Solar Power Plants | సోలార్‌ ప్లాంట్లపై సవాలక్ష సందేహాలు.. స్పష్టతలేక మహిళా సంఘాల్లో అయోమయం

రాష్ట్రంలో ప్రభుత్వం ఏర్పాటు చేయతలపెట్టిన సోలార్‌ విద్యుత్తు ప్లాంట్లపై స్పష్టతలేదని విమర్శలు వినిపిస్తున్నాయి. పీఎం కుసుమ్‌ స్కీమ్‌లో భాగంగా రాష్ట్రంలో సోలార్‌ ప్లాంట్లు ఏర్పాటు చేసుకునే అవకాశాన్ని ప్రభుత్వం మహిళా స్వయం సహాయక సంఘాలకు కల్పించింది.

• స్పష్టతనివ్వని సర్కారు.. 
• స్కీమ్‌లో గందరగోళంతో ముందుకుసాగని టెండర్‌ ప్రక్రియ

Solar Power Plants | హైదరాబాద్‌, జనవరి 18 (నమస్తే తెలంగాణ): రాష్ట్రంలో ప్రభుత్వం ఏర్పాటు చేయతలపెట్టిన సోలార్‌ విద్యుత్తు ప్లాంట్లపై స్పష్టతలేదని విమర్శలు వినిపిస్తున్నాయి. పీఎం కుసుమ్‌ స్కీమ్‌లో భాగంగా రాష్ట్రంలో సోలార్‌ ప్లాంట్లు ఏర్పాటు చేసుకునే అవకాశాన్ని ప్రభుత్వం మహిళా స్వయం సహాయక సంఘాలకు కల్పించింది.

1000 మెగావాట్ల ప్లాంట్ల ఏర్పాటు లక్ష్యంగా ప్లాంట్ల ఏర్పాటుకు టీజీ రెడ్‌కో టెండర్లు ఆహ్వానించింది. కానీ టెండర్ల ప్రక్రియ ముందుకు సాగడంలేదు. బ్యాంకు రుణాలు ఇప్పిస్తామని ప్రభుత్వం చెప్పినప్పటికీ ప్లాంట్లు ఏర్పాటు చేస్తే పెట్టుబడి రాబట్టుకోవడం కష్టమేనని వాదనలు వినిపిస్తున్నాయి. స్కీమ్‌పై ప్రభుత్వం స్పష్టతనివ్వాలని మహిళా సంఘాలు కోరుతున్నాయి.

మహిళా సంఘాలు వ్యక్తంచేస్తున్న సందేహాలు

• ఒక గ్రామంలో 10-12 మహిళా సంఘాలుంటాయి. గ్రామ సమైక్య సంఘాలుంటా యి. ప్లాంట్ల ఏర్పాటు, నిర్వహణ బాధ్యత ఎవరిది?
• మెగావాట్‌ ప్లాంట్‌కు 4-5 ఎకరాలు భూ మి కావాలి. భూముల లీజు ధర ఎంత?
• భూములను చదును చేయడానికి, గుంతలు పూడ్చడానికి అయ్యే ఖర్చు ఎవరు భరించాలి?
• ప్లాంటును గ్రిడ్‌కు అనుసంధానం చేసే ట్రాన్స్‌మిషన్‌ విద్యుత్తు లైన్‌ ఏర్పాటు చేయాలంటే కిలో మీటర్‌కు రూ.15లక్షలు ఖర్చవుతుంది. ఈ మొత్తం భరించాల్సింది మహిళా సంఘాలా? డిస్కంలా?
• మెగావాట్‌ ప్లాంటు ఏర్పాటుకు రూ.3 కోట్లు వ్యయం అవుతుంది. నెలకు 1.40 లక్షల వాట్ల విద్యుత్తు ఉత్పత్తి అవుతుంది.
• వాట్‌కు రూ.3.13 చొప్పున రూ.4.5లక్షల వరకు ఆదాయం వస్తుంది. నిర్వహణ వ్యయం రూ.53 వేలు అవుతుంది. ఈ లెక్కన 20 ఏండ్లు దాటినా బ్యాంకు రుణం తీరడం కష్టమేనని సోలార్‌ అసొసియేషన్‌ నేతలు అంచనా వేస్తున్నారు.
• సోలార్‌ ప్యానల్‌ ధరలు భారీగా పెరిగాయి. ప్లాంట్ల ఏర్పాటులో వీటి భారం సంగతేంటి?
• సోలార్‌ విద్యుదుత్పత్తిలో ప్యానల్‌ క్లీనింగ్‌ కీలకం. ఇందుకు ఒక ప్లాంటుకు 8 మంది సిబ్బంది అవసరం. వీరి వేతనాల భారం వల్ల గిట్టుబాటు అవుతుందా?