలేదు.
• మండల రిసోర్స్‌ సెంటర్లు(ఎంఆర్‌సీ), క్లస్టర్‌ రిసోర్స్‌ సెంటర్లకు(సీఆర్‌సీ) రూ. 39వేల గ్రాంట్‌ను విడుదల చేయాల్సి ఉండగా రూపాయి విడుదల చేయలేదు.
• కేజీబీవీలు, మాడల్‌ స్కూళ్లల్లోని హాస్టళ్లకు రోజువారీ ఖర్చులకు రూ. 30వేలు అడ్వాన్స్‌డ్‌గా ఇస్తామని విద్యాశాఖ ప్రొసీడింగ్స్‌ ఇచ్చింది. ఇంకా 20 జిల్లాల్లోని కేజీబీవీలు, మాడల్‌ స్కూల్‌ అటాచ్డ్‌ హాస్టళ్లకు ఇంతవరకు అడ్వాన్స్‌ మొత్తం అందలేదు.

పారిశుద్ధ్య నిధులు విడుదల చేయండి: టీఎస్‌జీహెచ్‌ఎంఏ

పాఠశాలల్లో పారిశుద్ధ్య నిర్వహణకు కేటాయించిన నిధులను విడుదల చేయాలని తెలంగాణ గెజిటెడ్‌ హెడ్మాస్టర్స్‌ అసోసియేషన్‌ (టీఎస్‌జీహెచ్‌ఎంఏ) ప్రభుత్వాన్ని కోరింది. ఇప్పటివరకు పారిశుధ్య నిధులింకా విడుదలకాలేదని, తక్షణమే ఈ నిధులను అమ్మ ఆదర్శ పాఠశాల కమిటీలకు అందేలా చూడాలని అసోసియేషన్‌ రాష్ట్ర అధ్యక్షుడు రాజభాను చంద్రప్రకాశ్‌, ప్రధాన కార్యదర్శి రాజుగంగారెడ్డి, కోశాధికారి బీ తుకారాం ప్రభుత్వాన్ని కోరారు. మంగళవారం పాఠశాల విద్యాశాఖ అధికారులను కలిసి వినతిపత్రాన్ని సమర్పించారు. నిధుల వినియోగానికి సంబంధించిన మార్గదర్శకాలను, ఎప్పటినుంచి ఈ నిధులను వినియోగించుకోవాలో స్పష్టంచేయాలని ప్రభుత్వాన్ని కోరారు.