ఫస్ట్‌డోస్‌లో తెలంగాణ టాప్‌!

కొవిడ్‌ వ్యాక్సిన్‌ మొదటి డోస్‌ పంపిణీలో తెలంగాణ అన్ని రాష్ర్టాల కన్నా ముందున్నట్టు గణాంకాలు స్పష్టం చేస్తున్నాయి. రాష్ట్రంలోకి వలసలు ఎక్కువ సంఖ్యలో ఉండటంతో లక్ష్యానికి మించి టీకాల పంపిణీ జరుగుతున్నది

• ఇప్పటికే 105 శాతం పూర్తి
• వలసలు అధికంగా ఉండటమే కారణం
• 103 శాతంతో రెండో స్థానంలో ఢిల్లీ

హైదరాబాద్‌, ఫిబ్రవరి 3 : కొవిడ్‌ వ్యాక్సిన్‌ మొదటి డోస్‌ పంపిణీలో తెలంగాణ అన్ని రాష్ర్టాల కన్నా ముందున్నట్టు గణాంకాలు స్పష్టం చేస్తున్నాయి. రాష్ట్రంలోకి వలసలు ఎక్కువ సంఖ్యలో ఉండటంతో లక్ష్యానికి మించి టీకాల పంపిణీ జరుగుతున్నది. ఇప్పటివరకు 105 శాతం మందికి మొదటి డోస్‌ పంపిణీ చేయడంతో తెలంగాణ దేశంలోనే అత్యధిక రేటు నమోదు చేసింది. ఢిల్లీ 103 శాతంతో రెండో స్థానంలో నిలిచింది. రాష్ట్రంలో 2.77 కోట్ల మందికి మొదటి డోస్‌ వేయాలని లక్ష్యంగా పెట్టుకోగా.. బుధవారం వరకు 2.90 కోట్ల మందికి టీకాలు వేశారు. లక్ష్యం కన్నా 13 లక్షల టీకాలను అదనంగా పంపిణీ చేశారు. దేశవ్యాప్తంగా దాదాపు 12 రాష్ర్టాలు, కేంద్రపాలిత ప్రాంతాలు 100 శాతం మొదటి డోస్‌ పంపిణీ చేసినట్టు గణాంకాలు చెప్తున్నాయి.

• తెలంగాణలో రంగారెడ్డి, హైదరాబాద్‌ జిల్లాల్లో వలసలు ఎక్కువగా నమోదయ్యాయి. రాష్ట్రంలోనే అత్యధికంగా రంగారెడ్డి జిల్లాలో 119 శాతం వ్యాక్సినేషన్‌ నమోదైంది. 23.28 లక్షల మందికి టీకాలు వేయాలని లక్ష్యంగా నిర్దేశించగా, 27.68 లక్షల మందికి ఫస్ట్‌డోస్‌ పూర్తయింది.
• 108 శాతం వ్యాక్సినేషన్‌తో హైదరాబాద్‌, మెదక్‌ సంయుక్తంగా రెండో స్థానంలో నిలిచాయి. హైదరాబాద్‌లో 33.83 లక్షలు టార్గెట్‌ కాగా.. 36.49 లక్షలు, మెదక్‌లో 5.48 లక్షలు లక్ష్యంగా నిర్దేశించగా, 3.64 లక్షల మొదటి డోస్‌ టీకాలు పంపిణీ చేశారు.
• సిద్దిపేట, మంచిర్యాల, భద్రాద్రి కొత్తగూడెం, హన్మకొండ, సంగారెడ్డి జిల్లాలు 106 శాతంతో మూడో స్థానంలో నిలిచాయి.
• రాష్ట్రంలోని 28 జిల్లాల్లో 100 శాతానికిపైగా వ్యాక్సినేషన్‌ నమోదు కావడం విశేషం.
• కరీంనగర్‌, హన్మకొండ జిల్లాల్లో రెండు డోసుల పంపిణీ పూర్తయింది.

రికార్డు సృష్టించిన హనుమకొండ
వ్యాక్సినేషన్‌లో హనుమకొండ జిల్లా అరుదైన ఘనత సాధించింది. మొదటి డోస్‌, రెండో డోస్‌ టీకాల పంపిణీని విజయవంతంగా పూర్తిచేయడంతోపాటు 15-17 ఏండ్లవారికి 100 శాతం టీకాలు పంపిణీ చేసిన మొదటి జిల్లాగా రికార్డు సృష్టించింది. జిల్లాలో మొదటి డోస్‌ 106 శాతం, రెండో డోస్‌ 101 శాతం, టీనేజర్లకు 102 శాతం టీకాలు పంపిణీ చేశారు.