సత్యమే ఎప్పుడూ గెలుస్తుంది.. లిక్కర్‌ కేసు తీర్పుపై పంజాబ్‌ సీఎం భగవంత్‌ మాన్‌

ఢిల్లీ లిక్కర్‌ కేసులో మాజీ సీఎం కేజ్రీవాల్‌, మాజీ డిప్యూటీ సీఎం మనీశ్‌ సిసోడియాలను న్యాయస్థానం నిర్దోషులుగా ప్రకటించడం పట్ల పంజాబ్‌ ముఖ్యమంత్రి భగవంత్‌ మాన్‌ శుక్రవారం హర్షం వ్యక్తం చేస్తూ ‘సత్యం ఎప్పుడూ గెలుస్తుంది’ అని పేర్కొన్నారు.

చండీగఢ్‌: ఢిల్లీ లిక్కర్‌ కేసులో మాజీ సీఎం కేజ్రీవాల్‌, మాజీ డిప్యూటీ సీఎం మనీశ్‌ సిసోడియాలను న్యాయస్థానం నిర్దోషులుగా ప్రకటించడం పట్ల పంజాబ్‌ ముఖ్యమంత్రి భగవంత్‌ మాన్‌ శుక్రవారం హర్షం వ్యక్తం చేస్తూ ‘సత్యం ఎప్పుడూ గెలుస్తుంది’ అని పేర్కొన్నారు. కోర్టు తీర్పు వెలువడిన వెంటనే ఆప్‌ కార్యాలయంలో సంబరాలు మిన్నంటాయి. కార్యకర్తలు, నేతలు స్వీట్లు పంచుకుంటూ ఆనందాన్ని వ్యక్తం చేయగా, మరికొందరు డప్పు చప్పుళ్ల మధ్య నృత్య్లాలు చేశారు.

కోర్టు తీర్పును పంజాబ్‌ ఆప్‌ అధ్యక్షుడు, మంత్రి అమన్‌ అరోరా స్వాగతిస్తూ ఈ తీర్పు ద్వారా కేంద్రంలో అధికారంలో ఉన్న బీజేపీ ప్రభుత్వం అధికార దుర్వినియోగానికి పాల్పడిన విషయం వెల్లడైందన్నారు. దర్యాప్తు సంస్థలను అడ్డం పెట్టుకుని ఆప్‌, కేజ్రీవాల్‌ పరువును తీయడానికి కేంద్రం ప్రయత్నించిందన్నారు.

మద్యం కేసులో ఎప్పుడు ఏం జరిగింది?

• మార్చి, 2021: నూతన మద్యం పాలసీకి ఢిల్లీ మంత్రి మండలి ఆమోదం
• జూలై 20, 2022: పాలసీలో అవకతవకలు జరిగాయంటూ కేంద్ర హోంశాఖకు ఢిల్లీ ఎల్జీ లేఖ.. సీబీఐ దర్యాప్తుకు విజ్ఞప్తి
• 17 ఆగస్టు, 2022: ఎఫ్‌ఐఆర్‌ నమోదు చేసిన సీబీఐ
• 19 ఆగస్టు, 2022: అప్పటి ఢిల్లీ డిప్యూటీ సీఎం మనీశ్‌ సిసోడియా సహా పలువురి ఇండ్లల్లో సీబీఐ సోదాలు
• 30 సెప్టెంబర్‌, 2022: మద్యం పాలసీని ఉపసంహరించిన ఎల్జీ
• 26 ఫిబ్రవరి, 2023: సిసోడియాను అరెస్టు చేసిన సీబీఐ.. మద్యం కేసులో ఈడీ మనీలాండరింగ్‌ కేసు
• అక్టోబర్‌, 2023: ఎంపీ సంజయ్‌ సింగ్‌ను అరెస్టు చేసిన ఈడీ
• 15 మార్చి, 2024: మాజీ ఎమ్మెల్సీ కవితను అరెస్ట్‌ చేసిన ఈడీ
• 21 మార్చి 2024: అప్పటి ఢిల్లీ సీఎం కేజ్రీవాల్‌ను అరెస్ట్‌ చేసిన ఈడీ
• ఏప్రిల్‌, 2024: సంజయ్‌ సింగ్‌కు కోర్టు బెయిల్‌
• ఆగస్టు, 2024: సిసోడియాకు, కవితకు కోర్టు బెయిల్‌
• సెప్టెంబర్‌, 2024: కేజ్రీవాల్‌కు కోర్టు బెయిల్‌
• 27 ఫిబ్రవరి, 2026: స్కామ్‌ జరిగినట్టు ఆధారాలు లేవంటూ కేసు కొట్టేసిన ఢిల్లీలోని రౌస్‌ అవెన్యూ కోర్టు