విద్యాధికులే నిరుద్యోగులు

‘ఏడాదికి రెండు కోట్ల ఉద్యోగాలు ఇస్తాం’ అని ప్రధాని మోదీ ఇచ్చిన హామీ ఎప్పుడో గాలిలో కలిసిపోయింది. పెట్టుబడులను ఆకర్షించడం, పరిశ్రమలు తేవడం, ఉద్యోగాలు కల్పించడం చేతగాక.. ‘పకోడీ వేసుకోవడం కూడా ఉపాధి కిందికే వస్తుంది’ అని కేంద్ర మంత్రి ఉచిత సలహా ఇచ్చే దుస్థితికి దిగజారిన సంగతి తెలిసిందే. ఇలా కేంద్రంలోని బీజేపీ ప్రభుత్వ నిర్లక్ష్య వైఖరి కారణంగా ఉన్నత చదువులు చదివిన వారు నిరుద్యోగులుగా మిగిలిపోతున్నారు. కూలీనాలీ చేసుకోలేక.. చదువుకు తగిన ఉద్యోగం దొరుకక ఎంతో మంది విద్యావంతులు మానసికంగా నలిగిపోతున్నారు.

• యువతకు ఉపాధి కల్పనలో కేంద్ర ప్రభుత్వం నిర్లక్ష్యం
• ఉన్నత చదువులు చదివినా యువతకు ఉద్యోగం కరువు
• చదువు పెరుగుతున్న కొద్దీ పెరిగిన నిరుద్యోగం
• పార్లమెంట్‌లో వివరాలు వెల్లడించిన కేంద్ర ప్రభుత్వం

హైదరాబాద్‌, ఏప్రిల్‌ 3 (నమస్తే తెలంగాణ): ‘ఏడాదికి రెండు కోట్ల ఉద్యోగాలు ఇస్తాం’ అని ప్రధాని మోదీ ఇచ్చిన హామీ ఎప్పుడో గాలిలో కలిసిపోయింది. పెట్టుబడులను ఆకర్షించడం, పరిశ్రమలు తేవడం, ఉద్యోగాలు కల్పించడం చేతగాక.. ‘పకోడీ వేసుకోవడం కూడా ఉపాధి కిందికే వస్తుంది’ అని కేంద్ర మంత్రి ఉచిత సలహా ఇచ్చే దుస్థితికి దిగజారిన సంగతి తెలిసిందే. ఇలా కేంద్రంలోని బీజేపీ ప్రభుత్వ నిర్లక్ష్య వైఖరి కారణంగా ఉన్నత చదువులు చదివిన వారు నిరుద్యోగులుగా మిగిలిపోతున్నారు.

కూలీనాలీ చేసుకోలేక.. చదువుకు తగిన ఉద్యోగం దొరుకక ఎంతో మంది విద్యావంతులు మానసికంగా నలిగిపోతున్నారు. ఈ విషయాన్ని స్వయంగా కేంద్రప్రభుత్వమే చెప్పింది. దేశంలో గ్రాడ్యుయేట్లలోనే అత్యధిక నిరుద్యోగులు ఉన్నారన్న వార్తలు వాస్తవమేనా? అని తమిళనాడు ఎంపీ రమేశ్‌ అడిగిన ప్రశ్నకు కేంద్ర కార్మిక, ఉపాధి కల్పన శాఖ సమాధానం ఇచ్చింది. ఇందులో అనేక విస్తుపోయే వాస్తవాలు ఉన్నాయి.

• ‘నువ్వు నాలెక్క కూలి పని చేసుకోవద్దు బిడ్డా. బాగా చదివి మంచి ఉద్యోగం చెయ్యాలె’ అని తల్లిదండ్రులు తమ పిల్లలకు చెప్తుంటారు. ఉన్నత చదువులు చదివితే మంచి ఉద్యోగం వస్తుందని అందరూ అనుకుంటారు. కానీ కేంద్రంలోని బీజేపీ వైఫల్యం కారణంగా.. చదువు పెరుగుతున్న కొద్దీ ఆ స్థాయిలోనే నిరుద్యోగిత పెరుగుతుండటం బాధాకరం. నిరక్షరాస్యులు చిన్న చిన్న పనులు చేసుకుంటూ ఉపాధి పొందుతున్నట్టు గణాంకాలు స్పష్టం చేస్తున్నాయి. ఇందులో అత్యధిక శాతం మంది చాలీచాలని డబ్బులతో వారి కుటుంబ జీవనం దుర్భరంగా సాగుతున్నది.
• నిరక్షరాస్యుల్లో కేవలం 0.4 శాతం మంది మాత్రమే ఉపాధి దొరుకక ఇబ్బంది పడుతుంటే.. డిగ్రీ చేసినవాళ్లలో మాత్రం దాదాపు 15 శాతం మంది ఉద్యోగం దొరుకక ఖాళీగా ఉంటున్నారట. డిప్లామా, పీజీ చేసినవారి పరిస్థితి సైతం ఇలాగే ఉన్నది.
• ఈ పరిస్థితికి కేంద్ర ప్రభుత్వమే కారణమని నిపుణులు మండిపడుతున్నారు. పెట్టుబడులను ఆకర్షించి, ఉద్యోగ, ఉపాధి అవకాశాలు కల్పించాల్సిన కేంద్ర ప్రభుత్వం మౌనంగా ఉండిపోవటంతో ఈ దుస్థితి ఏర్పడుతున్నదని విమర్శిస్తున్నారు. తెలంగాణ వంటి రాష్ర్టాలు పెట్టుబడులను ఆకర్షించేందుకు ప్రయత్నిస్తున్నా.. వివక్ష ప్రదర్శిస్తుండటం, అడ్డంకులు సృష్టిస్తుండటంతో యువత నిరుద్యోగులుగా మిగిలిపోతున్నారని ఆవేదన వ్యక్తం చేస్తున్నారు. కేంద్రం చెప్పింది 2021-22 లెక్కలేనని, ఇప్పుడు నిరుద్యోగిత ఇంకా పెరిగిందని గుర్తు చేస్తున్నారు. ఇప్పటికైనా కేంద్రం కండ్లు తెరవాలని, యువత ఉపాధి కల్పనపై దృష్టిసారించాలని సూచిస్తున్నారు.