పీఎం కుసుమ్‌ పీపీఏలకు బ్రేక్‌!

ప్రధాన మంత్రి కుసుమ్‌ స్కీమ్‌పై రైతుల అభ్యంతరాల నేపథ్యంలో టీజీరెడ్‌కోతో ఒప్పందాలకు బ్రేక్‌ పడింది. పొలాల్లో ఏర్పాటు చేసే సోలార్‌ ప్లాంట్లకు సంబంధించిన స్పష్టత ఇచ్చేవరకు పీపీఏలపై సంతకాలు చేయబోమని రైతులు స్పష్టంచేశారు.

• సంతకం చేసేందుకు రైతుల నిరాకరణ
• నమస్తే తెలంగాణ కథనంలో అప్రమత్తమైన అన్నదాతలు
• అభ్యంతరాలను పరిగణనలోకి తీసుకోవాలని డిమాండ్‌

హైదరాబాద్‌, జూన్‌ 8 (నమస్తే తెలంగాణ): ప్రధాన మంత్రి కుసుమ్‌ స్కీమ్‌పై రైతుల అభ్యంతరాల నేపథ్యంలో టీజీరెడ్‌కోతో ఒప్పందాలకు బ్రేక్‌ పడింది. పొలాల్లో ఏర్పాటు చేసే సోలార్‌ ప్లాంట్లకు సంబంధించిన స్పష్టత ఇచ్చేవరకు పీపీఏలపై సంతకాలు చేయబోమని రైతులు స్పష్టంచేశారు. పీఎం కుసుమ్‌ స్కీమ్‌లో ఒప్పందం చేసుకునేందుకు రావాలంటూ టీజీరెడ్‌కో అధికారులు రైతులకు సూచించారు. ఈ అంశంపై ఆదివారం ‘రైతులపైనే సోలార్‌ ప్లాంట్ల విద్యుత్తు భారం’ శీర్షికతో నమస్తే తెలంగాణలో కథనం ప్రచురితమైంది. రైతులకు వ్యతిరేకంగా ఉన్న నిబంధనలను ఈ కథనం బయటపెట్టింది.

అధికారుల ఆహ్వానం మేరకు తెలంగాణ వ్యాప్తంగా వివిధ జిల్లాల నుంచి రైతులు హైదరాబాద్‌లోని టీజీరెడ్‌కో కార్యాలయానికి వచ్చి తమ అభ్యంతరాలను పరిగణిలోకి తీసుకోవాలని, అనుమానాలను నివృత్తిచేయాలని కోరారు. అంతవరకు పీపీఏలపై సంతకాలు చేయబోమని తేల్చిచెప్పారు. దీంతో టీజీరెడ్‌కో వీసీ అండ్‌ ఎండీ అనిల, సీజీఎం ప్రభాకర్‌ రైతులతో చర్చలు జరిపారు. తెలంగాణ సోలార్‌ ఎనర్జీ అసోసియేషన్‌ అధ్యక్షుడు అశోక్‌కుమార్‌గౌడ్‌, ప్రధాన కార్యదర్శి శ్రీహరిబాబు, ఉపాధ్యక్షుడు రాజేశ్‌, జాయింట్‌ సెక్రటరీ బాబునాయుడు చర్చల్లో పాల్గొని సందేహాలు వ్యక్తంచేశారు. రైతులకు స్పష్టత ఇచ్చేందుకు ఒక అధికారిని నియమించామని, కాల్‌ చేసి సందేహాలు నివృత్తిచేసుకోవచ్చని అధికారులు తెలిపారు.

• రైతులు అభ్యంతరాలు, డిమాండ్లు
• ప్లాంట్‌ నుంచి సబ్‌స్టేషన్‌కు విద్యుత్తు లైన్‌ను డిస్కం అధికారులే ఏర్పాటు చేయాలి.
• రైతులకు బలవంతంగా హెచ్‌టీ కనెక్షన్‌ కట్టబెట్టడం ఎందుకు? జనరేటర్‌తో, ఎల్‌టీ కనెక్షన్‌తో ప్లాంట్‌ నడుపుకుంటాం. రెడ్‌కోకు అభ్యంతరమేంటి? రాజస్థాన్‌, మధ్యప్రదేశ్‌లో హెచ్‌టీ కనెక్షన్‌ ఇవ్వడంలేదు. మన దగ్గర ఎందుకు పాటించడం?
• రైతు రుణమాఫీ చేస్తారన్న ఆశతో రుణాలు కట్టలేదు. సిబిల్‌ స్కోర్‌తో సంబంధం లేకుండా, బ్యాంక్‌లు రుణాలు మంజూరు చేయించాలి.
• మాకు ఒప్పంద పత్రాలు తెలుగులోనే ఇవ్వాలి. ఎల్‌వోసీ (లెటర్‌ ఆఫ్‌ క్రెడిట్‌) ఇప్పిస్త్తామన్నారు. ఇప్పుడు స్పష్టతలేదు.
• ఒక రైతు భార్య పేరు, తన పేరు మీద రెండు ప్లాంట్లు ఏర్పాటు చేసుకుంటే వ్యవసాయ మౌలిక సదుపాయాల ఆర్థిక నిధి నుంచి రూ. 2 కోట్ల రుణం వరకు 3శాతం వడ్డీ రీయింబర్స్‌మెంట్‌ అవకాశం కల్పించాలి.
• 60 ఏండ్లు దాటిన వారికి బ్యాంకులు రుణాలివ్వడంలేదు. ఇందుకు పరిష్కారం చూపాలి.